Aerenakaa
23 Tsô Paulu kenger sha ior jighilii hen atô u Sanhederin, maa kaa ér: “Anmgbianev, m ngu eren kwagh u vough sha ishigh ki Aôndo a imoshima i wang zan zan nyian.” 2 Ôron nahan yô, pristi u vesen, Anania, kaa a mba ve tile ikyua a na la ér ve ta un sambe sha zwa. 3 Paulu maa kaa a na ér: “Aôndo una tsaha u, we or u wan atseregh ne.* U tema wer u ôrom ijir sha Atindi, man u gema u ngu peren Atindi sha u kaan wer i tam sambee?” 4 Mba ve tile her la pine un ér: “U ngu lahan pristi u vesen u Aôndo?” 5 Paulu maa kaa ér: “Anmgbianev, m fa mer ngu pristi u vesen ga. Gadia i nger ér, ‘De lahan ma orhemen u ior ou ga.’”
6 Tsô, er Paulu fa er mbagenev ken a ve lu Mbasadushi, mbagenev lu Mbafarishi yô, a ôr ken Sanhederin genger genger ér: “Anmgbianev, m ngu Orfarishi, wan u Mbafarishi. Ka sha kwagh u mnder u shin ku i lu ôron mo ijir ye.” 7 Kwagh u ôr ne na yô, ayôôso gba hen atô u Mbafarishi man Mbasadushi, nahan mkohol la pav ker. 8 Gadia Mbasadushi kaan ér mnder u shin ku ngu ga, shi ortyom shin jijingi kpaa ngu ga. Kpa Mbafarishi yô, ve lumun a akaa ne cii.* 9 Nahan ayôôso mough taveraa, maa mbangerenatindi mbagenev ken nongo u Mbafarishi mough gba nyiman kwagh taver taver, kaan ér: “Se nenge a kwaghbo môm u or ne a er ga, kpa aluer jijingi shin ma ortyom nan lam a na yô—.” 10 Ayôôso la nga ganden ave yô, kurutya u kweshojaa la cia ér vea va ande Paulu, maa a na wada ér ushoja ve sen ve za kôr un ve due a na hen atô ve kera, ve va a na ken iyaagh ki shoja.
11 Tugh mbu il yô, Ter va tile pe Paulu lu la, kaa ér: “Taver ishima! Gadia er u lu eren shiada sha kwagh wam vighe vighe ken Yerusalem nahan, kape u er shiada ken Roma kpaa keng je la.”
12 Sev mbu aven yô, Mbayuda zua zwa shi bum ér vea ya kwagh ga shi vea ma kwagh kpaa ga, saa vea wua Paulu, gayô ifyan i kôr ve. 13 Mba ve zua zwa shi ve bum la hemba iorov 40. 14 Nomsombaiorov mban za hen upristi mba tamen man mbatamen za kaa ér: “Se bum ser se ya ma kwagh ga zan zan saa se wua Paulu, gayô ifyan i kôr se. 15 Nahan yô, ne kua Sanhederin cii ôr nen kurutya u kweshojaa la ner a sen a na hen a ven, inja er ne soo u seer tôvon sha ikyaa na la vighe vighe nahan. Kpa cii man a va zurum yô, se wa iyol se lu keghen a kegh u been a na sha.”
16 Nahan kpa, wan u anmgbian u Paulu u kwase ungwa mhen u ve lu eren u za yeren sha gbenda tan num sha a na la, maa a nyôr ken iyaagh ki shoja a va ôr Paulu kwagh shon. 17 Paulu maa yila môm ken ushoja mba vesen mbara hen a na, a kaa ér: “Za a gumor ne hen kurutya u kweshojaa; a soo u ôron un kwagh.” 18 Tsô a kua a na a za a na hen kurutya u kweshojaa la, a kaa a na ér: “Or u a lu ken purusu, i yer ér Paulu la, yilam kaa a mo ér m va a gumor ne hen a we, a soo u ôron we kwagh.” 19 Kurutya u kweshojaa la kôr un sha uwe, ta ibyalegh a na, maa pine un ér: “Ka nyi u soo u ôron mo?” 20 A kaa ér: “Mbayuda zua zwa ér vea ôr u yô, kper we u sen a Paulu shin Sanhederin, inja er ve soo u seer tôvon sha ikyaa na la vighe vighe nahan. 21 Kpa de lumun a ve ga, vea̱ ôr nan nan kpaa, sha ci u iorov mba hemban 40 ken a ve yer sha gbenda ér vea ta num sha a na, shi ve bum ér vea ya kwagh ga shi vea ma kwagh ga zan zan saa vea wua un, gayô ifyan i kôr ve; nahan ve wa iyol bee, mba masen keghen ér we u na zwa.” 22 Tsô kurutya u kweshojaa la ta gumor la icin, kaa ér: “De ôron or môm wer u pasem kwagh ne ga.” Maa a na un ian a yem.
23 Tsô a yila ushoja uhar ken ushoja mba vesen mbara a kaa ér: “Kohol nen ushoja 200, man ushoja 70 mba hendan anyinya, kua ushoja 200 mba tôôn awange, wa nen iyol ne va mough tugh, er ahwa ataankaranyiin nahan,* ne za Sesaria. 24 Shi ver nen anyinya a Paulu una henda, a za a na hen gomna Feliku a zayol shio yô.” 25 Shi a nger washika, a ôr ker ér:
26 “Ka mo Kalodio Lisia; hen Orcivirigh, Gomna Feliku: M ngu sughun we! 27 Yange Mbayuda kôr or ne ve lu nôngon ér vea wua un, kpa m va fe mer ka Orroma yô, m va a ushoja av fese m va war un. 28 Man er m lu keren u fan kwagh u ve lu nan un ibo sha mi la yô, m sen a na hen Sanhederin ve la. 29 M nenge yô, ka sha akaa a a gbe a zough sha kwagh u Atindi a ve la ve ne un ibo ye, kpa ve ôr ma kwaghbo u a er u tesen ér a kuma ku shin purusu ga. 30 Kpa i va ôrom ér ve zua zwa ér vea wua or ne, nahan yô, m ngu tindin mer i va a na hen a we fese, shi me ôr mba ve lu kaan ér a er kwaghbo la ve za pase ibo na sha ishigh you.”
31 Tsô ushoja mbara mough a Paulu va a na hen Antipateri tugh, er i kaa ve nahan. 32 Mba ker ken sev mbugen yô, ve na ushoja mba sha anyinya mbara ian ér ve mase zan a na, ve di ve cin ve hide hen iyaagh ki shoja. 33 Tsô ushoja mba sha anyinya mbara va nyôr hen Sesaria, maa ve na gomna washika la, shi ve gema Paulu ve na un. 34 A ôr washika shon, shi a pine tiôntar u Paulu a dugh yô. I kaa a na ér ka or u ken Shilishia. 35 Maa a kaa ér: “Me ungwa ijir you vighe vighe, zum u mba ve lu kaan ér u er kwaghbo la vea va nyôr yô.” Nahan a na wada ér i̱ wa un sha ikyev i mbakuran, hen ya u Herode.*