Mbaroma

7 Anmgbianev, ne fa zan gaa? (Gadia m ngu ôron kwagh a mba ve fe atindi yô.) Er or nan lu uma je, nan ngu sha ikyev i Tindi.* 2 U tesen ikyav yô, kwase u nan lu a nom yô, tindi kange nan vea nom u nan shighe u nom a lu uma la, kpa aluer nom u nan kpe yô, nan kera ngu sha ikyev i tindi u nom u nan la ga. 3 Nahan aluer nan hingir kwase u orgen shighe u nom u nan a lu uma la yô, a yila nan ér idyakwase. Kpa aluer nom u nan la va kpe yô, nana kera lu sha ikyev i tindi u nom u nan la ga, nahan nana hingir kwase u orgen kpa, a kera yila nan ér idyakwase ga.

4 Nahan, anmgbianev av, ne kpa yange iyol i Kristu na ne lu kpenegh sha kwagh u Atindi, sha er ne hingir kwagh u orgen yô, ka un u yange i nder un shin ku la je la, man sha er se ume atam sha ci u icivir i Aôndo yô. 5 Gadia shighe u se lu uma sha inja i iyolough la, Atindi wase se u nengen a asaren a bo a a lu eren tom ken iyol yase,* zan a vese ken ku la. 6 Kpa hegen se kera mba sha ikyev i Atindi ga, sha ci u se mba kpenegh sha kwagh u yange kange se la, sha er se hingir ikpan sha gbenda u he, sha jijingi, a kera lu sha gbenda u tse, sha Atindi* ga yô.

7 Nahan se kaa ser nyi? Atindi ka isholiboo? Mayange ga! Mimi je, luun er Atindi nga ga yô, ma m fetyô u fan kwagh u a lu isholibo ga. U tesen ikyav yô, er Tindi a kaa ér: “De tômon kwagh ga” yô, kwagh la wasem m fa kwagh u a lu kwaghtômon yô. 8 Kpa ka tindi a ne m fe kwagh u a lu isholibo jim jim ye, sha ci u m fa er m tômon kwagh sha hanma gbenda cii yô, man kwagh la ka isholibo. Gadia shighe u tindi lu ga la, isholibo lu kpenegh. 9 Jighilii yô, yange m lu uma shighe u tindi lu ga la. Kpa tindi za ve yô, isholibo shi hide lu uma, kpa mo m gema m kpe. 10 Nahan tindi u ma za a mo ken uma la, gema za a mo ken ku. 11 Gadia tindi na yô, isholibo zua a ian meem wuam sha tindi shon. 12 Nahan Atindi iyol i a ka icighankwagh, shi kwagh u a kaa la kpa ka icighankwagh man kwagh u perapera man u dedoo.

13 Sha nahan yô, kwagh u dedoo gema vam a ku shinii? Mayange ga! Kpa ka isholibo i er nahan ye. I̱ na kwagh u dedoo la hingir kwagh u van mo a ku. Sha nahan yô, tindi tese er isholibo i lu kwagh u vihin tsung yô. 14 Gadia hegen se fa, Atindi ka kwagh u ken jijingi, kpa mo m ngu iyol i inyam tsô, i teem m hingir kpan u isholibo. 15 M fa kwagh u m eren ga. Gadia ka kwagh u a sarem la m eren ga, gema ka kwagh u m soo ga la ka m eren ye. 16 Nahan kpa, aluer ka kwagh u a sarem ga la ka m gema m er yô, m lumun mer Atindi doo. 17 Kpa hegen kera ka mo iyol yam m eren un ga, kpa ka isholibo i i tem ken a mo la. 18 Gadia m fa, kwagh u dedoo môm ngu ken a mo ga, ka ken iyol yam je la; sha ci u m ngu a isharen i eren kwagh u dedoo, kpa m gema m fetyô u eren ga. 19 Gadia m eren kwagh u dedoo u a sarem la ga, kpa ka kwagh u bo u a sarem ga la ka m gema m er ye. 20 Nahan, aluer ka kwagh u a sarem ga la ka m er yô, kera ka mo m eren un ga, kpa ka isholibo i i tem ken a mo la.

21 Nahan m mase kaven tindi ne ken iyol yam: Ka a saren mo u eren kwagh u vough yô, m kav er isharen i eren kwagh u bo la i vande lun ken a mo yô. 22 Ken ishima yam yô, kwagh u atindi a Aôndo gbam ishima sha mimi, 23 kpa m gema m kav tindi ugen ken iyol yam,* ngu nôngon num a tindi u a lu ken mhen wam la, yemen a mo sha u m za hingir kpan u tindi u isholibo, u a lu ken iyol yam* la. 24 Aye, kwagh tserem! Ka an nana shi yimam sha ikyev i iyol i i lu yemen a mo ken imba ku ne sha wono? 25 I̱ wuese Aôndo ken Yesu Kristu Ter wase! Nahan, ken mhen wam yô, m ngu kpan u atindi a Aôndo, kpa ken iyol yam yô, m ngu kpan u tindi u isholibo.