Mbafilipi

3 Nahan, anmgbianev av, za nen hemen u ember ken Ter. Kam zayol u shi ngeren ne kwagh sha akaa a yange m vande ngeren ne kwagh sha mi la ga, man ka sha u kwaghbo a̱ de tseren ne ga yô.

2 Wa nen ikyo sha kwagh u ior mba ve eren kwagh er ka aniwaav* la; wa nen ikyo sha kwagh u mba ve eren ior akaa a nyoon la; wa nen ikyo sha kwagh u mba ka ve tôndo or ivav sha u tsôngon nan la. 3 Gadia ka se i tsôngo se jim jim ye, se mba se lu eren icighantom sha jijingi u Aôndo shi se lu kaan ihyagh sha kwagh u Kristu Yesu, se lu suur sha iyol ga ne. 4 Jighilii yô, m ngu a atôakyaa a kaan ihyagh sha iyol kpaa.

Aluer or hen ér nan ngu a atôakyaa a kaan ihyagh sha iyol yô, mo m hemba ngun a mi cii: 5 i tsôngom sha iyange i sha anigheni, m due ken ikyurior i Iserael, ken ipyaven i Benyamin; m ngu Orheberu, mbamaren av lu Mbaheberu; sha kwagh u atindi yô, m lu Orfarishi; 6 sha kwagh u ishima i tseen kpa, yange m tôv tiônnongo* a ican; hide sha kwagh u perapera u a har sha atindi a kuran la kpa, m tese mer m ngu a acôghor ga. 7 Nahan cii kpa, akaa a yange lum a mtsera la, kera ngam a mtsera ga,* sha ci u Kristu. 8 Ka cii la ga, jighilii yô, m nenge akaa cii kera ngam a mtsera ga, sha ci u mfe u hemban cii, u sha kwagh u Terem Kristu Yesu la. Gadia ka sha ci na m te akaa cii kera ye, m nenge a mer ka ihyôghonov* dang, sha u Kristu a lu mtsera wam 9 shi me lu ken mzough vea na yô, ka sha ci u m ngu orperapera sha Atindi a kuran ga, kpa ka sha ci u perapera u a har sha u nan Kristu jighjigh la, ka perapera u or ka nana̱ na jighjigh ve Aôndo a nenge nan ér nan ngu orperapera la. 10 Awashima wam yô, ka u fan un kua tahav mbu Un u yange nder un shin ku la, shi yan atsan a un kpa yange ya la, shi lumun u kpen imba ku i yange kpe la, 11 sha u me nenge aluer ka u me fatyô u aren sha ian i va lun ken mba a va vande nderen ve shin ku tsuaa mbara yô.

12 U ngu wer m zua a iyua la shin i erem m hingir or u vough kera ve ga, kpa m ngu nôngon sha afatyô wam cii mer me nenge aluer ka u me fatyô u zuan a iyua i Kristu Yesu a tsuam* ér m va zua a mi la kpaa yô. 13 Anmgbianev, mo yô, m nenge mer m ngu a zua a iyua shon ve ga; kpa kwagh u a lu jighilii yô, ka un ne: Er m hungur a akaa a ken ijime, m lu nalegh sha u me zua a akaa a ken hemen yô, 14 m ngu nôngon sha afatyô wam cii mer me ar sha ian i va zuan a iyua i yemen sha, i Aôndo a lu yilan se sha mi ken Kristu Yesu la. 15 Sha nahan yô, se mba se vie yô, se henen nen sha akaa a m ter ne kwagh sha mi ne, man aluer ne mba henen kwagh sha ma gbenda ugen kpa, Aôndo una wase ne u henen kwagh sha gbenda ne. 16 Nahan, sea za ikyura nan nan kpa, se za nen hemen u zenden sha inja sha inja sha gbenda ne.

17 Anmgbianev, ne cii lu nen mba kaven mo, shi nengen nen ken mba ve lu zenden sha inja i mba dondon ikyav i se ver ne la. 18 Gadia ior mba kpishi—ka m zer teren kwagh ve, hegen kpa m ngu teren kwagh ve a mliam ashe je—mba ve lu zenden sha gbenda u mba mbahyomov mba sha kwagh u ku u Kristu kpe sha kon* la yô. 19 Mkur ve ka mtim, shi aôndo ve ka iyav vev, shi ka akaa a ve eren, a kunya ma u ker ve sha mi la, ka ve gema ve kaan ihyagh a mi ye, shi ishima ve ngi sha akaa a taregh. 20 Kpa se yô, se mba ior i tar u sha, shi se mba veren ashe keghen oryiman u una due sha una va la, ka Ter wase Yesu Kristu je la, 21 una va gema iyol yase i i gbe kwagh ga ne ia hingir er* iyol na i i lu a icivir la nahan, sha tahav nav mbu kpilighyol, mbu a lu geman akaa cii hingir sha ikyev na la.