Yohane
10 “Mimi mimi je* me kaa ne, or u nan nyer ken ityôr-iyôngo sha hunda ga, kpa nan unde hen ijiir igen nan nyer ker yô, nan ngu ormbaiv man or u yan ishar. 2 Kpa or u nan nyer sha hunda yô, nan ngu orkuran u iyôngo shon. 3 Ka nan je orkuranhunda ka a bugh nan hunda ye, shi iyôngo la ngi ongo imo i nan. Ka nan yila iyôngo i nan sha ati ati, shi ka nan hemen i nan due a i ken won. 4 Ka nana duen a iyôngo i nan la cii yô, nan hemen i, i di i dondo sha a nan, sha ci u i fa ikyenge i nan. 5 Mayange ia dondo or u i fe nan ga la ga, kpa ia yevese nan, sha ci u i fa ikyenge i nan ga.” 6 Yesu ôr ve injakwagh ne, kpa ve kav kwagh u lu ôron ve la ga.
7 Tsô Yesu shi kaa ér: “Mimi mimi je me kaa ne, mo m ngu hunda u iyôngo i nyôron her yô. 8 Mba ve ve ken iti yam sha mimi ga la cii ka mbaiv man mba yan ishar; iyôngo ungwa ve ga. 9 Mo m ngu hunda; hanma or u nana nyôr hen a mo cii a yima nan; nana nyôron shi nana duen, shi nana zuan a ijiir i yan toho. 10 Ormbaiv gbe van ga, saa ka i lu u va iin shi wuan shi vihin kwagh. Mo yô, m va sha u ve̱ zua a uma, shi ve̱ lu uma gbem sha won. 11 Mo m ngu orkuranilev u dedoo; orkuranilev u dedoo ka nan na uma u nan sha ci u iyôngo. 12 Or u eren tom sha inyar, u nan lu orkuranilev ga, shi i lu iyôngo i nan ga la, ka nana̱ nenge gbaseela una nguren van yô, nan undu iyôngo la nan yevese, nahan gbaseela la a kôr igen, a sambe igen, 13 sha ci u i tôô nan a tôô tom, shi kwagh u iyôngo la gba nan ishima ga. 14 Mo m ngu orkuranilev u dedoo. M fa iyôngo yam, iyôngo yam kpa fam, 15 vough er Ter a fem, mo kpa m fe Ter nahan; shi m na uma wam sha ci u iyôngo.
16 “M ngu a iyôngo igen kpaa, i ngila ngi ken ityôr ne ga; i kpa me va a i,* ia ungwan imo yam, i cii ia hingir ikyum i môm, sha ikyev i orkuran môm. 17 Ka nahan man m doo Ter ishima ye, sha ci u m na uma wam, sha er me hide me zua a mi yô. 18 Or môm kpa nana ngohol un hen a mo ga, kpa m tsua u nan un a ishima yam. M ngu a ian i nan un, shi m ngu a ian i hiden zuan a mi kpaa. Ka kwagh u Terem a kaa* ér m er je ne.”
19 Akaaôron ne na yô, Mbayuda shi kera gba zwa môm ga. 20 Mbagenev kpishi ken a ve lu kaan ér: “Ngu a jijingi u bo,* shi a nyôr ihyundugh. Er nan ne lu keghen ato a naa?” 21 Mbagen di kaa ér: “Akaaôron ne ka a or-azôv ga. Ijôv ia fatyô u bughun mbaapirashe ashee?”
22 Hen shighe la, i lu eren Iniongo i Wanger Tempel ken Yerusalem. Lu sha shighe u wuhee,* 23 Yesu lu zenden ken tempel sha varenda* u Solomon la. 24 Tsô Mbayuda va kase un gba pinen un ér: “Ka hanma shighe je u bee se akperan ken ishima? Wea lu Kristu yô, ôr se wang.” 25 Yesu gema kaa a ve ér: “M ôr ne, kpa ne na jighjigh ga. Ityom i m lu eren ken iti i Terem ne ngi eren mo shiada. 26 Kpa ne na jighjigh ga, sha ci u ne mba iyôngo yam ga. 27 Iyôngo yam ngi ongo imo yam, m fa i shi ngi dondon mo. 28 M ngu nan i uma u tsôron, nahan mayange je ia tim ga, shi or môm kpa nana tsue i ken uwegh agh kera ga. 29 Kwagh u Terem a nem ne hemba akaa agen cii, shi or môm nana fatyô u tsuen i ken uwegh ku Ter kera ga. 30 Mo man Ter se mba môm.”*
31 Tsô Mbayuda shi tôô awen ér vea ta un. 32 Yesu kaa a ve ér: “M er ityom i dedoo kpishi i Ter a kaa ér m er yô, ne nenge sha ashe a en. Nahan ka sha ci u ityom i han ne lu tan mo awene?” 33 Mbayuda kaa a na ér: “Se mba tan we awen ka sha ci u ma tom u dedoo ga, kpa ka sha ci u u laha Aôndo. Gadia u ngu orumace, man u tôô iyol you wer u ngu aôndo.” 34 Yesu gema kaa a ve ér: “I nger ken Atindi a en ér, ‘M kaa mer: “Ne mba mbaaôndo,”’* shin ka nahan ga? 35 Nahan Aôndo yila ior mba i ne ve ibo ken ruamabera la ér ‘mbaaôndo,’ man ka u a fatyô u geman kwagh u ruamabera a ôr la ga. 36 Mo yô, Ter tsegham shi tindim shin tar. Kpa ne mba kaan a mo ner, ‘U laha Aôndo,’ sha ci u m kaa mer, ‘M ngu wan u Aôndo’ yumuu? 37 Aluer ka ityom i Terem m lu eren ga yô, de nem nen jighjigh ga. 38 Kpa aluer ka ityom la m lu eren yô, er ne nem jighjigh ga nahan kpa, na nen i jighjigh; sha er ne fa, shi ne za hemen u fan er Ter a lu ken mzough vea mo, mo kpa m lu ken mzough vea Ter yô.” 39 Tsô shi ve nôngo ér vea kôr un, kpa a kar her atô ve kera.
40 Shi a kar a yem Yordan yande la, hen ijiir i Yohane eren ior batisema sha hiihii la, a za lu her. 41 Tsô ior kpishi za va, gba va kaan ér: “Yohane yange er ivande i môm ga, kpa akaa a Yohane gema ôr sha or ne cii ka mimi.” 42 Nahan ior kpishi na Yesu jighjigh her.