Doo u Se Ember Uiniongo?

UINIONGO mba vesen mba ukwaghaôndo man mba ityar i eren sha ajiir kpishi sha tar nyian la due ken Bibilo ga. Tsô, ka han ve dughu? Aluer ú fatyô yô, za hen iyou i koson ityakerada, ape ior ve tem ve er ityakerada la, za tôv sha kwagh u uiniongo mba vesen mba ior ve eren hen ijiir you la ken ityakerada kposo kposo, tsô ú nenge. Se time ase nen sha kwagh u i er sha uiniongo mban mbagenev yô.

Ista. Zegetakerada u pasen asemberakaa u i yer ér The Encyclopædia Britannica la kaa ér: “Ijiir i môm tsô ngi ken Ikyuryan I He ape í er kwagh u iniongo i Ista la ga.” Ista yange hii nena? Ka ior mba ve fe Aôndo ga jimin cii yange ve hii iniongo ne ye. I senge ér mba eren iniongo i Ista sha u umbur mnder u Yesu shin ku, kpa aeren a i̱ la ka a Mbakristu ga.

Iniongo I Ember Inyom i He. Werayange u ior ve ember inyom i he man aeren a ior ve eren sha u ember inyom i he la kaha ken ityar kposo kposo. Zegetakerada u pasen asemberakaa u í yer ér The World Book Encyclopedia la wase se u fan er inyom i he i ember yange i̱ hii yô; takerada shon kaa ér: “Ka orhemen u Mbaroma, Julius Caesar yange ver iyange i Janawari 1 ken inyom i 46 S.W la ér i lu Iyange i Nyom i He ye. Mbaroma yange ve tsegha iyange ne sha ci u aôndo ve u í yilan ér Janus la, un lu an-aôndo u ihinda gar man ihinda i kiriki man mhii. I ii uwer u Janawari la iti suur sha Janus. Janus lu a ishiv ihiar—ishigh ki môm ken hemen, ki gen di ken ijime.” Kwagh ne tese ér, Inyom i He i ember due ken aeren a ityôô.

Iniongo i Halloween. Zegetakerada u pasen asemberakaa u í yer ér The Encyclopedia Americana la ôr kwagh u iniongo i Halloween, i̱ i̱ war zan kwagh môm a ku umbur la, ér: “Aeren a iniongo i Halloween ne hii sha iniongo i upristi mba ior i Celt mbayiase mba i yilan ve ér Druid ve eren la; í eren iniongo ne cii man shighe u Mbakristu la ye. Ior i Celt yange ve eren uiniongo sha ci u mbaaôndo vev mba vesen uhar—ka aôndo u iyange man aôndo u mbakpenev je la . . . Ior mban eren iniongo i aôndo ve u mbakpenev ne sha iyange i Novemba 1, sha u ember mhii u inyom ve i he. Ka va ze deghôô yô, Mbakristu maa ngohol iniongo i í eren sha ci u mbakpenev ne hingir i ve.”

Uiniongo mbagenev. Se fatyô u ôron kwagh u uiniongo kposo kposo mba i eren sha tar jimin cii been ga. Nahan kpa, uiniongo mba i eren sha u civir ior shin mbamzough mba uumace cii, Yehova lumun ve ga. (Yeremia 17:5-7; Aerenakaa 10:25, 26) Shi doo u se fa kpaa ser, aluer iniongo i kwaghaôndo i hii ityô pe doon ga yô, ia fatyô u lun sha ishima i Aôndo ga. (Yesaia 52:11; Mpase 18:4) Akaawan a ken Bibilo a i er kwagh sha mi ken ityough 16 ki takerada ne la aa wase ú ú fa er or ka nana nyôr iyol ken uiniongo mba ityar i eren la ve í lu Aôndo ken ishima yô.