Marku

4 Tsô Yesu shi gba tesen hen kpe zegemnger, nahan ikpelaior i vesen va kohol her. Maa a nyôr a tema shin tso, a undu kpetar daalaa, ikpelaior la di gema lu sha tar, hen kpe zegemnger la. 2 Maa a gba tesen ve akaa kpishi sha anzaakaa. Er lu tesen la, a kaa a ve ér: 3 “Ver nen ato. Nenge! Orsule ugen yar lu tan ivor. 4 Er lu tan ivor la, isham igen haa sha kpegbenda, nahan inyon va ya i. 5 Igen haa sha vande, ape inya lu kpishi ga yô, nahan fese je, i mende sha ci u inya civir her ga. 6 Kpa iyange dugh yô, oo ta i, maa i use, sha ci u i wa amise ga. 7 Isham igen haa ken usaa, nahan usaa vese imbishi i, nahan i ume atam ga. 8 Kpa igen haa sha inya i dedoo. Ngi menden shi ngi vesen yô, i gba umen atam. Asange agen ker ume atam hemba er yange i lôô la kwa 30, agen kwa 60, agen di kwa 100.” 9 Maa shi a kaa ér: “Or u nan lu a ato a ungwan yô, nana̱ ungwa.”

10 Ikpelaior la yemen yô, mbagenev mba ve shi her la kua Mbapuekaruhar mbara gba va pinen un kwagh u anzaakaa la. 11 A kaa a ve ér: “Ne yô, i wase ne u kaven akaamyer a sha kwagh u Tartor u Aôndo, kpa mba ken inya yô, akaa a ve ungwan la cii ka ve anzaakaa di tsô. 12 Sha nahan yô, er ve nengen nahan kpa, vea nenge vea kav ga, shi er ve ungwan nahan kpa, vea ungwa vea kav inja i kwagh shon ga; shi vea gema asema sha u i de ve asorabo a ve kpaa ga.” 13 Shi a kaa a ve ér: “Ne kav injakwagh ne ga, nahan a er nan ve ne kav anzaakaa agene?

14 “Ortanivor la lôô loho* u Aôndo. 15 Nahan ivor i i hee sha kpegbenda la ngi er ior mba i lee loho la ken a ve nahan; kpa ka vea ungwan loho u i lee ken a ve la yô, fese je Satan a va dugh u kera. 16 Ivor i i hee sha vande la kpa, ngi er ior mba ka ve ungwa loho la, maa fese je ve ngohol u a iember nahan. 17 Kpa ka ve wa amise ga, nahan ve za hemen sha anshighe kpuaa; vea va nguren yan ican shin a tôvon ve a ican sha ci u loho la yô, ve gba fele. 18 Ivor igen kpaa haa ken usaa. Ingin di ngi er ka ior mba ka ve ungwa loho shon, 19 kpa akaa a nyian ishima a tar ne* kua tahav mbu tsughun or mbu inyaregh ki lu a mi la, man asaren a sha akaa agen cii ka a nyôr ve ken ishima a imbishi loho shon, maa u kera ume atam ga la nahan. 20 U masen yô, ivor i i hee sha inya i dedoo la ngi er ior mba ka ve ungwa loho shon shi ve ngohol u saan saan shi ve ume atam la nahan. Mbagenev ka ve ume atam i hemba kwagh u yange i lôô la kwa 30, mbagen kwa 60, mbagenev di kwa 100.”

21 Shi a kaa a ve ér: “Mba tsaren imenger mba gem mba we shin ikyese* shin mba we shin ityôgambee? Ka i tsar i̱ i ver sha tebul* ga zee? 22 Kwagh môm u a lu myer, u a va pase un ken igbar ga je kpa ngu ga. Shi ma kwagh u i yer kpile kpile, u una va due ken igbar ga je kpa ngu ga. 23 Or u nan lu a ato a ungwan yô, nana̱ ungwa.”

24 Shi a kaa a ve ér: “Ver nen ishima sha kwagh u ne lu ungwan ne. Ka kwagh u ne karen a mi la, ne kpa a kar a na ne ye, man a na ne a hemba nahan je kpaa. 25 Or u nan lu a kwagh yô, a seer nan, kpa or u nan lu a mi ga yô, kwagh u nan hen ér nan ngu a mi la je kpa a ngohol hen a nan kera.”

26 Tsô shi a kaa a ve ér: “Sha nahan yô, Tartor u Aôndo ngu vough er zum u or nan te ivor hen inya nahan. 27 Tugh ka mbu ile, nan nyôr nan yav, sev mbu av nan nder, ivor la di i mende shi i vesen i seer a seer, kpa er kwagh ne ka a er la jighilii yô, nan fa ga. 28 Inya ka i na kwagh u i lee la a vese kure kure a va ume ityamegh. Gongor ka u hii vesen, maa ishagher i va due sha mi, ishagher la i mase wan asange kimi. 29 Nahan iyiagh kira kia va vian yô, fese je nan yar a loji, sha ci u sunda kuma.”

30 Shi a kaa a ve ér: “Ka nyi se fatyô u karen Tartor u Aôndo sha mi, shin ka sha injakwagh i nyi nahan se fatyô u pasen kwagh u Tartor laa? 31 Ngu er ishange i masetadi nahan. Shighe u ka a lôôn i̱ shin inya la, i̱ hemba ndahar ken ishamakaa i sha tar cii. 32 Kpa a lôôn i̱ kera yô, i̱ vese i̱ hemba kehen a ahu a iue agen cii, shi i̱ ta agbaa a vesen, je inyon i purugh i fatyô u va wan aya sha mi teman ken mure u agbaa shon.”

33 A pase ve loho u Tartor sha anzaakaa ne nahan kpishi, er vea fatyô u kaven la cii. 34 Jim je yô, hanma shighe u una ôron ve kwagh yô, i lu sha anzaakaa, kpa mbahenen nav yô, a hide a za pase ve hanma kwagh ve tseegh.

35 Tsô sha iyange shon la, ka va hingir aikighe yô, a kaa a ve ér: “Se per nen yande la.” 36 Nahan mba ne ikpelaior la gbenda i yemen cii yô, her je ve kar a na shin tso u lu shimi la ve gba yemen. Utso mbagenev kpa lu zan a na imôngo. 37 Tsô ijeverahumbe za mough, maa agôndoamnger gba tan sha tso sha agee karen haan shimi, nahan mngerem lu nôngon u ivin shin tso. 38 Kpa un lu shin ityôtsoo lu yaven sha pilo.* Tsô ve nder un ve kaa a na ér: “Ortesen, er se lu nôngon u saan nahan je kpa kwagh gba u sha mi gaa?” 39 Maa a mough a yange ahumbe la shi a kaa a zegemnger la ér: “Huan! Lu ving!” Tsô ahumbe la de, maa huan ving. 40 Tsô a pine ve ér: “Er nan i cier ne iyol yum nahana? Ne mba a lu a jighjigh u nan je gaa?” 41 Kpa kwagh ne cier ve iyol kpishi, nahan ve ôr kwagh ayol a ve ve kaa ér: “Or ne yô, ka an jimi? Ahumbe man zegemnger je kpa mba ongo imo na.”