‘Me Ningir sha Atse a Ou a Nanden Nagh sha Mi, Tere’

“ME NYIAN ishô iyol; ka nahan man me ningir sha atse a Ou a nanden nagh sha mi ye, TERE.” (Pasalmi 26:6) Ka mkaanem ma Tor Davidi u tsuaa la yange yôô mcivir na u civir Yehova a mi je la. Nahan kpa, lu sha ityôkyaa i nyi ve kaa ér una “ningir sha” atse a Yehova, man una er kwagh la inja nena?

He’ Davidi yô, ityôgh ki mcivir u Yehova yange lu tabernakel man atse a nanden naagh a mi a yange i cir togula sha mi, lu ke’ gar u Gibeon ke’ imbusutarimese i Yerusalem sha shighe u mtemtor na la. (1 Utor 3:4) Atse la yange lihe kuma er mita uhar sha akur a á a anyiin la tseegh tsô, hemba ndahar a igbenke atse i yange lu u a va ta ke’ tembe u tempel u Solomon la ca je.a Nahan kpa, saan Davidi iyol kpishi a tabernakel a atse a ker la, u lu ityôgh ki mcivir u wang ke’ Iserael la.—Pasalmi 26:8.

Yange i naan iniaav mbi nanden man iniaav mbi bem man iniaav mbi iboogh sha atse la, shi i naan iniaav sha ci u ikyurior la cii sha Iyange i Iwom hanma inyom kpaa. Atse la man iniaav mbi yange i naan sha á la mba a inja he’ Mbakristu nyian. Apostoli Paulu yange pase ér atse la yange tile sha ishima i Aôndo, i̱ yange a̱ er sha mi ve A ngohol naagh ku ku kom vough la sha u yiman orumace la. Paulu kaa nahan wener: “Ka sha awashima ne man i tsegh se kwa môm bee, sha nagh ku i ne sha iyol i Yesu la ye.”—Mbaheberu 10:5-10.

Yange upristi vea vaan u va nan naagh sha atse la yô, ve vande ôôn ave shin mnger sha u wanger ayol a ve. Ka nahan ve Tor Davidi kpa yange er vough sha u ôôn ave na “nyian ishô iyol” cii ve mase ‘ningir sha atse’ la ye. Yange er kwagh “a ishima i wang man sha perapera” kpaa. (1 Utor 9:4) Yange una éé ave na sha imba gbenda ne ga yô, yange ma i lumun a mcivir na la ga—ka ‘mningir na u ningir sha atse’ je la. Sha mimi yô, Davidi yange lu Orlevi ga, nahan lu a ian i eren tom u pristi sha atse la ga. Shin er lu tor nahan kpa, lu a ian i nyôron ke’ tembe u tabernakel la tsô kpaa ga. Nahan kpa, er lu Oriserael u jighjigh yô, a dondo Tindi u Mose la nahan vaan a iniaav nagh sha u va nan sha atse hanma shighe cii. A ningir sha atse sha mhar u yange har ishima na sha mcivir u wang la.

Se fatyô u dondon ikyav i Davidi la nyian kpa? Een. Se kpa se fatyô u ôôn ave ase nyian ishô iyol shi ningir sha atse a Aôndo, aluer se na naagh ku Yesu jighjigh shi se civir Yehova a ishima i môm, se ‘mba a ave a wang, man ishima i mimi kpaa’ yô.—Pasalmi 24:4.

[Footnotes]

[Picture on page 7]

Atse la yange tile sha ishima i Yehova, i̱ ka a̱ er sha mi ve a ngohol naagh ku ku kom vough la sha u yiman orumace la