1 Mbakorinte

11 Hingir nen mbakaven mo,* vough er m kaven* Kristu nahan.

2 M wuese ne er ne lu umbur mo ken akaa cii, shi ne lu eren akaa er yange m tese ne la vough yô. 3 Kpa m soo mer fa nen kwagh ne: ka Kristu a lu ityough ki hanma nomsoor ye, nomsoor di gema ngu ityough ki kwase, Aôndo gema ngu ityough ki Kristu. 4 Hanma nomsoor u nan lu eren msen shin nan lu ôron kwaghôron u profeti man nan cir kwagh sha ityou yô, nan ngu heen un u a lu ityough ki nan la; 5 kpa hanma kwase u nan lu eren msen shin nan lu ôron kwaghôron u profeti man nan cir kwagh sha ityou ga yô, nan ngu heen or u nan lu ityough ki nan la, gadia ka inja vough er nan ngu kwase u i hondo nan ityough nahan. 6 Gadia aluer kwase ngu cirin kwagh sha ityou ga yô, nana̱ tôndo ase ice i nan kpaa; kpa aluer ka kwagh u ihyeenegh u kwase tôndon ice i nan shin hondon ityough yô, nana̱ cir kwagh sha ityou.

7 Nomsoor nana̱ de cirin kwagh sha ityou ga, gadia nan ngu ibyeen i Aôndo shi nan ngu sha ci u icivir na, kpa kwase gema ngu sha ci u icivir i nomsoor. 8 Gadia ka nomsoor a due ken kwase ga, kpa ka kwase a due ken nomsoor ye. 9 Shi kwagh ugen yô, i gba nomsoor sha ci u kwase ga, kpa i gba kwase sha ci u nomsoor. 10 Ka nahan man i gbe u kwase nana lu a ikyav i utaha sha ityou, sha ci u mbatyomov ye.

11 Heela tseegh ga, ken Ter yô, kwase a lu ga nomsoor a lu ga, shi nomsoor a lu ga kwase a lu ga. 12 Gadia er i lu iyol i nomsoor i er kwase a mi nahan, kape kwase kpaa ka nan mar nomsoor je la, kpa gema ka Aôndo a gbe akaa cii ye. 13 Kaa nen ase: Doo u kwase nana eren msen hen Aôndo a u cirin kwagh sha ityou shio? 14 Sha gbaaôndo je kpa, nomsoor ka nana̱ ume ityough i lu nan kwagh u kunya gaa? 15 Kwase ka nana̱ ume ityough i gema i lu nan kwagh u icivirigh gaa? Gadia i na nan ice ér i lu nan kwagh u cirin sha ityou. 16 Nahan kpa, aluer or soo u nyiman kwagh ne sha ci u aeren a ityôô agen doo nan yô, se yô se mba a ieren igen kposo ga, shi atôônanongo a Aôndo kpa nga a ieren igen kposo ga.

17 Kpa er m lu ôron akaa ne nahan, m ngu wuese ne ga, gadia mbamkombo enev ka ve wase ne keng ga, kpa mba hembe nan ne ishimavihin. 18 Hiihii yô, m ungwa mer, zum u ka nea za mkombo u tiônnongo yô, mbampav ve lu hen atô wen. Man m wa nan jighjigh a kwagh la. 19 Gadia ka keng iniongo ia pav hen atô wen, sha er ne mba i lumun ne la kpa ne due ken igbar yô.

20 Ka nea kohol ijiir i môm yô, i lu sha u yan Kwaghyan u Ter u Aikighe la keng ga. 21 Gadia ka a̱ kuman u ne ya yô, ne mbagenev ne vande yan kwaghyan wen u aikighe kera, nahan mbagen ve lu ijen, mbagen ve gema ve hunden msôrom. 22 Ne mba a uya mba ne ya kwagh shi ne ma kwagh her gaa? Shin ne mba lahan tiônnongo u Aôndo, geman heen mba ve lu a kwagh ga laa? M̱ ôr a ven mer nyi? M̱ wuese nee? Sha ingin yô, m wuese ne ga.

23 Gadia kwagh u m ngohol hen Ter la, ka un m tese ne ye, mer, hen tugh mbu lu u a tee Ter Yesu la, a tôô kpenberedi, 24 eren msen* yô, a coon, a kaa ér: “Ngun tile sha ityough ki iyol yam, i i lu sha ci wen ne. Eren nen kwagh ne sha u umbur mo.” 25 Shi a tôô kôôpu u* wain kpaa, a er nahan, zum u ve ya kwaghyan u aikighe la kera yô, a kaa ér: “Wain u shin kôôpu* ne tile sha ityough ki ikyuryan i he i sha awambe a am. Eren nen kwagh ne hanma shighe u ne lu man wain* sha u umbur mo yô.” 26 Gadia hanma shighe u ne lu yan beredi ne shi ne lu man shin kôôpu* ne yô, ka ku u Ter ne lu yôôn ye, zan zan una kar van.

27 Sha nahan yô, hanma or u nan ye beredi la, shin nan me wain u shin kôôpu* la, man nan kom u eren nahan ga yô, nana kpela iyugh sha kwagh u iyol man awambe a Ter. 28 Or nana̱ hii tôvon iyol i nan nana̱ nenge ér nan kuma, cii ve nana ya beredi la shi nana ma wain u shin kôôpu* la ye. 29 Gadia or u nan lu yan shin man, kpa nan kav er kwagh la a til sha ityough ki iyol i Ter ga yô, nan ngu yan shi man, haan iyugh sha iyol i nan. 30 Ka nahan ve mbagenev kpishi ken a ven ve taver ga shi ve lu uange, shi mbagenev kpishi ve kpe ye.* 31 Kpa aluer se kav kwagh u se ayol a ase se lu la yô, a ôr se ijir ga. 32 Nahan kpa, ka sea er nahan ga yô, i ôr se ijir, Yehova* a kôôm se, sha er a tsaha se a tar ne imôngo ga yô. 33 Nahan yô, anmgbianev av, shighe u ne kohol imôngo sha u yan kwagh ne yô, kegh nen mbagenev. 34 Aluer ijen kôr or yô, nana ya kwagh ken ya, sha er ne va kohol imôngo kpa a ôr or ijir ga yô. Kpa akaa agen a a shi la yô, me va tsô me nenge sha mi.