Mateu

19 Yesu kur akaaôron ne yô, a mough ken Galilia a per Yordan yande la, a yem hen anijiir ugen ken akighir a haregh* u Yudia. 2 Ikpelaior shi dondo un ijime, nahan a bee ve iangev her.

3 Tsô Mbafarishi za va her u va karen un. Ve pine un ér: “Or a fatyô u paven ivaa a kwase u nan sha hanma ityôkyaa ciili?” 4 A gema a kaa a ve ér: “Ne mba a̱ ôr kwagh u i nger la gaa? Un u a gba ve sha hiihii la, gba ve lu nomsoor man kwase, 5 shi a kaa ér: ‘Sha ityôkyaa ne yô, or nana undu ter u nan kua ngô u nan, nana var ken kwase u nan, ve uhar cii vea hingir iyol i môm.’ 6 Sha nahan yô, kera mba uhar ga, kpa ve hingir iyol i môm. Nahan, kwagh u Aôndo a zough yô, or a de paven ga.” 7 Ve kaa ér: “Tsô er nan ve Mose yange ôr kwagh u nan kwase takeda u paven ivaa, kua kwagh u paven a nana?” 8 A kaa a ve ér: “Ka er ne lu ior mba norom sha kwagh yum ve, Mose yange lumun ér ne paven ivaa a kasev enev ye, kpa kape yange lu sha igbetar la ga. 9 Kpa me kaa ne, aluer or pav ivaa a kwase u nan man ka sha ci u kwase la er idya* ga, man nan za er kwase ugen yô, or la nan er idya.”

10 Mbahenen nav kaa a na ér: “Aluer kape kwagh u nom man kwase a lu la yô, guda u lun kwav.” 11 A kaa a ve ér: “Ka ior cii vea fatyô u eren kwagh ne ga, saa mba ve lu a iyua* la tseegh. 12 Ior mbagenev vea vôso kwase ga, sha ci u i mar ve nahan, shi mbagenev vea vôso kwase ga sha ci u ka ior ve gem ve ve lu nahan ye. Mbagenev di yô, vea vôso kwase ga, ve tsua ayol a ve u eren nahan sha ci u Tartor u sha. Mba ve fetyô u eren kwagh ne yô, ve̱ er.”

13 Tsô mbamaren va un a mbayev mba kiriki ér a̱ penda ve ave iyol, a er msen, kpa mbahenen zôhô a ve. 14 Yesu gema kaa a ve ér: “De nen mbayev mba kiriki, de yangen nen ve u van hen a mo ga, sha ci u ka amba ne je Tartor u sha u lu sha ci ve ye.” 15 Tsô a penda ve ave iyol, maa a mough her a gba yemen.

16 Tsô orgen va pine un ér: “Ortesen, ka nyi i dedoo i gbe u me er ve me zua a uma u tsôrono?” 17 A kaa a na ér: “Er nan ve u lu pinen mo kwagh sha kwagh u a lu u dedoo? Or ngu môm tseegh u nan lu or u dedoo yô. Kpa aluer u soo u zuan a uma yô, kuran atindi hanma shighe cii.” 18 A pine un ér: “Ka a hana?” Yesu kaa ér: “Mayange de woo or ga, shi mayange de eren idya ga, shi mayange de iin ga, shi mayange de eren shiada u aiegh sha or ga. 19 Naan teru man ngôu icivir, shi or u wan ndor a we nana̱ doo u ishima er iyol you nahan kpee je.” 20 Gumor la kaa a na ér: “M kor atindi angan cii, nahan ka nyi igen i shi u me ere?” 21 Yesu kaa a na ér: “Wea soo u lun vough* yô, yem za tee akaa a ou cii, gema inyaregh na mbaatsanev, tsô u lu a kwagh u injaa sha, nahan va dondom.” 22 Gumor la ongo nahan yô, ishima vihi un a kar her kera, sha ci u lu a inyaregh kpishi. 23 Yesu maa kaa a mbahenen nav ér: “Mimi je me kaa ne, a taver kpishi u ornyar nana nyôr ken Tartor u sha. 24 Shi me kaa ne, hemba kan zange u rakumi a̱ nyôr hen ihyura i anula, a u ornyar nana̱ nyôr ken Tartor u Aôndo.”

25 Mbahenen mba ongo nahan yô, kpiligh ve iyol kpishi, ve gba kaan ér: “Ka an jim a yima nana?” 26 Yesu gema kenger ve zulee, maa kaa ér: “Sha mnenge u ior yô, kwagh a fatyô u lun nahan ga, kpa Aôndo yô, fetyô u eren akaa cii.”

27 Tsô Peteru gema kaa ér: “Nenge, se undu akaa ase cii se dondo u. Nahan ka nyi se va zua a mini?” 28 Yesu kaa a ve ér: “Mimi je me kaa ne, sha shighe u eren akaa hingir a he,* zum u Wan u or una tema sha ikyônough nagh ki torough ki engem la, ne mba ne dondom ne kpaa ne tema sha mkônom 12, ne ôr uipyaven mba Iserael mba 12 la ijir. 29 Shi hanma or u nan undu uya shin anmgbianev mba nomso shin mba kasev, shin ter shin ngô shin ônov shin ishule sha ci u iti yam yô, nana zua a mi a hemba nahan kwa deri, shi nana va zua a uma u tsôron.

30 “Kpa ior kpishi mba ve lu mba hiihii la vea va hingir mba masetyô, mba masetyô di vea hingir mba hiihii.