Mbaroma

15 Se mba jighjigh u nan wase a taver yô, gba u se waan ishima a mbamyen mba ior mba ve taver ga la, se keren u eren kwagh u doon sha ci wase ga. 2 Hanmô wase nana eren kwagh u doon or u wan ndor a nan sha u taver nan ishima. 3 Gadia Kristu je kpa yange keren kwagh u doon sha ci na ga. Kpa, ka vough er i nger nahan, ér: “Akaa a mba lahan we ve lu ôron sha u lahan we la, hide sha a mo.” 4 Gadia akaa a i vande ngeren la cii, yange i nger a sha u se̱ zua a ityesen ker,* sha er ishimawan yase man ishimasurun i se zuan a mi ken Ruamabera la ia na se lu a ishimaverenkeghen yô. 5 Aôndo u a wasen se u wan ishima shi a surun se asema la a̱ na lu nen a mhen u Kristu Yesu kpa yange lu a mi la, 6 sha er ne civir Aôndo u a lu Ter u Ter wase Yesu Kristu la ken mzough, shi ne lu zwa môm yô.

7 Nahan yô, ngohol nen mbagenev, vough er Kristu kpa a ngohol ne nahan, sha er Aôndo una zua a icivir yô. 8 Gadia me kaa ne, Kristu yange hingir ortom u mba i tsôngo ve la,* sha er una tese er Aôndo a lu u mimi, man er uityendezwa mba yange er a uter vev la cii lu kwagh u mimi yô, 9 man sha er akuraior agen aa wuese Aôndo sha mhôônom nam ma zungwen yô. Ka vough er i nger nahan, ér: “Ka nahan man me wuese we ken igbar hen akuraior agen, shi me wa atsam a wuese iti you kpaa ye.” 10 Shi i kaa ér: “Ne ior mba ken akuraior agen, i saan ne iyol a ior nav imôngo.” 11 Shi i kaa ér: “Wuese nen Yehova,* ne akuraior cii, hanma or cii nana̱ wuese un.” 12 Shi Yesaia kaa ér: “Mise u Yese ua lu, ka un u una due sha u hemen akuraior je la; ishimaverenkeghen i akuraior ia har sha a na.” 13 Aôndo u a ne ishimaverenkeghen la a̱ iv ne a iember man bem sha jighjigh u ne ne un la, sha er ne iv a ishimaverenkeghen sha iwasen i icighan jijingi yô.

14 Anmgbianev av, m na jighjigh mer ne ayol a en kpa ne iv a aeren a dedoo, ne iv a hanma mfe cii, shi ne kuma u wan ayol a en kwagh.* 15 Nahan cii kpa, m ngu ngeren sha u pasen ne akaa agen wang, sha er me umbur ne kwagh ugen yô. Gadia Aôndo tesem erdoo na u sha mhôôn la 16 ér m lu ortom u Kristu Yesu hen akuraior agen ken igbar. Nahan m ngu eren icighantom u pasen loho u dedoo u Aôndo, sha er akuraior ne aa hingir nagh ku doon Aôndo ishima, ku i tsegha ku sha icighan jijingi yô.

17 Nahan m ngu a ityôkyaa i tan ihyagh sha ityom i Aôndo, ken Kristu Yesu. 18 Gadia me kera lam sha ma kwagh ugen u m eren ga. Kpa me ôr di kwagh u tom u Kristu a er sha ikyev yam la tseegh. A er kwagh ne sha u ior mba ken akuraior agen kpa ve̱ ungwan imo na sha mkaanem am man sha ieren yam, 19 kua sha tahav mbu eren uivande man akaa a kpilighyol, man sha tahav mbu jijingi u Aôndo. M pase loho u dedoo u sha kwagh u Kristu vighe vighe, hii hen Yerusalem je, m ningir zan zan m za ar Ilirikum. 20 Sha nahan yô, m kange ishima mer me pase loho u dedoo ape i vande pasen kwagh u iti i Kristu ga la, sha er me maa sha imaagh ki orgen nan we ga yô; 21 kpa, ka vough er i nger nahan, ér: “Mba ve zough a ibaver sha kwagh na ga la, vea nenge, mba ve ongo ga la kpaa, vea kav.”

22 Kwagh ne kpa ka ityôkyaa igen i yange na ve i yangem acin imôngo u van hen a ven yô. 23 Kpa hegen ne, haregh u m lu a pase kwagh her sha ajiir ne ga yô, ngu ga. Nahan sarem u van hen a ven kuma anyom imôngo* hegen. 24 Nahan, m ngu veren ishima mer, me va karen u zan Ishpania yô, me zua ishigh a ven, shi me lu vea ven sha anshighe kpuaa, se ember imôngo, maa ne verem gbenda, me mase yemen ker. 25 Kpa hegen yô, ka u me za ken Yerusalem me za na uicighanmbaiorov iwasen. 26 Gadia doo mba ken Masedonia man Akaya u zuan ave nan iwasen sha ci u uicighanmbaiorov mba ken Yerusalem mba ve lu ken ibanave la. 27 Sha mimi yô, ve nenge doo u vea er nahan, man jighilii yô, lu injô ve lu ve a mi ye;* gadia aluer akuraior agen zua a kwar sha akaa a ken jijingi a uicighanmbaiorov mbara yô, gba u akuraior shon kpa aa na ve iwasen sha akaa a iyolough a ve lu a mi la. 28 Nahan me zaan a iwasen ne* me za naan ve cii yô, me va hen a ven, zum u me karen u zan ken Ishpania yô. 29 Shi m fa, zum u me va hen a ven yô, me va ne a averen kpishi a m zough a mi hen Kristu yô.

30 Yô, anmgbianev, m ngu zamber a ven ken iti i Ter wase Yesu Kristu kua sha dooshima u a lu hen atô wase sha iwasen i jijingi u Aôndo la mer, nôngo nen tsung wasen nen mo u eren msen hen Aôndo, sha ci wam, 31 sha er a yimam sha ikyev i mbanan jighjigh ga mba ken Yudia, shi uicighanmbaiorov vea lumun iwasen i m lu za nan ve ken Yerusalem la yô, 32 sha u Aôndo a̱ lumun yô, me va hen a ven, se va ember imôngo shi se zua a ishimataver yô. 33 Aôndo u ka a na bem la a lu a ven cii. Amen.