Mbaroma
4 Er i lu nahan yô, ka nyi se kaa ser Aberaham u a lu ter wase u tamen sha inja i iyolough la yange zua a mini? 2 U tesen ikyav yô, luun er yange i kaa ér Aberaham ngu orperapera sha ci u ityom na yô, ma lu a ityôkyaa i tan ihyagh, kpa ma lu ken Aôndo ga. 3 Nahan ruamabera kaa ér nyi? “Aberaham na Yehova* jighjigh, nahan a nenge un ér ngu orperapera.” 4 Or u eren tom yô, mba nengen injar i nan la ér ka iyua i ne nan gbilin* ga, kpa ka kwagh u i gbe u a na nan yô.* 5 Kpa or ka nana̱ na Aôndo jighjigh, nana̱ suur sha ityom i nan ga yô, Aôndo a nenge nan ér nan ngu orperapera sha ci u nan na jighjigh. Ka Aôndo una fatyô u nengen mbaasorabo ér mba mbaperapera ye. 6 Ka vough er Davidi kpa a ôr kwagh u msaanyol u or ka nan zua a mi zum u Aôndo a nenge nan ér nan ngu orperapera, kpa i lu sha ityom i nan ga la nahan, ér: 7 “Saan mba i de ve aferakaa a ve, shi i cir* asorabo a ve la iyol; 8 saan or u Yehova* a umbur isholibo i nan ma shighe môm ga la iyol.”
9 Msaanyol ne ngu sha ci u ior mba i tsôngo ve la tseegh shin ngu sha ci u ior mba ve lu ipyusu kpaa? Gadia se kaa ser: “Jighjigh u nan u Aberaham la yange na yô, Aôndo nenge un ér ngu orperapera.” 10 Yange lu ken mlu u nyi ve Aôndo nenge un ér ngu orperapera? Yange i tsôngo un shin i lu a tsôngo un ga? Yange i lu a tsôngo un ga, lu ipyusu. 11 Nahan Aôndo kaa a na ér a tsôngo. Icôngo la lu ikyav, man lu sha u tesen ér yange lu a tsôngo ga tsô i nenge un ér ngu orperapera sha ci u jighjigh na u nan la, sha u una hingir ter u mba i tsenge ve ga kpa ve ne jighjigh la cii, shi Aôndo una nenge ve ér mba mbaperapera yô; 12 man sha er una hingir ter u ônov mba i tsenge ve la, kpa a lu mba i tsenge ve la tseegh ga, a kua mba ve lu dondon ikyav i jighjigh u nan u ter wase Aberaham lu a mi shighe u lu a tsôngo ga la kpaa yô.
13 Gadia lu sha kwagh u atindi a kuran Aôndo tôndo zwa a Aberaham shin ônov nav* ér una lu or u yan dyako u tar ga, kpa lu sha ci u jighjigh u nan u lu a mi ve Aôndo nenge un ér ngu orperapera la. 14 Gadia aluer ka mba ve kuran atindi la ve lu mbayan dyako yô, jighjigh u nan una hingir gbilinkwagh, shi ityendezwa la kpa bunde. 15 Jighilii yô, Atindi nga ve a iyugh, kpa pe tindi a lu ga yô, tindi u peren kpa ngu ga.
16 Yange i er ityendezwa ne a Aberaham sha ci u a na jighjigh, man lu sha erdoo u Aôndo a tesen sha mhôôn la, sha er ityendezwa shon ia kure sha mi vough sha ônov nav* cii yô, man a lu mba ve kuran Atindi la tseegh ga, kpa a kua mba ve dondon ikyav i jighjigh u nan u Aberaham u a lu ter u hanma wase cii la. 17 (Ka vough er i nger nahan, ér: “M ver u mer lu ter u akuraior kpishi.”) Kwagh ne lu sha ishigh ki Aôndo, un u Aberaham na un jighjigh la, ka Aôndo u ka a nder mbakpenev shi a ôr kwagh u akaa a a lu ga inja er nga* la. 18 Yange na jighjigh shi lu a ishimaverenkeghen ér una va hingir ter u akuraior kpishi, shin er lu inja er kwagh la una fatyô u eren ga nahan kpaa; gadia i vande kaan ér: “Kape ônov ou* vea lu la.” 19 Yange nenge iyol na lu er i kpe nahan (gadia anyom a na kuma er 100 nahan), shi sagh u Sara kpa lu er a kpe nahan,* kpa jighjigh u Aberaham tenger ga. 20 A ta akperan sha kwagh u ityendezwa i Aôndo i̱ na jighjigh a mi la ga; kpa jighjigh na la na yô, ishima taver un, lu wuese Aôndo 21 shi lu a vangertiôr ér Aôndo una fatyô u eren kwagh u a tende zwa la. 22 Sha nahan yô, “i nenge un ér ngu orperapera.”
23 Nahan kpa, kwagh u yange i nger ér, “Aôndo nenge un ér” la, lu sha ci na tseegh ga, 24 lu sha ci wase kpaa. Aôndo una nenge se ér se mba mbaperapera sha ci u jighjigh u nan wase la, gadia se na Un u yange nder Yesu Ter wase shin ku la jighjigh. 25 Aôndo yange de ér i wua un sha ci u asorabo ase, shi nder un shin ku sha er una kaa ér se mba mbaperapera yô.