Iniongo I Been Makeranta U Gileadi I Sha Kwa 125 I Taver Mbamishen Ishima Ér Ve Lu Er Yeremia Nahan
SHIGHE u Geoffrey Jackson, u a lu môm ken Mbahemenev mba Shin Tine la lu lamen a ior mba kuman 6,156, mba ve va iniongo i been Makeranta u Bibilo, u Watchtower u Gileadi i sha kwa 125 ken uwer u Setemba 13, 2008 la, a kaa ér: “Klase u Gileadi ne va a mzehemen u vesen.” A tindin klase u a lu a iorov 56 mba been makeranta ne yô, a lu mbamishen mba hemban iorov 8,000 je a lu tindin sha “akighir a tar” la.—Aer. 1:8.
Anmgbian Jackson, u yange lu orkyôn u iniongo i been makeranta ne la yange pine ér, “Aluer ior na u jighjigh yô, u hemba pasen kwagha?” Been yô, maa pase akaa anyiin a a na ve mbagenev vea na or jighjigh yô. Akaa shon yô, ka: u lun a ieren i vough man u veren mbagenev ikyav i dedoo man u or haren ityesen i nan sha Mkaanem ma Aôndo man u hemban veren ishima sha u pasen mbagenev iti i Yehova.
David Schafer, u a eren tom vea Kômatii u Tesen la lam sha itinekwagh i i kaa ér: “U Kôr Cio u Fan Hanma Kwagh Kpa?” la. A taver mba been makeranta u Gileadi asema ér, vea kôr cio u “fan hanma kwagh” u una wase ve u eren tom ve u mishen cii, aluer ve za hemen u suur sha Yehova shi ve hide a ayol a ve ijime mba dondon gbendatesen u “wanakiriki u jighjigh man u fan kwagh” yô.—Anz. 28:5; Mat. 24:45.
Been yô, John E. Barr, u a lu môm ken Mbahemenev mba Shin Tine la lam sha itinekwagh i i kaa ér, “Kwagh Môm a De Paven We a Dooshima u Aôndo Ga” la. Kwaghwan u anmgbian Barr wa mba been makeranta sha dooshima la na ishima gba ve shimi, shi mbamaren vev kpa ishima i kera za ve iyol sha akaa a alaghga mbamishen mban vea tagher a mi ken tom ve u mbamishen la ga. Anmgbian Barr pase ér, “U lun ken dooshima u Aôndo la ka ijiir i dedoo man i mkpeyol i lun ken uma wase.” Kwagh môm una fatyô u paven mbamishen a dooshima u Aôndo ga, ka ve ayol a ve vea pav a Aôndo ye.
Sam Roberson, u a eren tom vea Gbaatom u Nengen sha Imakeranta i Henen Kwagh u Hemen u Aôndo la di wa mba been makeranta mbara kwagh ér ve “hua ikyondo i hemban cii” la. Aluer mba henen kwagh u tom u Yesu shi eren sha mi vough yô, vea fatyô u “haan . . . Ter Yesu Kristu” iyol. (Rom. 13:14) Been yô, William Samuelson, u a lu orvesen u Gbaatom u Nengen sha Imakeranta i Henen Kwagh u Hemen u Aôndo la pase kwagh u ka a na or nan lu a icivir yô. A pase wener, ka mnenge u or a ne or lu a icivir ga, kpa ka mnenge u Aôndo.
Michael Burnett, u a lu môm ken mba tesen ken makeranta ne tôv mbayev makeranta, ve ôr uvande-eren mba ve zough a mi ken tom u pasen kwagh shighe u ve lu ken makeranta u Gileadi la. Shin er yange i na mbayev makeranta mbagenev kpishi uharegh mba i vande pasen kwagh her kpur kpur, shighe u ve lu ken Makeranta u Gileadi ken Patterson, New York la nahan kpa, ve zua a ior mba ve soo u seer fan kwagh u Bibilo yô. Gerald Grizzle, u a eren tom vea Afishi a Nengen sha Mkohol u Vesen la tôv anmgbianev mba nomso utar, mba ve va Makeranta u Tsaase Ukômatii mba Nengen sha Ubranci la. Kwaghôron ve la wa mba been makeranta u Gileadi la ago iyol sha kwagh u vea za tagher a mi ken ajiir a á tindi ve tom u mishen la.
Ka David Splane, u a lu môm ken Mbahemenev mba Shin Tine, u yange bee makeranta u Gileadi u sha kwa 42 la yange na kwaghôron u a kaa ér, “Lu Er Yeremia Nahan” la ye. Shin er yange cier Yeremia iyol u eren tom u Yehova wa un la nahan kpa, Yehova wase un. (Yer. 1:7, 8) Kape mbamishen mbahev mban kpa Aôndo una wase ve je la. Anmgbian Splane kaa ér, “Aluer u ngu a zayol vea or yô, hide tema inya nger aeren a or la pue a a doo u ishima yô. Kpa aluer u fatyô u ngeren aeren ne cii ga yô, tese ér u fa or la tsembelee ga.”
Yeremia yange lu or u tangen iyol ga. Shighe u nenge ér una kera fatyô u zan henen a tom u Yehova na un la ga kpa er msen, nahan Yehova wase un. (Yer. 20:11) Anmgbian Splane kaa ér, “Shighe u iyol i kpe u yô, pase Yehova kwagh sha mi ken msen. Aluer u er nahan yô, a kpiligh we iyol sha gbenda u Yehova una wase u la.”
Ken mkur u iniongo i been makeranta ne, orkyôn u iniongo la umbur mba ve va iniongo la cii ér, mba been makeranta mbara hen akaa kpishi a vea er ve, mbagenev vea na ve jighjigh yô. Er vea lu eren tom ve u mishen la, ior mba sha ajiir shon vea naan ve jighjigh yô, loho ve la ua hemba lun a tahav cii.—Yes. 43:8-12.
[Ngeren u kiriki u a lu sha peeji 22 la]
NGERN U PASEN KWAGH U MBAYEVMAKERANTA
Ior va makeranta ken ityar: 6
I tindi ior ken ityar: 21
Iyenge i mba van makeranta cii ka: 56
Ve hemba anyom: 32
Ve tsa ken mimi hemba anyom: 17
Ve er tom u pasen kwagh hanma shighe anyom: 13
[Foto u sha peeji 23]
Mba Been Makeranta u Bibilo u Watchtower u Gileadi u sha Kwa 125
Ken ati a i nger shin heen ne, i nger namba mba hanma nongo sha adondo adondo, hii sha ishi yem a yem ken ijime, shi hanma nongo yô, i nger ati a ior hii ken imese yem ken iyan.
(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.