Mbaroma

9 M ngu ôron mimi ken Kristu, m ngu eren aie ga, gadia imoshima yam ngi eren shiada vea mo sha icighan jijingi 2 er m lu zungwen tsung shi ishima i zer vihin mo gbem yô. 3 Gadia mo yô, guda ma i wem ifyan shi ma i pavem a Kristu sha ci u anmgbianev av mba sha iyol mba ve lu ityô yam la, 4 ka Mbaiserael je la. Ka ve yange i lumun ve u lun ônov mba Aôndo, shi i ver ve sha ian i icivirigh, shi i ya ikyur a ve, shi i na ve Atindi kua icighantom, shi i er uityendezwa a ve kpaa ye. 5 Ve due ken uter vev, shi ka ken a ve Kristu kpa a dugh sha inja i iyolough ye. I̱ wuese Aôndo u a lu a tahav sha akaa cii la gbem sha won. Amen.

6 Nahan kpa, u ngu wer kwaghôron u Aôndo la gba inya ga. Gadia ka mba ve dugh ken tsombor u Iserael cii ve lu “Iserael” kpôô kpôô ga. 7 Shi er ve dugh ken tsombor u Aberaham nahan cii kpa, ka ve cii ve lu ônov* ga; kpa i nger ér: “Mba a yilan ve ér ônov* ou la, vea due ken Isaka.” 8 Inja na yô, ka mba ve lu ônov sha inja i iyolough la ve lu ônov mba Aôndo kpôô kpôô ga, kpa ka ônov mba ityendezwa mbara i nenge ér ka ônov* mba Aberaham ye. 9 Gadia kwaghôron u ityendezwa la kaa ér: “Inyom i sha, me vaan hen shighe ne nahan yô, Sara mar wan u nomso kera ve.” 10 Lu hen shighe la tseegh ga, kua shighe u Rebeka wa iyav a or môm, ka ter wase Isaka je la, mbu lu u una mar ahina la kpaa. 11 Aôndo yange vande wan ishima u tsuan or, shi fa er una tsua nan la kpaa; lu u una tsua nan sha ci u ityom i nan er ga, kpa lu u un iyol na una tsua or u soo u yilan la. Nahan, er i lu a mar ônov mbara ga, shi ve lu a er kwagh u dedoo shin u bo ga la je, 12 i kaa a na* ér: “Wan u vesen la una lu kpan u wan u kiriki la.” 13 Ka vough er i nger nahan, ér: “Yakob yange doom ishima, kpa Isou yô, m kôr un ihyom.”

14 Nahan se kaa ser nyi? Aôndo eren kwagh sha ifer shinii? Mayange ga! 15 Gadia a kaa a Mose ér: “Or u mhôônom ma kerem a nan la cii, me zungwe nan mhôônom, shi or u kunya u kerem a nan kpaa, me tese mer kunya kôrom a nan.” 16 Sha nahan yô, ka sha isharen i or shin sha iniôngon i nan* Aôndo una zungwe nan mhôônom ga, kpa ka sha mnenge u Aôndo u a zungwen mhôônom la. 17 Gadia ruamabera kaa a Farou ér: “Ka sha ityôkyaa ne m de u u lu her ye: sha er me tese tahav av sha kwagh wou, shi me na a pase iti yam sha tar cii yô.” 18 Sha nahan yô, or u a nenge i doo un cii, ka a zungwe nan mhôônom, shi or u a nenge i doo un cii, ka a de nan cighir ishima.

19 Nahan pinem ase wer: “Er nan ve shi ka a zua or a ibo? Ka an nana fatyô u yangen un u eren ishima naa?” 20 Kpa we or, u ngu di nyi ve u hendan kwagh a Aôndo? Kwagh u i maa un a maa ka a hide a pine un u maa un la ér: “Er nan u maam nahanaa?” 21 Ka nyi ase? Ormaantyegh ngu a tahav sha inyatyuu ga zee? Una fatyô u coon inyatyuu maan ikyagh ki eren kwagh u icivirigh a mi kua ki eren kwagh u icivirigh ga a mi sha inyatyuu shon i môm gaa? 22 Nahan aluer Aôndo yange soo u tesen iyugh na kua tahav nav ken igbar, kpa wa ishima tsung, de mkam ma ma kom iyugh na, i lu u a tim ma kera la ma her di ye? 23 Man aluer yange er kwagh ne sha u una tese er un lu a icivir kpishi sha kwagh u mkam ma ma kom u una zungwe ma mhôônom, ma yange maa sha ci u ma zua a icivir la 24 di ye? Ka se je la, se mba yange yila, lu ken Mbayuda tseegh ga, kpa kua ken akuraior agen kpaa la. 25 Ka kwagh u yange ôr ken Hosea kpaa je la, ér: “Me yila mba ve lu ior av ga la mer, ‘ior av’; kwase u a doom ishima ga la kpaa, me yila un mer, ‘u̱ doon mo ishima’; 26 shi hen ijiir i yange i kaa a ve ér, ‘Ne mba ior av ga’ la, a yila ve her ér, ‘ônov mba Aôndo u uma.’”

27 Shi Yesaia yange ôr kwagh u Iserael genger genger ér: “Shin er ônov mba Iserael ve ngee er waarawa u shin zegemnger nahan kpa, a yima a lu asande a ve tseegh. 28 Gadia Yehova* una ôr tar ijir una kure; una ngôôr kuren i ga.”* 29 Shi ka vough er Yesaia tsenga ôron nahan, ér: “Luun er Yehova* u akum a sha shi se vor* her ga yô, ma se hingir vough er Sodom nahan, shin ma se lu er ka Gomora nahan.”

30 Nahan se kaa ser nyi? Se kaa ser, shin er ior mba ken akuraior lu keren u eren kwagh u perapera ga nahan kpa, ve hingir mbaperapera, man lu sha jighjigh u nan ve hingir mbaperapera ye; 31 kpa Mbaiserael yô, shin er ve lu keren ér vea kuran atindi a perapera nahan kpa, ve fatyô u kuran atindi la ga. 32 Sha ci u nyi? Sha ci u ve lu nôngon ér vea lu mbaperapera, kpa lu sha jighjigh u nan ga, ve lu henen ér ka sha akaa a ve eren la. Ve nôngo gbeev sha “iwen i nan gbeev mbu nôngon”; 33 er i nger nahan, ér: “Nenge! M ngu veren iwen i nan gbeev mbu nôngon ken Shion kua vande u tan nguhar sha mi, kpa or u nan ne un jighjigh yô, mayange nana va ahenge ga.”