2 Mbatesalonika

2 Nahan kpa, anmgbianev, sha kwagh u shighe u Ter wase Yesu Kristu una lu vea vese man er a kohol se cii se za lu vea na imôngo la yô, se mba kaan a ven ser, 2 aluer ior mba kaan ér iyange i Yehova* zurum kpa, de hingir nen tenge tenge ga. Aluer mba kaan ér loho la due hen Aôndo,* shin ve ôr ken ma washika u ve kaa ér ka se se nger je kpa, ishima i̱ de te ne kwe ga.

3 De deen nen or a̱ tsumen a ven sha ma gbenda môm ga, sha ci u iyange la ia va ga, saa mbaundun mcivir u mimi vea hii van, shi or u vendan atindi una due ken igbar, ka wan u mtim je la. 4 A tile sha u hendan kwagh, shi a kende a iyol na sha hemba hanma kwagh u ior ve senge ér ka aôndo shin hanma kwagh u i civir cii, nahan a tema ken tempel u Aôndo, ngu tesen ken igbar ér un ngu aôndo. 5 Ne umbur er shighe u m lu vea ven her la, m ôron ne akaa ne gaa?

6 Man hegen ne fa kwagh u a lu yangen un u duen ken igbar cii man shighe u i ver un la yô. 7 Ka mimi, ieren i vendan atindi ne ngi vanden zan hemen kera je, kpa ia lu myer zan zan saa un u a lu yangen i̱ hegen la una va kar kera. 8 Ka hen shighe la je or u vendan atindi la una due ken igbar ye, un u Ter Yesu una bee a na sha, sha iôôn i* sha zwa na, shi una tim un kera sha shighe u ikyav ia tese wang ér Yesu ngu vea vese imôngo la. 9 Kpa or u vendan atindi la una va due ken igbar a tahav mbu Satan, una er ityom i ageegh kpishi shi una er uivande mbaaiev man akaa a kpilighyol 10 kua hanma inja ifer cii sha u tsughun mba ve lu timin la, ka injar i a kimbi ve je la, sha ci u ve ngohol mimi u ma a wase ve u waren la ga, a doo ve ishima kpaa ga. 11 Ka nahan ve Aôndo a de ér i tsume a ve sha ityesen i aiegh sha u ve̱ na aie jighjigh, 12 sha er ve cii a va ôr ve ijir ye, gadia ve na mimi jighjigh ga, kpa gema saan ve iyol a kwagh u ifer.

13 Kpa se yô, gba u se sughun Aôndo hanma shighe sha kwagh wen, ne anmgbianev mba doon Yehova* ishima, sha ci u sha hiihii la je Aôndo tsua ne sha u ne va zua a myom, a tsegha ne sha jijingi na man sha jighjigh u ne ne mimi la. 14 A yila ne sha u ne̱ zua a myom la sha loho u dedoo u se yôôn ne, sha er ne zua a iengem i Ter wase Yesu Kristu la yô. 15 Nahan yô, anmgbianev, tile nen dông, za nen hemen u dondon akaa a i tese ne la, yange a̱ ôr ne a sha zwa shin a̱ lu ken ma washika u a due hen a vese je kpaa. 16 Shi Ter wase Yesu Kristu iyol na man Aôndo Ter wase u se doo un ishima shi a ne se ishimasurun i been mayange ga kua ishimaverenkeghen i dedoo sha erdoo u sha mhôôn la, 17 a̱ sur ne asema, shi a̱ na tile nen dông sha* hanma ieren man kwaghôron u dedoo cii.