“Za Hemen!”

Mbayevmakeranta mba ken kôleeji ugen ken gar u Nezlobnaya ken tar u Russia lu henen ityakerada kposo kposo i Orrussia ugen u ngeren akaa, mba yer or ne ér Mikhail Bulgakov. Or ne nger takerada ugen lam sha Yesu Kristu dang dang, kpa a gema a wuese Satan ér ka ityagheror. Yange ve hen takerada ne ken klase a tica ve, mba been yô tica ve ta ve ikyaren sha akaa a i er ker la. Nahan kpa, wanyemakeranta ugen u lun anyom 16, u a lu Orshiada u Yehova yô, mba yer un ér Andrey, pine ian ér una nger ikyaren la ga, sha ci u imoshima na lumun un u henen takerada ne ga. A kaa ér i̱ na un ian una nger kwagh u Yesu Kristu, una pase kwagh u un fe sha kwagh na yô. Nahan tica na lumun.

Andrey nger kwagh kaa wener un ngu puun a puu mnenge u mbagenev ga, kpa un nenge wener gbenda u hemban doon u or nana fa kwagh u Yesu yô ka u ôron takerada môm ken atô u ityakerada i Ivangeli i inyiin la. Aluer or er nahan yô, “nana hen kwagh u uma u Yesu man atesen a na, a ior mba yange ve nenge a na ve nger la.” Andrey shi kaa ér: “Kwagh ugen yô, ka gbenda u i er kwagh u Satan la. Mbagenev yô, alaghga doo ve u ôron takerada u ú er kwagh u Satan ér ka ityagheror yô, kpa mo m soo takerada u ngula nahan ga.” Andrey kaa wener, jighilii yô, Satan ka jijingi u bo u ageegh, u yange undu Aôndo, gema va a ifer man mnyoon kua ican sha uumace yô. A mase kuren ngeren na la ér: “M na jighjigh mer, aluer m ôr takerada ne kpa ua wasem ga. Nahan kpa m ngu kaan mer, ishima vihim a orngeren Bulgakov ga. Kpa mo yô, hemba doon mo u ôron Bibilo sha er me fa mimi sha kwagh u Yesu Kristu yô.”

Kwaghngeren u Andrey ne doo tica na kpishi je, nahan a kaa a na ér a̱ ôr mbanongo na jimin cii kwagh u Yesu Kristu. Andrey lumun fese je. Nahan mba nyer klase iyange igen yô, Andrey tile sha ishigh ki mbanongo na ôr ve kwagh u Yesu. A pase er i hii ve un hen ér ka Yesu a lu or u hemban sha won cii hii shighe u i gba tar je yô. Been yô maa á ôr ityough ki Bibilo i môm ken takerada u Mateu sha kwagh u ku u Yesu. Kpa er shighe u i na Andrey ér a ôr kwagh la lu been yô, a kohol iyol u kuren kwaghôron na la, tsô mbanongo na kaa a na ér: “Za hemen! Ôr se, maa nyi i eree?” Nahan á za hemen, á ôr ve ivangeli i Mateu sha kwagh u nder u Yesu.

Andrey been kwaghôron yô, mbanongo na pine un mbampin kpishi sha kwagh u Yesu man Yehova. Andrey kaa ér, “Yange m er msen hen Yehova mer a̱ nam kwaghfan. Yehova ungwa msen wam la, nahan m na ve mbamlumun sha hanma kwagh u ve pinem cii!” Tica u Andrey been kwagh tesen yô maa Andrey na un kôpi u takerada u i yer ér The Greatest Man Who Ever Lived la.a Doo un je zua ga. Andrey kaa ér: “Á nam akundu kpishi sha kwaghngeren wam la shi á wuese mo sha jighjigh wam man ishimataver i m lu a mi sha jighjigh wam la kpaa. Shi á kaa ér un lumun a akaa kpishi a mo m er la.”

Saan Andrey iyol kpishi, gadia a dondo imoshima na i Bibilo i tsaase i la, nahan á venda u ôron takerada u u laha Yehova man Wan na, Yesu Kristu la. Kwagh ne wase un u kuran iyol na sha mbamhen mba ve dugh ken ruamabera ga la shi na un ian i ôron mbagenev akaa a mimi a injaa a Bibilo i er la.

[Footnote]