Mbaheberu

8 Nahan kwagh u vesen ken kwagh u se lu ôron yô, ka un ne: Se mba a imba pristi u vesen ne, a tema ken uwegh ku yanegh ku ikyônough ki torough ki Aôndo u Icivirigh sha, 2 ka ortom u ken icighanjiir man u ken tenti u mimi u i lu Yehova* a er, i lu or ga la. 3 Gadia hanma pristi u vesen yô, ka i ver nan sha u nana̱ eren tom u nan uiyua kua iniav cii; nahan gba keng u ngun kpa una lu a kwagh u nan. 4 Luun er ngu shin tar yô, ma a lu pristi ga, gadia ior mba, mba ve lu vanden eren tom u nan uiyua er Atindi a tese la yô. 5 Icighantom u ior mban ve eren la ka ikyav man mure u akaa a sha. Ka vough er kwagh u Aôndo ôr a Mose zum u kuma u una er tenti la a tese nahan: Gadia A kaa ér: “Ver ishima er hanma kwagh a̱ lu er i tese u sha uwo nahan.” 6 Kpa hegen Yesu ngohol tom u u hembe doon cii yô, sha ci u un kpa ngu orhimen u ikyuryan i hemban doon cii; yange i va a ikyuryan ne sha tindi, shi i ya i̱ sha uityendezwa mba hemban doon cii.

7 Luun er ikyuryan i hiihii la ngi a mshi sha mi ga yô, ma i kera gbe u a ya ikyur i sha uhar ga. 8 Gadia ngu zuan nongoior la a ibo, sha ci u a kaa ér: “‘Nenge! Ayange nga van a me ya ikyur i he a ya u Iserael man a ya u Yuda yô,’ kape Yehova* a kaa la; 9 ‘ia lu er ikyur i yange m ya a uter vev mba tsev sha iyange i m kôr ve uwegh sha u duen a ve ken tar u Igipiti kera la nahan ga, sha ci u ve gbihi ikyuryan yam, nahan m de u wan ve ikyo,’ kape Yehova* a kaa la.

10 “‘Gadia ka ikyuryan i me ya a ya u Iserael zum u ayange la aa kar kera je ne,’ kape Yehova* a kaa la. ‘Me wa atindi a am ken mhen ve, shi me nger a ken asema a ve. Me hingir Aôndo ve, ve di vea hingir ior av.

11 “‘Shi mô ve nana kera tese ma or u hen tar u nan shin anmgbian u nan, nana kaa ér: “Fa Yehova!”* ga. Gadia ve cii vea fam, mbakiriki kua mbavesen ken a ve. 12 Gadia me zungwe ve mhôônom sha akaabo a ve, shi mayange me kera umbur asorabo a ve ga.’”

13 Er a kaa ér ka “ikyuryan i he” yô, a er ikyuryan i tsuaa la hingir i tse. Nahan kwagh u a ye tsegh shi a lu been iyol yô, sôôn karen kera.