Marku

12 Tsô a gba ôron ve kwagh sha anzaakaa, a kaa ér: “Orgen er sule u wain, nahan a wa u igyar ningir tser, shi a time ihyungwa i shoghor wain shi a maa iyou i taven gôgônan ker. Tsô a gema u a wa mbatomov sha ikyev, a mough a yem zende ken tar u icaa. 2 Ka va kom shighe u zôron wain yô, a tindi kpan na ugen hen mbatomov mbara ér ve pande atam a wain ve na un. 3 Kpa ve kôr un ve gbidye, shi ve zenda un a hide a kwagh ga. 4 Tsô shi a tindi kpan ugen hen a ve. Ngun yô, ve gber un ivav sha ityou shi ve hee un. 5 Shi a tindi ugen kpaa. Kpa ngun yô, ve wua un. Shi a tindi mbagenev kpishi, kpa ve gbidye mbagen, ve wua mbagenev. 6 Ugen shi her, lu wan na u ishima ishima. A mase tindin un hen a ve, a kaa ken ishima na ér, ‘Wan wam yô, vea na un icivir.’ 7 Kpa mbatomov mbara kaa ker ayol a ve ér, ‘Ngun ka wan u una va ya dyako je ne. Va se wua un nen, nahan dyako la a̱ hingir u wase!’ 8 Tsô ve kôr un ve wua, ve kpela ve due a mi ken sule u wain la kera. 9 Nahan or u a lu a sule u wain la una er nena? Una va wua mbatomov mbara, una gema sule u wain la una na mbagenev. 10 Ne ôr kwagh ne ken ruamabera gaa? I nger ér, ‘Iwen i mbamaankwagh ve vende i la, i hingir iwen i hange hange i sha zongough ku iyoughough. 11 Kwagh ne due ka hen Yehova,* man ka kwagh u kpilighyol sha ashe ase.’”

12 Mba ongo kwagh ne yô, ve soo u kôron un, sha ci u ve kav er lu ve je lu ôron injakwagh la sha a ve yô, kpa ve cia ikpelaior. Nahan ve undu un ve yem kwagh ve.

13 Tsô Mbafarishi za tindi Mbafarishi mbagenev kua mbapatii mba Herode hen a na sha u vea nôngo vea kôr un a ikyaa zwa yô. 14 Mba ve yô, ve kaa a na ér: “Ortesen, se fa u ngu or u mimi shi u keren u doon ityough a or ga, sha ci u u nengen sha mlu u or u sha iyol la ga, kpa u tesen ior gbenda u Aôndo sha mimi. Nahan, u tan Shisar kpandegh la ka shami* shin ka shami ga? 15 Se̱ ta, shin se̱ de te ga?” Kaven atseregh a ve la yô, a kaa a ve ér: “Er nan ne karen mo? Vam nen a denariu* m nenge.” 16 Tsô ve va a mi môm, maa a pine ve ér: “Ka ikyav i ityough ki an i̱ lu sha mi nee? Man iti i i lu sha mi ne ka i ana?” Ve kaa a na ér: “Ka i Shisar.” 17 Yesu maa kaa a ve ér: “Na nen Shisar akaa a a lu a Shisar la, kpa akaa a a lu a Aôndo yô, na nen Aôndo.” Nahan kpiligh ve iyol a na.

18 Tsô Mbasadushi, mba ve kaan ér mnder u shin ku ngu ga la, va pine un ér: 19 “Ortesen, Mose yange nger se ér aluer anmgbian u or kpe undu kwase, kpa nan undu wan ga yô, anmgbian u nan a tôô kwase u nan undu la, a mar wan a mi, sha ci u anmgbian u nan shon. 20 Nomsombaiorov mbagenev utaankaruhar lu anmgbianev. U hiihii la vôso kwase, kpa lu a mar wan ga tsô kpe. 21 U sha uhar la maa tôô kwase la, kpa va kpe undu wan ga, u sha utar la kpa nahan. 22 Ve mba utaankaruhar mbara cii ve kpe ve undu wan ga. Ken masejime yô, kwase la kpa kpe. 23 Nahan sha shighe u mnder u shin ku la, una lu kwase u ana? Gadia hanmô ken ve mba utaankaruhar mbara cii yange nan vôso un.” 24 Yesu kaa a ve ér: “Ka nahan man ne tsum ye gaa? Sha ci u ne fa Ruamabera ga, shi ne kav tahav mbu Aôndo kpaa ga. 25 Gadia a va nder ior shin ku yô, nomso vea er kasev ga, shi kasev kpa a na ve noov ga, kpa vea lu er mbatyomov mba shaav nahan. 26 Kpa sha kwagh u nderen mbakpenev la yô, ne ôr ken takeda u Mose, hen ijiir i i ôr kwagh u ageva la gaa? Aôndo yange kaa a na ér: ‘M ngu Aôndo u Aberaham man Aôndo u Isaka man Aôndo u Yakob.’ 27 Un ka Aôndo u mbakpenev ga, kpa ka u mbaumav. Ne tsume kpishi je.”

28 Orgen ken mbangerenatindi va her, nahan ungwa er ve lu nyiman kwagh a na yô. Nengen er a ne ve mlumun u vough nahan yô, a pine un ér: “Ken Atindi cii, ka tindi u han a lu u hiihii?”* 29 Yesu kaa ér: “U hiihii yô ér, ‘Kegh ato, Iserael, Yehova* ka Aôndo wase, shi Yehova* ngu môm tseegh, 30 nahan yô, Yehova* Aôndo wou a̱ doo u ishima kpee je, a ishima you cii man a uma wou cii man a mhen wou cii man a agee a ou cii.’ 31 U sha uhar yô, ka un ne, ‘Or u nan we ndor a we nana̱ doo u ishima kpee je, er iyol you nahan.’ Tindi ugen môm hemba atindi a ahar ne ga.” 32 Orngerenatindi la kaa a na ér: “Ortesen, u ôr doo, man ka mimi kpaa, ‘Ngu Môm tseegh, ugen ngu ga’; 33 shi aluer a doo or ishima a ishima i nan cii man a mfe u nan cii man a agee a nan cii, shi or u wan ndor a nan doo nan ishima er iyol i nan nahan yô, hemba nagh ku nanden kua iniav mbigen ica je.” 34 Yesu nengen er a lam sha kwaghfan nahan yô, a kaa a na ér: “U ngu ica a Tartor u Aôndo ga.” Or ve môm kera cihi pine un kwagh ga.

35 Nahan kpa, er Yesu lu tesen ken tempel her la je, a kaa ér: “Er nan ve mbangerenatindi ka ve kaa ér Kristu ka wan u Davidi? 36 Icighan jijingi yange mgbegha Davidi iyol na kaa ér: ‘Yehova* kaa a Terem ér: “Temam ken uwegh ku yanegh zan zan me kar veren mbahyomov ou shin akevangahar a ou.”’* 37 Davidi iyol na yange yila un ér Ter, nahan a er nan ve una lu wan u Davidi?”

Ikpelaior i vesen la kegh ato, doo ve u ungwan kwaghôron na. 38 Shi er lu tesen la, a kaa ér: “Wa nen ikyo sha kwagh u mbangerenatindi mba ka ve soo u huan ugôgômbaakondov zenden a mi, shi ve soo ér i sughun ve sha icivir ken igbar,* 39 shi ve soo u teman sha mkônom ma sha hemen* ken ushinagoge man sha ajiir a hemban doon hen uiniongo la. 40 Ka ve ngohol uya mba* kasev mba côgholov, shi ve eren mbamsen mba lihen ér ior ve nenge.* Vea ya mtsaha u hemban vihin.”

41 Tsô a tema inya, a gba kenger ape i ver mbaakwati mba inyar* la. Lu nengen er ikpelaior lu kenden inyaregh shin mbaakwati mba inyar mbara yô. Mbanyarev kpishi kpa lu kenden samnyar shimi. 42 Tsô kwasecôghol ugen lu icankwase, nahan va kende samnyar u gban kwagh ga,* agbenger ahar. 43 Maa a yila mbahenen a kaa a ve ér: “Mimi je me kaa ne, kwasecôghol u a lu icankwase ne hemba kenden kwagh a mbagenev mba ve kende inyaregh shin mbaakwati mba inyar la cii. 44 Gadia mbagenev cii kende ka sha er ve lu a mi kpishi la, kpa un yô, er a lu ken ibanave nahan kpa, a kende hanma kwagh u a lu a mi cii, man ka cii kwagh u a lu a mi u koson iyol na je la.”