Mateu

21 Mba va zurum hen Uwo u Olev, ikyua a Betefeji man Yerusalem yô, Yesu tindi mbahenen nav uhar. 2 A kaa a ve ér: “Za nen hen angar u a lu se sha hemen ne, ne za nyôron ker je maa ne nenge a ngôjaki, i zer un ngu vea wan na. Sagh nen ve, vam nen a mi. 3 Aluer or pine ne kwagh yô, kaa nen ner, ‘Kwagh gba Ter a ve.’ Nahan fese je nana de ne, ne va a ve.”

4 Kwagh ne er nahan sha u kuren kwagh u yange i ôr sha ikyev i profeti la, ér: 5 “Kaa wankwase u Shion* wer: ‘Nenge, Tor wou ngu van, ngu ishima legh legh, a henda jaki, man ka wanjaki, zendenya u tôôn ikyav.’”

6 Nahan mbahenen mba Yesu za er vough er a kaa ve nahan. 7 Ve za va a ngôjaki la vea wan na, tsô ve tar akondo a ve a haan iyol sha ujaki mbara, maa Yesu tema sha wanjaki la. 8 Ior kpishi ken ikpelaior la gema akondo a ve a haan iyol tar sha gbenda, mbagenev lu tôndon ahu a ikyon taren sha gbenda. 9 Shi ikpelaior i i lu zan un sha hemen man i i lu van un ken ijime la cii lu ôron genger genger ér: “Ma u yima* wan u Davidi! Saan un u a ve ken iti i Yehova* la iyol! Ma u yima un, we u u lu sha usha mba hemban gban ica la!”

10 Za nyer ken Yerusalem yô, gar cii num, ior lu pinen ér: “Ka an nee?” 11 Ikpelaior i i lu vea na la lu kaan ér: “Ka profeti Yesu je ne. A due ken Nasareti u Galilia!”

12 Yesu za nyer ken tempel yô, a zenda mba ve lu teen akaa ker kua mba ve lu yamen akaa la cii ve due kera. Shi a daa utebul mba mbamusaninyaregh kua akaateman a mba ve lu teen mkungum la cii, gba. 13 A kaa a ve ér: “I nger ér, ‘A yilan iyou yam ér iyou i msen,’ kpa ne mba nan ner i hingir iyou i mbaiv.” 14 Shi mbaapirashe kua mbaawanev kpa va hen a na ken tempel, nahan a bee ve cii uzayol mban.

15 Zum u upristi mba tamen man mbangerenatindi nenge akaa a kpilighyol a a er la, kua er mbayev mba nomso lu ôron ken tempel genger genger ér, “Ma u yima* wan u Davidi!” yô, ishima vihi ve ker, 16 ve kaa a na ér: “U ungwa kwagh u mban ve lu ôron la kpa?” Yesu gema kaa a ve ér: “Een. Ne ôr kwagh u i nger ér, ‘U na mbayev mba kiriki man anikyundanev vea wuese we sha zwa ve’ la gaa?” 17 Tsô a undu ve her, a kar a due ken gar la, a yem ken Betani, a za tsa ker.

18 Ngur hiden ken gar la pepe pepe yô, ijen kôr un. 19 Tsô a nenge a kon u tur hen kpegbenda, maa a kar a za her, kpa a zua a ityamegh sha mi ga, lu ahu tseegh. Nahan a kaa ér: “U kera ume ityamegh mayange ga.” Kon u tur la maa uma her ave ave je. 20 Mbahenen mba nengen kwagh ne yô, kpilighyol ve iyol, ve kaa ér: “Er nan ve kon u tur la u om ave ave nahana?” 21 Yesu kaa a ve ér: “Mimi je me kaa ne, aluer ne na jighjigh shi ne ta akperan ga yô, ne er kwagh u m er a kon u tur ne tseegh ga, uwo ne je kpa, aluer ne kaa a u ner, ‘Môugh za gba shin zegemnger,’ kpa ua môugh a za gba. 22 Man hanma kwagh u ne er msen ne sôn cii, aluer ne na jighjigh yô, a na ne.”

23 Nyer ken tempel yô, upristi mba tamen man mbatamen mba nongoior la va hen a na zum u lu tesen yô, ve va pine un ér: “Ka sha tahav mbu nyi u eren akaa nee? Man ka an nan ne u tahav mbunu?” 24 Yesu gema kaa a ve ér: “Mo kpa me pine ne kwagh môm. Aluer ne ôrom yô, mo kpa me ôr ne tahav mbu m eren akaa ne a mi la: 25 Ka an yange nan tindi Yohane ér a er ior batisema? Lu Aôndo u a lu sha la, shin lu ioro?” Kpa ve gba henen ker ayol a ve kaan ér: “Aluer se kaa ser, ‘Lu Aôndo’ yô, una pine se ér, ‘Tsô er nan yange ne na Yohane jighjigh ga?’ 26 Kpa aluer se kaa ser, ‘Lu ior’ yô, ikpelaior ne ia mough ayôôso a vese, sha ci u ve cii ve nenge Yohane ér ka profeti.” 27 Maa ve kaa a Yesu ér: “Se fa ga.” Yesu kpa kaa a ve ér: “Nahan mo kpa me ôr ne tahav mbu m eren akaa ne a mi la ga.

28 “Ne nenge nena? Orgen lu a ônov uhar. A za kaa a u hiihii la ér, ‘Wan wam, yar ken sule u wain nyian.’ 29 Wan la gema kaa a na ér, ‘Me yar ga,’ kpa va hide vaa afanyô sha kwagh u ôr la, maa due yar. 30 Shi a kar a za hen wan na u sha uhar la, a za ôr un kwagh shon môm. Ngun kaa a na ér, ‘Baba, me yar,’ kpa a kera yar ga. 31 Ken ve mba uhar mban, ka u han a er ishima i ter naa?” Ve kaa ér: “Ka u hiihii la.” Yesu gema kaa a ve ér: “Mimi je me kaa ne, mbangoholkpandegh man mbaagbaga vea vande nyôron ken Tartor u Aôndo a ven. 32 Gadia Yohane yange va hen a ven, lu tesen ne gbenda u perapera, kpa ne na un jighjigh ga. Mbangoholkpandegh man mbaagbaga yô, na un jighjigh. Kpa ne yô, shin er ne nenge akaa ne nahan je kpa, ne hide ne vaa afanyô, ne na un jighjigh ga.

33 “Ungwa nen injakwagh igen: Orgen lu a inya, nahan a er sule u wain. A wa u igyar ningir tser, shi a time ihyungwa i shoghor wain shi a maa iyou i taven gôgônan ker. Tsô a gema u a wa mbatomov sha ikyev, a mough a yem zende ken tar u icaa. 34 Ka va kom shighe u zôron wain yô, a tindi ikpan na hen mbatomov mbara, ér ve̱ za ngohol atam a wain a a lu a na la. 35 Kpa mbatomov mbara kôr ikpan la, gbidye u môm, wua ugen, ugen la di ve ta un awen. 36 Shi a tindi ikpan igen hemba ngeen a i hiihii la; ingin kpa ve er a i di nahan. 37 Ken masejime yô, a tindi wan na u nomso hen a ve, a kaa ken ishima na ér: ‘Wan wam yô, vea na un icivir.’ 38 Mbatomov mbara mba nengen a wan la yô, ve gba kaan ker ayol a ve ér, ‘Ngun ka wan u una va ya dyako je ne. Va se wua un nen se ngohol nen dyako na la!’ 39 Tsô ve kôr un ve due a na ken sule u wain la, ve za wua un. 40 Nahan zum u or u a lu a sule u wain la una va yô, una er a mbatomov mbara nena?” 41 Ve kaa a na ér: “Er ve lu aferaior yô, una tim ve sha ku u nyoon tsung,* una gema sule u wain la una wa sha ikyev i mbatomov mba vea naan un atam a wain sha shighe vough yô.”

42 Yesu kaa a ve ér: “Ne ôr ken Ruamabera gaa? I nger ér, ‘Iwen i mbamaankwagh ve vende i la, i hingir iwen i hange hange i sha zongough ku iyoughough. Kwagh ne due ka hen Yehova,* man ka kwagh u kpilighyol sha ashe ase.’ 43 Ka nahan ve m lu kaan a ven mer a ngohol Tartor u Aôndo hen a ven kera, a gema a na ikyurior igen i ia ume atam ye. 44 Shi or u nan gbe sha iwen ne yô, nana sombo vughô vughô. Man or u iwen ne i gbe sha a nan yô, ia njighe nan a njighe.”

45 Upristi mba tamen man Mbafarishi mba ongo anzaakaa a Yesu ôr la yô, ve kav er lu ve je lu ôron yô. 46 Nahan ve soo u kôron un, kpa ve cia ikpelaior, sha ci u ikpelaior la nenge ér ngu profeti.