2 Yohane

1 Mo tamenor,* m ngu ngeren hen kwase* u i tsough un la, kua hen ônov nav. Ne doom ishima sha mimi, kpa ka mo tseegh ga, mba ve fe mimi cii ne doo ve ishima, 2 sha ci u mimi u a lu ken a vese her, shi i lu u una lu ken a vese gbem sha won la. 3 Aôndo Ter man Yesu Kristu, Wan u Ter, vea za hemen u tesen se erdoo u sha mhôôn, shi zungwen se mhôônom, shi nan se bem, shi wasen se u lun ken mimi man ken dooshima.

4 M ngu ember kpishi sha ci u m nenge er ônov ou mbagenev ve lu zenden ken mimi yô, vough er Ter a kaa ér se er nahan. 5 Sha nahan yô, kwase, m ngu kaan mer se doo nen ayol a ase. (Ka tindi u he m lu ngeren we ga, kpa ka u yange i wa se sha hiihii la je yô.) 6 Man kwagh u a lu dooshima yô, ka un ne: ka u se̱ za hemen u zenden er atindi a na a tese nahan. Ka tindi shon je ne, vough er yange ne ungwa sha hiihii la nahan, ér ne̱ za hemen u zenden er a tese nahan. 7 Gadia mbatsughunior kpishi due mba zenden sha tar, ka mba ve lu pasen ér Yesu Kristu va ken iyol i inyam man awambe ga la je la. Ka or u tsughun ior shon je ne, ka antikristu.

8 Wa nen ikyo sha er akaa a se er tom sha mi la aa saa ne ga, kpa ne zua a injar yen cii yô. 9 Hanma or u nan nômbo ikyôr eren kwagh ugen kposo, nan kera lu ken ityesen i Kristu ga cii yô, nan ngu vea Aôndo ga. Kpa or u nan lu ken ityesen la her yô, nan ngu vea Ter kua Wan. 10 Aluer or va hen a ven man nan va a ityesen ne ga yô, de ngohol nen nan hen uya enev ga, shi de sughun nen nan ga. 11 Kpa or u nan sughun imbaor la yô, nan ngu nyôron nongo a or shon ken aeren a nan a ifer.

12 M ngu a akaa kpishi a ngeren ne, nahan kpa m soo u ngeren a sha pipa man inki ga, kpa m ngu wan ishima u van hen a ven va lamen a ven ishigh a ishigh, sha er iember yen ia iv yô.

13 Ônov mba anmgbian wou u kwase, un u i tsough un la, mba sughun we.