Yohane

17 Yesu ôron akaa ne yô, a kende ashe sha, a kaa ér: “Tere, shighe* kuma. Ver wan wou sha ian i icivirigh, sha er wan wou kpaa una na u icivir yô, 2 gadia u na un tahav sha uuma* cii, man ka sha u a̱ na mba u ne un la cii uma u tsôron. 3 Man u̱ ve̱ zua a uma u tsôron yô, saa vea lu keren u fan we,* we Aôndo u mimi tswen, man un u u tindi la, ka Yesu Kristu je la. 4 M na u icivir shin tar ne, er m bee tom u u nem wer m er ne yô. 5 Sha nahan yô, Tere, verem sha ian i icivirigh ikyua a we, sha ian i icivirigh i yange m vande lun sha mi ikyua a we shighe u i lu a gba tar ga la.

6 “M pase iti you* hen ior mba ken tar ne mba u nem la. Yange ve lu mba ou, man u gema ve u nam, shi ve wa kwaghôron wou ikyo. 7 Hegen ve va fa er akaa a u nem la cii a dugh hen a we yô; 8 sha ci u m ôr ve akaa a u ôrom la, ve lumun a, shi ve va fa wang er i lu hen a we m dugh yô, shi ve na jighjigh ér u tindim. 9 M er msen sha ci ve; m er msen, ka sha ci u tar ga, kpa ka sha ci u mba u nem la, gadia ka mba ou je; 10 man akaa am cii ka a ou, shi a ou kpaa ka a am, shi m zua a icivir hen a ve.

11 “M ngu undun tar ne, kpa ve mba shin tar her, mo m ngu van hen a we. Icighan Ter, kura ve sha ci u iti you, i u nem la, sha er vea lu môm,* vough er se kpa se lu môm* nahan. 12 Shighe u m lu vea ve la, m kuran ve sha ci u iti you, i u nem la. M kura ve, mô ve môm kpa saa ga, saa di wan u mtim la tseegh, sha er kwagh u ruamabera a kaa la una kure sha mi vough yô. 13 Kpa hegen m ngu van hen a we, man m ngu ôron kwagh ne er m lu shin tar her ne, sha er iember yam ia iv ken a ve yô. 14 M ôr ve mkaanem ou, kpa tar kôr ve ihyom, sha ci u mba ior i tar ne ga, vough er mo kpa m lu or u tar ne ga nahan.

15 “M ngu sônon mer tôô ve shin tar kera ga, kpa mer kura ve, sha ci u iferor. 16 Mba ior i tar ne ga, vough er mo kpa m lu or u tar ne ga nahan. 17 Tsegha ve* ken mimi; ka kwaghôron wou a lu mimi ye. 18 Er u tindim shin tar nahan, mo kpaa m tindi ve shin tar. 19 Man m ngu tseghan iyol yam sha ci ve, sha er ve kpa a tsegha ve ken mimi yô.

20 “M ngu sônon ka sha ci u mban tseegh ga, kpa ka sha ci u mba vea va nam jighjigh sha ci u mkaanem vem la kpaa, 21 sha er ve cii vea lu môm, vough er we Ter u lu ken mzough vea mo, mo kpa m lu ken mzough vea we nahan, ve kpa ve lu ken mzough vea vese, sha er tar u̱ na jighjigh er i lu we u tindim yô. 22 M na ve icivir i u nem la, sha u ve̱ lu môm, vough er se lu môm nahan. 23 Sha u m̱ lu ken mzough vea ve shi we kpa lu ken mzough vea mo, sha er vea zua kpian,* nahan tar u̱ fa er u tindim shi ve doo u ishima, vough er m doo u ishima nahan yô. 24 Tere, sarem u mba u nem la ma ve lu vea mo hen ape m lu la, sha er vea nenge icivir i u nem la yô, gadia m doo u ishima je i lu a gba tar ga. 25 Ter u Perapera, tar ngu a fa u ga, kpa mo m fa u, shi mban kpa va fa er i lu we u tindim yô. 26 M pase ve iti you, shi me za hemen u pasen i kpaa, sha er vea tesen mbagenev dooshima, vough er u tesen mo dooshima nahan, shi me lu ken mzough vea ve yô.”