1 Yohane

5 Hanma or u nan ne jighjigh ér Yesu ka Kristu cii yô, nan ngu wan u Aôndo, shi hanma or u Ter a doo nan ishima cii yô, ônov nav kpa ka ve doo nan ishima. 2 Ka sha kwagh ne ka se fa ser ônov mba Aôndo doo se ishima ye, ka u tesen ser Aôndo doo se ishima shi kuran atindi a na. 3 Gadia ka kwagh u se er ve se tese ser Aôndo doo se ishima je ne, ka u se kuran atindi a na; man atindi a na yuhwa ga, 4 sha ci u hanma or* u Aôndo a mar cii yô, ka nan hemba tar ne. Man ka gbenda u se hembe tar ne je ne, ka sha jighjigh u nan wase la.

5 Ka an nana fatyô u hemban tar nee? Kera ka or u nan ne jighjigh ér Yesu ka Wan u Aôndo la gaa? 6 Ka un shon ne yange va sha mngerem man sha awambe ye, ka Yesu Kristu je la; yange va a mngerem tseegh ga, kpa va a mngerem man awambe. Shi jijingi ngu eren shiada, sha ci u shiada u jijingi la ka u mimi. 7 Gadia mbaeren shiada mba utar: 8 ka jijingi man mngerem man awambe; man ve mba utar mban cii ve gba zwa môm.

9 Ka se lumun a shiada u uumace, kpa shiada u Aôndo gema hemba u uumace. Gadia ka shiada u Aôndo ka a er je ne, ka shiada u a er sha kwagh u Wan na la. 10 Or u nan ne Wan u Aôndo jighjigh yô, i er shiada la ken ishima i nan. Or u nan ne Aôndo jighjigh ga yô, nan ngu yilan Aôndo aie, sha ci u nan na shiada u a er sha kwagh u Wan na la jighjigh ga. 11 Man ka shiada shon je ne: Aôndo na se uma u tsôron, man ka ken Wan na uma la a lu ye. 12 Or u nan lu a Wan na yô, nan ngu a uma la; or u nan lu a Wan u Aôndo ga yô, nan ngu a uma la ga.

13 M ngu ngeren ne akaa ne sha u ne fa er ne lu a uma u tsôron yô, ne mba ne ne jighjigh ken iti i Wan u Aôndo la. 14 Man ka vangertiôr u* se lu a mi je ne; nyityôkwagh i se sôn Aôndo man i lu i sha ishima na cii yô, ngu a ungwa se. 15 Man aluer se fa ser ungwan se zum u se sôn un nyityôkwagh cii yô, se fa ser ka u se zua a akaa a se sôn la, er i lu hen a na se sôn yô.

16 Aluer ma or nenge anmgbian u nan ngu eren isholibo i i ze a or ken ku ga la yô, nana er msen, nahan Aôndo una na or shon uma, ka mba ve eren isholibo i i ze a or ken ku ga la je la. Isholibo ngi i ka i za a or ken ku yô. Ka sha ci u or u nan er isholibo ngila m lu kaan mer nana̱ er msen ga. 17 Hanma kwagh u a lu u perapera ga cii ka isholibo, nahan kpa, isholibo ngi i ka i za a or ken ku ga yô.

18 Se fa ser hanma or u Aôndo a mar nan cii, nan ze hemen u eren isholibo ga, kpa un u Aôndo a mar la* ka a kuran nan, nahan Iferor una fatyô u eren nan kwagh* ga. 19 Se fa se mba kwagh u Aôndo, kpa tar cii ngu sha ikyev i Iferor. 20 Kpa se fa, Wan u Aôndo va, shi a wase se* u zuan a mfe sha kwagh u un u a lu u mimi la. Man se mba ken mzough vea un u a lu u mimi la, sha ikyev i Wan na Yesu Kristu. Un ka Aôndo u mimi man uma u tsôron. 21 Mbayev av, palegh nen ieev.