1 Yohane

4 Ne mba doon mo ishima, de ne nen jighjigh a hanma kwaghôron* u i kaa ér a due hen Aôndo ga, kpa karen nen hanma kwaghôron* u i kaa ér a due hen Aôndo cii, sha u ne fa aluer ka hen Aôndo a due yô, gadia uprofeti mbaaiev due mba zenden sha tar.

2 Ka gbenda u ne fa kwaghôron u a dugh hen Aôndo je ne: Hanma kwaghôron u i kaa ér a due hen Aôndo cii, aluer a kaa ér Yesu Kristu va ken iyol i inyam man awambe yô, a due ka hen Aôndo. 3 Kpa hanma kwaghôron u i kaa ér a due hen Aôndo kpa a ôr kwagh u Yesu nahan ga yô, kwaghôron la due ka hen Aôndo ga. Heela tseegh ga, kwaghôron la due ka hen antikristu, un shon u ne vande ungwan ner ngu van la, man ngu sha tar hegen.

4 Mbayev av, ne yô ne mba kwagh u Aôndo, nahan ne hemba ve,* sha ci u un u a lu ken mzough vea ven la hemba u a lu ken mzough vea tar la. 5 Ve mba ior i tar ne, ka nahan ve ka ve ôron akaa a tar ne ye, shi tar ngu ongo ve. 6 Se yô, se mba kwagh u Aôndo. Hanma or u nan fe Aôndo yô, nan ongo se; or u nan lu or u Aôndo ga yô, nan ongo se ga. Ka sha kwagh ne ka se fa mkposo u kwaghôron u a dugh hen Aôndo a kwaghôron u a dugh hen Aôndo ga la ye.

7 Ne mba doon mo ishima, se za nen hemen u doon a hanmô wase, sha ci u ka hen Aôndo dooshima a dugh ye, nahan hanma or u nan tesen dooshima cii ka Aôndo a mar nan ye, shi nan fa Aôndo. 8 Or u nan tesen dooshima ga yô, nan fa Aôndo ga, sha ci u Aôndo ka dooshima. 9 Ka sha kwagh ne i pase er se doo Aôndo ishima ye: Aôndo tindi Wan na u môm môm la shin tar, sha u se̱ zua a uma sha a na. 10 Kape kwagh u dooshima la a lu ne, ka se man Aôndo a doo se ishima ga, kpa ka un se doo un ishima ve a tindi Wan na sha u a̱ lu nagh ku wamen* sha ci u asorabo a ase ye.

11 Ne mba doon mo ishima, aluer kape se doo Aôndo ishima la yô, se kpa gba keng u se tesen hanmô wase dooshima. 12 Ma shighe môm kpa or ngu a nenge a Aôndo ga. Aluer se za hemen u tesen hanmô wase dooshima yô, Aôndo ngu ken a vese her, shi i na dooshima na la hingir vough ken a vese. 13 Ka sha kwagh ne se fe ser se mba ken mzough vea na her, shi un kpa ngu ken mzough vea vese ye; sha ci u a na se jijingi na. 14 Heela tseegh ga, se ayol a ase kpa se nenge shi se mba eren shiada ser Ter tindi Wan na sha u a lu oryiman u tar. 15 Or u nan pasen ér Yesu ka Wan u Aôndo cii yô, Aôndo ngu ken mzough vea imbaor la, nan kpa nan ngu ken mzough vea Aôndo. 16 Shi se fa shi se na dooshima u Aôndo a tesen se la jighjigh.

Aôndo ka dooshima, nahan or u nan ze hemen u tesen dooshima yô, nan ngu ken mzough vea Aôndo her shi Aôndo ngu ken mzough vea nan her. 17 Ka sha gbenda ne i ne dooshima a hingir vough ken a vese ye, sha er se lu a ishima i lamen gbar gbar sha iyange i ijirigh la yô, sha ci u er ngula a lu nahan, kape se ayol a ase kpa se lu ken tar ne vough je la. 18 Mciem ma ken dooshima ga, kpa dooshima u vough la ka a bee a* mciem ken or kera, sha ci u mciem ka ma yange se u eren kwagh. Jighilii yô, or u nan lu a mciem yô, nan ngu a lu a dooshima u vough ga. 19 Se mba tesen dooshima, sha ci u a vande tesen se dooshima.

20 Aluer ma or kaa ér, “Aôndo doom ishima,” kpa nan gema nan kôr anmgbian u nan ihyom yô, nan ngu oraie. Gadia or u anmgbian u nan, u nan nengen a nan la a doo nan ishima ga yô, Aôndo u nan nenge a na ga la una fatyô u doon nan ishima ga. 21 Man a wa se tindi ne ér, or u Aôndo a doo nan ishima yô, gba keng u anmgbian u nan kpa una doo nan ishima.