Luka

8 Ica kera gba ga maa a gba zenden nyôron ken agar a vesen man agar a kiriki, pasen loho u dedoo u Tartor u Aôndo. Mbapuekaruhar mbara lu vea na imôngo, 2 kua kasev mbagenev mba i dugh ujijingi mba bov ken a ve shi i bee ve iangev yô. Ve yô, lu Maria u i yilan un ér Madalina, u yange i dugh ujijingi mba bov utaankaruhar ken a na la, 3 man Yoana kwase u Kuza, or u nengen sha ya u Herode, kua Susana man kasev mbagenev mba ve naan ve iwasen sha akaa a ve lu a mi la.

4 Tsô zum u ikpelaior i vesen kohol vea mba ve lu zenden vea na imôngo sha agar agar la yô, a ôr ve injakwagh, a kaa ér: 5 “Orsule ugen yar lu tan ivor na. Er lu tan ivor la, isham igen haa sha kpegbenda, nahan i ndyar i angahar, shi inyon i purugh va ya i. 6 Igen haa sha vande, kpa ngi menden yô, i use sha ci u i zua a mndorom ga. 7 Igen haa ken usaa, nahan usaa mba ve mende a i imôngo la, imbishi i. 8 Kpa igen haa sha inya i dedoo, nahan ngi menden yô, i ume atam hemba er yange i lôô la kwa 100.” Ôron akaa ne been yô, a ôr genger genger ér: “Or u nan lu a ato a ungwan yô, nana̱ ungwa.”

9 Kpa mbahenen nav kaa a na ér a̱ pase ve injakwagh la. 10 Nahan a kaa ér: “Ne yô, i wase ne u kaven akaamyer a sha kwagh u Tartor u Aôndo, kpa mbagenev cii yô, vea ungwan anzaakaa di tsô, sha er vea̱ lu nengen, kpa vea nenge vea kav ga, shi vea̱ lu ungwan, kpa vea ungwa vea kav inja i kwagh shon ga yô. 11 Ka kwagh u injakwagh ne i lu ôron je ne: Ivor la ka loho u Aôndo. 12 Ivor i i hee sha kpegbenda la ngi er ior mba ka ve ungwa loho la, maa Diabolo a va dugh loho shon u i lee ken asema a ve la kera, sha u ve̱ de ne jighjigh, ve̱ zuan a myom ga la nahan. 13 Ivor i i hee sha vande la di, ngi er ior mba ka ve ungwa loho la, ve ngohol u a iember, kpa ve wa amise ga la nahan. Ka ve na jighjigh sha anshighe kpuaa, kpa vea va tagher a imeen yô, maa ve gba. 14 Ivor i i hee ken usaa la yô, ngi er ior mba ka ve ungwa loho la, kpa akaa a nan ishimanyian man inyaregh kua msaanyol u uma ne a dan ve la nahan. Akaa ne ka a imbishi ve, nahan ve fatyô u vesen ga. 15 Gema ivor i i hee sha inya i dedoo la yô, ngi er ior mba ka ve ungwa loho la a ishima i mimi shi ve wa ishima a mbamzeyol, ve ume ityamegh la nahan.

16 “Or môm kpa nan tsaren imenger nan cirin ikyagh sha mi, shin nan gem nan we shin ityôgambe ga, kpa ka nan penda i̱ sha tebul,* sha er ior vea nyôr ken iyou vea nenge a iwanger yô. 17 Kwagh môm u a lu myer, u una va due ken igbar ga je kpa ngu ga. Shi ma kwagh u i yer kpile kpile, u a va fa un ga, shi una due ken igbar ga je kpa ngu ga. 18 Sha nahan yô, ver nen ishima sha kwagh u ne lu ungwan ne, gadia or u nan lu a kwagh yô, a seer nan, kpa or u nan lu a mi ga yô, kwagh u nan hen ér nan ngu a mi la je kpa a ngohol hen a nan kera.”

19 Hen shighe ne, ngô na man anmgbianev nav mba nomso za va hen a na, kpa ve fatyô u zan ikyua a na ga, sha ci u ikpelaior lu a na. 20 Tsô i kaa a na ér: “Ngôu man anmgbianev ou mba nomso tile ken won, ve soo u nengen a we.” 21 A gema a kaa a ve ér: “Ngôm man anmgbianev av ka mba ve ungwan loho u Aôndo shi ve eren sha mi mban.”

22 Sha iyange igen la, un vea mbahenen nav ve nyôr tso, nahan a kaa a ve ér: “Se per nen ber yande la.” Maa ve mough shin tso. 23 Kpa mba ngur yemen yô, a za gba mnyam shin tso. Tsô ijeverahumbe va ta sha ber la, maa mngerem gba kpianger haan shin tso, je tso lu nôngon u urun. 24 Nahan ve gba za nderen un kaan ér: “Ortesen, Ortesen, se mba nôngon u saan!” Nahan a mough a yange ahumbe kua agôndoamnger la, maa huan ving. 25 Tsô a kaa a ve ér: “Jighjigh u nan wen ngu hana?” Kpa mciem gba ve iyol, ve gba ôron kwagh ayol a ve kaan ér: “Or ne yô, ka an jimi? Ahumbe kua mngerem je kpa mba ongo imo na.”

26 Tsô ve za due sha kpetar yande la hen haregh u Mbagerasene, Galilia gema lu yande ne. 27 Yesu dugh sha tar yô, orgen ken gar, u azôv lu nzughul a na yô, va kohol un. Or ne kera hua ikyondo iyol ga ica gba, shi tsaan ken iyou ga, a lu hen iwar i mbakpenev. 28 Nengen a Yesu yô, a ngor a va gba hen ishigh nagh, maa a ôr genger genger ér: “Yesu, Wan u Aôndo U Hemban Cii, ka nyi i zuam a wee? M zamber we, de eren mo ican ga.” 29 (Sha ci u Yesu lu kaan a jijingi u bo* la ér a due ken or shon kera. Yange a zer nzughul a or la, nahan a̱ kange un mshirim shi a̱ haa un ahye, shi a̱ ver ior vea kuran un kpa, a tôndo ikyangenev mbi shon, azôv la a yem a na hen ajiir a or lu her ga yô.) 30 Nahan Yesu pine un ér: “Iti you ér ana?” Maa a kaa ér: “Ikpela,” sha ci u ujijingi mba bov kpishi nyôr ken a na. 31 Nahan ve zer zamber a na ér, a de kaan ér ve yem shin ihyungwa i i ze kweng la ga. 32 Ikpela-igyo gema lu yan kwagh her sha uwo. Nahan ve zamber a na ér a̱ na ve ian i nyôron ken igyo la, tsô a na ve ian. 33 Nahan ujijingi mba bov mbara due ken or la za nyôr ken igyo la, maa ikpela-igyo la cii hembe ayem za osough sha kurugh ku ijem haa shin ber, kpe shimi. 34 Kpa mbakuranigyo mbara mba nengen kwagh u er la yô, ve yevese ve za ôr ken gar kua hen ningirtar la cii.

35 Tsô ior due u va nengen kwagh u za hemen la. Mba ve ape Yesu lu la yô, ve nenge or u i zenda azôv ken a na kera la hua akondo iyol, tema hen angahar a Yesu lu eren kwagh sha inja, nahan cier ve iyol. 36 Mba ve nenge kwagh ne sha ashe a ve la ôr ve er i hii man i zende azôv ken or la kera, a hingir vough nahan yô. 37 Nahan zegeikpelaior i hen haregh u Mbagerasene la kaa a Yesu ér a due hen ijiir ve kera, sha ci u mciem gba ve iyol. Tsô a za nyôr tso ér una yem. 38 Kpa or u ujijingi mba bov due ken a na la, zer zamber a na ér una yem vea na, kpa a gema a na or shon gbenda ér a yem, a kaa ér: 39 “Hide yem ken ya, za ôr hanma or cii kwagh u Aôndo a er a we ne.” Nahan a yem a gba za yôôn kwagh u Yesu er a na ne ken gar la cii.

40 Yesu hidi yô, ikpelaior ngohol un doo doo, sha ci u ve cii ve lu veren ashe a na. 41 Kpa orgen za va, iti na ér Yairu; lu orhemen u shinagoge. A va yav inya hen ishigh ki Yesu, a gba zamber a na ér a va hen ya na, 42 sha ci u wan na u kwase u kuman anyom 12 nahan, gba angev je lu nôngon ku, man lu cii wan na* je la.

Er Yesu lu yemen sha gbenda la, ikpelaior lu imbishi un. 43 Nahan kwase ugen gema lu, u tsa a angev mbu duen awambe anyom 12 yô. Or môm fatyô u sôron un mbu ga. 44 A za va un ken ijime, a va bende a tsumbur u ikyondo na i haa iyol la, nahan fese je maa awambe la de u duen. 45 Tsô Yesu pine ér: “Ka an nan bende a mo?” Ve cii mba ngur tunan yô, Peteru kaa ér: “Ortesen, ikpelaior ngi imbishi we shi tan sha a we.” 46 Kpa Yesu kaa ér: “Or bende a mo, sha ci u m fa er tahav mbu dugh ken a mo yô.” 47 Kwase la nengen ér i fa kwagh u un er la yô, a va gba inya hen ishigh ki Yesu, lu gbidyen ikyarkyase iyol, maa a ôr sha ishigh ki ior cii, er i hii ve un bende a na yô, man er angev nav mbu bee her ave ave je yô. 48 Kpa Yesu kaa a na ér: “Wan wam, ka sha jighjigh u nan wou la angev ou mbu bee ye. Yem bem bem.”

49 Er lu ôron kwagh zan a mi ave la je, orgen hen ya u orhemen u shinagoge la va kaa ér: “Wan wou u kwase la kpe! Ityôkyaa kera ngi i zan Ortesen iyol ga.” 50 Yesu ongo nahan yô, a kaa a na ér: “I̱ de ze u iyol ga,* na jighjigh di tsô, nahan a war un.” 51 Za nyer hen ya la yô, a lumun ér orgen nana nyôr ken iyou la vea na ga, saa Peteru man Yohane man Yakobu, kua ter u wankwase la man ngô na tseegh. 52 Kpa ior cii lu vaan shi zungwen ku u wankwase la. Nahan Yesu kaa ér: “De nen u vaan, gadia a kpe ga, ka mnyam a lu yaven ye.” 53 Maa ve gba sen un inja er a bume nahan, sha ci u ve fa er a kpe yô. 54 Tsô a gba un sha uwe a kaa ér: “Wana, mough sha!” 55 Maa iôôn* na hide her, nahan her ave ave je a mough sha, Yesu maa kaa ér i na un kwagh a ya. 56 Nahan saan mbamaren nav iyol, kpa Yesu ta ve icin ér ve de ôron or môm kwagh u er la ga.