2 Mbakorinte

1 Mo Paulu, i yilam ér m lu apostoli u Kristu Yesu sha ishima i Aôndo, m ngu vea anmgbian wase Timoteu, m ngu ngeren washika ne hen tiônnongo u Aôndo u ken Korinte, kua hen uicighanmbaiorov mba ve lu ken Akaya cii:

2 Aôndo Ter wase kua Ter Yesu Kristu ve̱ tese ne erdoo u sha mhôôn shi ve̱ na ne bem.

3 I̱ wuese Aôndo, Ter u Ter wase Yesu Kristu, un ka Ter u lun a mhôônom ma zungwen tsung man Aôndo u lun a ishimasurun cii, 4 u a surun* se asema ken ameen* a se tagher a mi cii, sha er se fatyô u surun mbagenev asema ken nyityô imeen* cii, sha ishimasurun i Aôndo a nan se la yô. 5 Gadia er se lu yan atsan kpishi sha kwagh u Kristu nahan, kape ishimasurun kpa se lu zuan a mi kpishi ken Kristu je la. 6 Nahan, aluer se mba tagher a ameen* yô, ka sha u ne̱ zua a msurshima man myom; man aluer mba surun se asema yô, ka sha u ne̱ zua a msurshima, u ka a wase ne u wan ishima a atsan a se kpa se lu yan la. 7 Man ishimaverenkeghen i se lu a mi sha kwagh wen la ka i tenger ga, sha ci u se fa ser, er ne kpa ne lu yan atsan nahan, shi kape ne kpa a sur ne asema vough je la.

8 Gadia, anmgbianev, se soo ser ican i yange se tagher a mi ken tiôntar u Ashia la ma i lu mlan hen a ven ga. Yange se ya ican je gande agee a ase ken inya, je yô, se kera fa mwar wase ga kuaa. 9 Jighilii yô, lu se er i kure se ijir ér i̱ wua se nahan. Yange lu nahan sha er se suur sha ayol a ase ga, kpa se suur sha Aôndo u a nderen mbakpenev la yô. 10 Yange war se hen shighe u i nôngo u wuan se la, shi hegen kpa una war se, shi se mba a ishimaverenkeghen ser una za hemen u waren se. 11 Ne kpa ne fatyô u wasen se sha u eren msen zamber sha ci wase, sha er ior kpishi vea sugh Aôndo sha ci wase, sha iwasen i se lu zuan a mi sha mbamsen mba ior kpishi ve eren la yô.

12 Gadia kwagh u se lu tan ihyagh a mi yô, ka un ne: Imoshima yase ngi eren shiada ér se mba eren kwagh wang man sha mimi u Aôndo ken tar ne, hemban je yô hen atô wen, man ka sha kwaghfan wase ga, kpa ka sha erdoo u Aôndo a tesen se sha mhôôn la. 13 Jighilii yô, se mba ngeren ne washika ne ka sha ma kwagh ugen kposo ga, kpa ka kwagh u ne fatyô u ôron* shi kaven yô, shi m na jighjigh mer ne za hemen u kaven akaa ne vindi vindi,* 14 vough er ne pande ne fe ner se hingir ne kwagh u tan ihyagh a mi nahan, se kpa ne va lu se kwagh u tan ihyagh a mi sha iyange i Ter wase Yesu.

15 Nahan er m lu a vangertiôr ne yô, yange m lu wan ishima mer me hii van hen a ven, sha er ne zua a ian i ember sha kwa har yô;* 16 gadia yange m lu a awashima u van hen a ven zum u me karen u zan ken Masedonia yô, shi lu u me za mough ken Masedonia me nguren hiden yô, me kar hen a ven, maa ne verem gbenda me mase yemen ken Yudia. 17 Nahan, zum u m wa ishima u eren kwagh ne la, m nenge kwagh shon beelee shinii? Shin m henen kwagh sha inja i or ve me kaa mer “Een” sha kwagh u m we ishima u eren, shi me gema zwa mer “Ei” yee? 18 Er Aôndo a lu u mimi nahan, kape kwaghôron wase kpa a lu u mimi je la; se fatyô u kaan ser “een,” shi hiden kaan ser “ei” ga. 19 Gadia Yesu Kristu, Wan u Aôndo u mo man Sivanu* kua Timoteu yange se pase ne kwagh na la, kaan ér “een” shi hiden kaan ér “ei” ga, kpa “een” na una lu “een” her. 20 Gadia uityendezwa mba Aôndo vea̱ ngee nan nan kpa, ve hingir “een” sha a na. Ka nahan ka sea ôron kwagh a Aôndo ve, se kaa ser “Amen” ken iti na ye, sha er se na Aôndo una zua a icivir yô. 21 Kpa un u a bum a vese ér se man ne cii se mba kwagh u Kristu, shi a tsegha* se la, ka Aôndo. 22 Heela tseegh ga, a ver se ikyav na ken asema a ase, shi a na se jijingi na, ka ibumun i kwagh u a lu van la.

23 Nahan, m ngu a va ken Korinte ga ka sha ci u iwasen yen, m ôr kwagh ne ka sha ishigh ki Aôndo je. 24 Fa nen ner se ya tor* sha kwagh u jighjigh u nan wen ga, kpa se mba mbaeren tom a ven imôngo sha u ember nen yô, gadia ne tile ka sha jighjigh u nan wen.