Mbaheberu

3 Sha nahan yô, ne anmgbianev mba ne lu uicighanmbaiorov, ne lu ken mba i yer* ve u yemen sha la, hen nen zulee sha kwagh u Yesu, un u se lumun* ser ngu apostoli man pristi u vesen la. 2 Yange lu eren kwagh sha mimi a Un u tsua un la, vough er Mose kpa er ken ya u Un shon la nahan. 3 Gadia i nenge un ér a* hemba Mose icivir, sha ci u or u nan maa ya la ka nan hemba lun a icivir a ya u nan maa la. 4 Jighilii yô, hanma ya cii ka or ka nan maa ye, kpa un u a maa akaa cii la ka Aôndo. 5 Yange Mose lu ortom u jighjigh ken ya u Un shon la jimin cii; kwagh ne lu shiada sha akaa a yange lu u a va ôr kwagh u a la, 6 kpa Kristu yô lu wan u jighjigh u nengen sha ya u Aôndo. Man ka se se lu ya Na ye, aluer mimi je se za hemen u ôron kwagh a ishima i gbar gbar, shi se mba a ishimaverenkeghen i se lu tan ave vanger a mi la her taveraa zan zan mkur yô.

7 Sha nahan yô, vough er icighan jijingi a kaa nahan, “Nyian ne, aluer ne ungwa imo na yô, 8 de cighir nen asema er sha shighe u uter enev mba tsev lu eren akaa a nan mo ishimavihin tsung la nahan ga, er sha iyange i ve lu karen mo ken taaikyôngo, 9 ape ve lu karen mo shi bamem mo, shin er ve nenge ityom yam zan zan anyom 40 nahan je kpaa la. 10 Ka nahan ve kwagh u kov la yange ndôhôr mo ishima, m ôr kwagh ne ye, mer: ‘Ve zer tsumen ken asema a ve gbem, ve fa igbenda yam ga.’ 11 Nahan ishima vihim, m bum mer: ‘Vea nyôr ken mmem wam ga.’”

12 Anmgbianev, wa nen ikyo sha er mô wen môm nana undu Aôndo u uma la nana hingir u lun a boshima u banen a jighjigh u nan ga yô. 13 Kpa za nen hemen u taver hanma wen ishima hanma iyange, er shighe u i yer ér “Nyian” la a lu her ne, sha er mô wen nana hingir u cighir ishima sha tahav mbu tsughun or mbu isholibo i lu a mi la ga yô. 14 Gadia se hingir mba va zuan a kwar vea Kristu imôngo, aluer se mba a vangertiôr u yange se lu a mi sha hiihii la her taveraa zan zan mkur yô. 15 Ka er i kaa nahan, ér: “Nyian ne, aluer ne ungwa imo na yô, de cighir nen asema er sha shighe u uter enev mba tsev lu eren akaa a nan mo ishimavihin tsung la nahan ga.”

16 Gadia ka unô yange ve ungwa cii kpa shi ve na ishima vihi un tsung-nu? Jighilii yô, ka mba yange ve due ken Igipiti sha ikyev i Mose la cii gaa? 17 Heela tseegh ga, lu unô kwagh ve ndôhôr Aôndo ishima zan zan anyom 40? Lu mba ve er isholibo, mba ikyom ve saa ken taaikyôngo la gaa? 18 Man lu unô yange bum ér vea nyôr ken mmem na ga? Lu mba ve hemba ato la gaa? 19 Nahan se nenge er yange ve fatyô u nyôron ker ga sha ci u ve ban a jighjigh u nan yô.