Mateu
1 Ngun ka takeda u sha kwagh u yiase* i Yesu Kristu,* wan u Davidi, wan u Aberaham:
2 Aberaham mar Isaka;
Isaka mar Yakob;
Yakob mar Yuda kua ônov mba nomso mbagenev;
3 Yuda mar Pereshi man Sera a Tamar;
Pereshi mar Heseron;
Heseron mar Ram;
4 Ram mar Aminadabi;
Aminadabi mar Nashon;
Nashon mar Salmon;
5 Salmon mar Boashi a Rahabi;
Boashi mar Obedi a Rutu;
Obedi mar Yese;
6 Yese mar Tor Davidi;
Davidi mar Solomon a kwase u Uria;
7 Solomon mar Rehoboam;
Rehoboam mar Abiya;
Abiya mar Asa;
8 Asa mar Yehoshafati;
Yehoshafati mar Yehoram;
Yehoram mar Ushia;
9 Ushia mar Yotam;
Yotam mar Ahashi;
Ahashi mar Hesekia;
10 Hesekia mar Manase;
Manase mar Amon;
Amon mar Yoshia;
11 Yoshia mar Yekonia man ônov mba nomso mbagenev sha ayange a i lu yemen a ior ken Babilon la.
12 Mba yemen a ior ken Babilon kera yô, Yekonia mar Sheatiel;
Sheatiel mar Serubabel;
13 Serubabel mar Abiudi;
Abiudi mar Eliakim;
Eliakim mar Ezôr;
14 Ezôr mar Sadoki;
Sadoki mar Akim;
Akim mar Elaudi;
15 Elaudi mar Eliezar;
Eliezar mar Matan;
Matan mar Yakob;
16 Yakob mar Yosev nom u Maria, un u yange mar Yesu, u i yilan ér Kristu la.
17 Kohol ikyov ne cii, hii sha Aberaham zan zan va ar sha Davidi, lu ikyov 14, shi hii sha Davidi zan zan va ar sha shighe u i yem a ior ken Babilon la, lu ikyov 14, shi hii sha shighe u i yem a ior ken Babilon la zan zan va ar sha Kristu, lu ikyov 14.
18 Kpa ka akaa a yange za hemen sha kwagh u mar u Yesu Kristu je ne. Ngô na Maria yange tôndo zwa u vôson Yosev, kpa ve lu a vôso ga je maa wa iyav sha icighan jijingi.* 19 Nahan kpa, er nom* na Yosev lu orperapera yô, soo ér a̱ ya kunya ken igbar ga, nahan a wa ken ishima ér una pav a na ving. 20 Kpa henen sha akaa ne cii yô, ortyom u Yehova* va ande hen a na ken mnya, kaa a na ér: “Yosev, wan u Davidi, de cian u kuan a kwase wou Maria van a na hen ya ga, gadia a jile iyol* ka sha icighan jijingi je. 21 Una mar wan u nomso, nahan u ii un iti wer Yesu,* sha ci u ka un una yima ior nav sha asorabo a ve ye.” 22 Akaa ne cii er nahan mimi sha u kuren kwagh u Yehova* yange mgbegha profeti na ôr ne, ér: 23 “Nenge! Iniunkwase ia wa iyav, ia mar wan u nomso, a yilan un ér Imanuel,” inja na yô ér, “Aôndo Ngu a Vese.”
24 Yosev nderen yô, a er kwagh u ortyom u Yehova* kaa un la. A kua a kwase na a va a na hen ya na. 25 Kpa a yav a na ga zan zan a kar maren wan u nomso. A ii un iti ér, Yesu.