Mbaroma
1 Mo Paulu, kpan u Kristu Yesu; i yilam ér m lu apostoli shi i tsegham ér m pase loho u dedoo u Aôndo, 2 ú yange vande tôndon zwa a mi sha ikyev i uprofeti ken icighan Ruamabera la. 3 Ka loho u sha kwagh u Wan na u yange i va mar un ken tsombor u Davidi, lu orumace, 4 kpa i va pase sha tahav mbu icighan jijingi ér ngu Wan u Aôndo zum u i nder un shin ku la; un ka Yesu Kristu Ter wase. 5 Ka sha ikyev na Aôndo a tesem* erdoo na u sha mhôôn la shi m hingir apostoli sha u akuraior cii a̱ na un jighjigh shi a̱ ungwan imo na sha u nan iti na icivir ye. 6 Ne kpa ne mba ken akuraior a i yer a ér a̱ hingir kwagh u Yesu Kristu la— 7 M ngu ngeren hen ne mba doon Aôndo ishima mba ne lu hen Roma cii, ne mba i yer ne sha u ne lu uicighanmbaiorov la:
Aôndo Ter wase man Ter Yesu Kristu ve̱ tese ne erdoo u sha mhôôn shi ve̱ na ne bem kpaa.
8 Hiihii yô, m ngu sughun Aôndo ken iti i Yesu Kristu sha kwagh u hanmô wen cii, gadia mba ôron kwagh u jighjigh u nan wen hanma ijiir sha tar cii. 9 Aôndo u m eren un icighantom a ishima i môm sha u pasen loho u dedoo sha kwagh u Wan na la, una erem shiada, er m lu umbur ne ken mbamsen av hanma shighe, m gbe uwer ga yô. 10 Ka m shi zamber mer á gbe sha mi yô, ma m ve hen a ven, aluer ka ishima i Aôndo yô. 11 Gadia sarem tsung u ma m zough ishigh a ven, ma m wase ne sha akaa a ken jijingi, sha er jighjigh u nan wen una taver yô; 12 shin de m kaa mer, sha er se taver ayol a ase asema sha jighjigh u nan u hanmô wase yô, u wen kpaa, u wam kpaa.
13 Nahan kpa, anmgbianev, m soo mer fa nen ner, m nôngo acin imôngo mer me va hen a ven, kpa i yangem zan zan hegen; ka sha u ne kpa tom wam hen a ven ma u ume atam, vough er u um ken akuraior agen kpaa nahan. 14 M ngu Mbagrika kua mba ve lu Mbagrika ga* kpaa a injô, shi mbafantakeda kua mba ve fe takeda ga kpaa m ngu ve a injô. 15 Nahan sarem tsung u ma m va yôô loho u dedoo hen ne mba ne lu ken Roma kpaa. 16 Gadia kunya kôrom u pasen loho u dedoo ga; jighilii yô, loho ne ngu tesen tahav mbu Aôndo a lu a mi u yiman hanma or u nan ne jighjigh cii, Oryuda hiihii, maa Orgrika kpaa. 17 Ka ken u i lu pasen perapera u Aôndo sha jighjigh u nan man sha ci u jighjigh u nan kpaa ye, vough er i nger nahan, ér: “Kpa orperapera nana lu uma sha ci u jighjigh u nan.”
18 Gadia Aôndo u a lu sha la ngu pasen er ishima i vihi un a ior mba ve ungwan imo na ga kua mba ve lu mbaperapera ga, mba ve lu yangen ior sha ifer ér ve de fe mimi ga la. 19 Gadia akaa a ma ve fe sha kwagh u Aôndo la nga myer hen a ve ga, sha ci u Aôndo vande pasen ve wang. 20 Gadia hii sha igbetar je, mba nengen a aeren a na a i nengen a mi bong ga la wang, sha ci u mba nengen a a ken akaa a a gbe la, kua tahav nav mbu tsôron man er a lu Aôndo jim jim la je kpaa, nahan mba a ishô ga. 21 Er yange ve fa Aôndo nahan kpa, ve na un icivir ga, shin ve sugh un kpaa ga, kpa mbamhen vev hingir mba gbiliniv, shi asema a ve a a ban a mkav la wa ime. 22 Shin er ve tôô ér ve fa kwagh nahan kpa, ve hingir abumeaior, 23 ve gema iengem i Aôndo u tsôron la hingir er eev mbu mbu bee orumace u ka a kpe ne nahan, kua eev mbu inyon man ishôso i lun angahar anyiin kua ishôso i kpelan iyav inya.
24 Nahan, er ve soo u eren sha asaren a ve yô, Aôndo de ve ér ve er akaa a hôngorough, sha er vea hee ayol a ve yô. 25 Ve venda mimi u sha kwagh u Aôndo, ve gema ve lumun aie. Ve civir akaa a i gbe a gba la shi ve er a tom, ve de civir Un u a gbe akaa la. A kuma iwuese gbem sha won. Amen. 26 Ka nahan ve yange Aôndo de ér ve er sha asaren a ve a yaven a or a ihyeenegh la ye. Kasev mba ve lu hen atô ve la gema ieren ve i yaven a or sha gbaaôndo la, kera lu i sha gbaaôndo ga. 27 Nomso kpaa undu ieren i yaven a kasev sha gbaaôndo la, ve hingir u lun a isharen i yaven a ayol a ve la taveraa, nomso a nomso, ve lu eren akaa a kunya shi zuan a mtsaha* ken ayol a ve, u a kom sha kwaghbo ve la vough yô.
28 Er ve nenge lu ve a inja u fan kwagh u Aôndo* ga yô, Aôndo de ér ve lu a mbamhen vev mba bov mbara, nahan ve er akaa a a kom ga yô. 29 Ve iv a hanma inja i dang cii, ifer man hua man kwaghbo, shi ve iv a iyuhwe man iwoo-or man ayôôso man icugh kua ihyom, shi ve lu mbaerenangereke, 30 man mba vihin ior iti, man mba kôron Aôndo ihyom, kua mbalahanior man mbamoronyol man mba kaan ihyagh, man mba eren mbamhen mba bov, kua mba hemban mbamaren ato, 31 man mba lun a mkav ga man mba kuren uityendezwa vev ga man mba lun a dooshima ga man mba zungwen mhôônom ga. 32 Amba ne fa atindi a perapera a Aôndo la dedoo—ve fa er mba ve eren ambaakaa ne cii ve kom ku yô—nahan kpa, ve za hemen u eren akaa ne tseegh tsô ga, mba lumun a mba ve eren a la kpaa.