Mbampin mba Mbaôron Takerada Ne Ve Pin La

A fatyô u fan shighe u yange i mande Yesu la jighilii jee?

Mpin ne due sha ci u ka inja er kwagh u jijingi mgbegha Marku, or u ngeren Ivangeli, nger sha kwagh u ku u Yesu la kaha a u apostoli Yohane nger la nahan. Marku kaa ér: “Shighe u [mbautyaav] mande Un la, lu ahwa ataankaranyiin atetan.” (Mar. 15:25) Yohane kaa ér, shighe u Pilatu gema Yesu na Mbayuda ér ve za mande un la, “kuma er ahwa ataratar nahan.” (Yoh. 19:14-16) Ior mba pasen Bibilo na mbampase kposo kposo sha u tesen er i hii ve i lu inja er kwagh u Marku a nger la kaha a u Yohane a nger la yô. Nahan kpa, Bibilo ôr kwagh u una pase er i hii ve i lu inja er ityakerada i Ivangeli i ihiar ne ôr kwagh kposo kposo la ga. Er i lu nahan cii kpa, aluer se time sha gbenda u ior nengen shighe sha ayange la yô, a wase se.

Sha derianyom u hiihii la, agogo a tesen shighe vough lu ga, nahan i faan ihwa sha u nengen er iyange i til la. Heela tseegh ga, mlihi u sev kpa geman nahan fele fele ken atô u inyom jimin cii. Sha nahan yô, yange i ôron shighe jighilii ga. Ken Ruamabera u ken zwa Grika la, i ôr kwagh u akaa a yange er sha ahwa 9 pepe man ahwa 12 shin iyange sha tembe man ahwa 3 yô, kpa ashighe kpishi i lu u kaan ér akaa shon er nôngo u lun sha ashighe la.—Mat. 20:3, 5; Aer. 10:3, 9, 30.

Ityakerada i Ivangeli cii gba zwa môm sha kwagh u iyange i Yesu i masetyô shin tar ne la. Ityakerada i inyiin la cii, tese ér upristi man mbatamen yange ve zua imôngo sha use, maa ve na zwa i yem a Yesu hen Gomna Pontiu Pilatu. (Mat. 27:1; Mar. 15:1; Luka 22:66; Yoh. 18:28) Mateu man Marku man Luka cii ve nger ér hii iyange sha tembe nahan je, ime wa tser tar cii, “zan zan ahwa atar atetan,” shighe ne nahan, i vande manden Yesu kera.—Mat. 27:45, 46; Mar. 15:33, 34; Luka 23:44.

Ityôkyaa i môm i vesen i alaghga ia bende a kwagh u ityakerada i Ivangeli i er sha kwagh u shighe u i mande Yesu la yô, ka i ne: Yange i nengen gbidiv mbu gbidyen or sha akpa la ér ka môm ken mtsaha u yange a manden or ve i na nan yô. Ashighe agen yô, yange i gbidye or i vihi je, nan kpe. A shi nan kpa, Yesu yange hii tôôn kon u mtsaha un tswen, kpa er i gbidye un coholoo yô, hingir u a ker orgen ér nana wase un u tôôn u ye. (Luka 23:26; Yoh. 19:17) Alaghga mbagenev yange ve nenge ér ku u i wua Yesu la wa gbidiv mbu i gbidyen un la man m-mande u i mande un la cii ker, kpa mbagenev di yô ve nenge ér ka m-mande u i mande un la tseegh. Aluer yange i nenge gbidiv mbu i gbidye un la ér ka mhii u mtsaha na yô, yange a gba u shighe a kar cii ve a va mase manden Yesu sha kon ye. Alaghga a lu ityôkyaa i i ne ve shighe u Marku nger ér i mande Yesu la kaha kposo a u Yohane nger je la.

Mba ngeren Ivangeli mbagenev mbara nger Ivangeli ve ukwavmbaanyomov kar imôngo cii ve Apostoli Yohane va nger Ivangeli na ye. Sha nahan yô, yange nenge a kwagh u ve nger la. Yohane nger shighe u a nôngo u kahan u Marku a nger la, ka mimi. Kpa, kwagh ne tese ikyav wang ér Yohane tôô kwagh u Marku nger la un kpa nger nahan gedee ga. Yohane man Marku cii, Aôndo yange mgbegha ve sha jijingi na. Shin er Ruamabera a er kwagh kpishi u tan iwanger sha kwagh ne ga nahan kpa, se fatyô u nan kwagh u i er ken ityakerada i Ivangeli la jighjigh.