1 Mbakorinte

5 Jighilii yô, m ungwa mer orgen ken a ven nan ngu eren idya,* man ka idya* i ken akuraior a a fe Aôndo ga je kpa i eren ga yô—nan ngu tsan a kwase u ter u nan. 2 Nahan kwagh shon doo nee? Ma ne lu zungwen a zungwe, sha er a kar a or u nan er isholibo la hen atô wen kera ga zee? 3 Shin er m lu hen atô wen ga nahan kpa, m ngu a ven ken jijingi, shi m ôr or u a er kwagh ne la ijir, er m ngu her kpôô kpôô nahan. 4 Shighe u ne kohol imôngo ken iti i Ter wase Yesu, man ne fe ner m ngu vea ven ken jijingi kua sha tahav mbu Ter Yesu yô, 5 na nen imbaor la sha ikyev i Satan keng keng, sha er a tim isharen i iyolough i nan la kera, a gema a kura mhen u mba ken tiônnongo la zan zan sha iyange i Ter yô.

6 Ihyagh yen la doo ga. Ne fa er ankwa u cuku kpa ka a na ijenmwe jimin cii i ange gaa? 7 Nahan kar nen a kwa la kera, sha er ne lu ijenmwe i he yô, gadia ne mba er ijenmwe i i we kwa sha mi* ga nahan. Gadia i na nagh sha Kristu, u a lu waniyôngo wase u Paseka la. 8 Sha nahan yô, se za nen hemen a iniongo i ka i dondo* la, kpa i de lu sha ijenmwe i tse i i we kwa sha mi la ga, shin sha kwa u bo man u ifer kpaa ga, kpa i lu sha beredi u i we kwa sha mi ga yô, ka perapera man mimi je la.

9 Ken washika u yange m nger la, m kaa mer de nen u lun imôngo vea mbadyarev,* 10 kpa u ngu wer m lu kaan mer lu nen paleghaa a ior mba ken tar, mba ve eren idya la kuaa ga, shin mbawan hua shin mbanumungbenda shin mbacivir ieev kpaa ga. Aluer ka nahan yô, a gba u ne due ken tar ne kera di je. 11 Kpa hegen m ngu ngeren ne mer, de nen u lun imôngo a or u i yer nan ér anmgbian, kpa nan gem nan lu or u eren idya* shin or u wan hua shin or u civir eev shin or u tuhwan ior* shin or u hunden msôrom shin or u numun gbenda yô, shi kwaghyan tsô kpa de ye nen imôngo vea imbaor la ga. 12 Gadia ka nyi i gbem u ôron mba ken won ijiri? Ka mba kimi mbara ne ôron ve ijir gaa? 13 Gema ka Aôndo a ôron mba ken won mbara ijir ga zee? “Dugh nen iferor la hen atô wen kera.”