“Awashima Wam Kure sha Mi Vough”

Anmgbian u kwase ugen u i yer un ér Emilia yô, yange eren pania u keke, kpa á de hegen kuma anyom 15. Nahan kpa semberee ne, á hii u henen sha kwagh u iember i yange lu a mi shighe u lu eren pania la, nahan sar un u hiden shi eren pania.

Er Emilia soo u hiden eren pania nahan kpa, tom na lu yan un shighe yum, nahan kera saan un iyol ga. Kwagen la, a kaa sha ishigh ki mba a eren tom a ve imôngo la ér: “Mea eren tom ahwa kpuaa nahan ma i doomo!” Kwase u hemen hen ijiirtom na la ungwa kwagh ne, nahan a yila un a pine. Emilia kaa ér kape i lu je la. Nahan kpa, mbatomov mba hen kômpeni la cii yange i gba u vea eren tom hanma shighe cii. Nahan lu u saa una za tôô ian hen orvesen u kômpeni la, una lumun ve, Emilia una gema eren tom ahwa kpuaa ye. Anmgbian u kwase ne wa ago iyol u za nengen a orvesen ne, shi sôn Yehova ér a na un ishimataver shi a wase un una kundu ishima.

Ze yô, a cimin ishima a kaa a orvesen la sha icivir ér a pande un shighe u eren tom. A pase un ér ka un tôô shighe na u memyol u za wase mbagenev. Shi a kaa ér: “M ngu Kwaseshiada u Yehova, nahan ka m wasen ior u kaven Bibilo. Ior kpishi nyian fa mkposo u kwaghbo man kwagh u dedoo ga, nahan gba u a tese ve kwaghfan u ken Bibilo la, sha ér una wase ve u tsuan akaa a dedoo yô. Emilia kaa ér una za hemen u eren tom hen kômpeni la kpoghuloo, kpa un soo u panden shighe na u eren tom la sha er una hemba lun a shighe u wasen mbagenev yô.”

Orvesen la kegh atô zulee, nahan a kaa ér un kpa yange un vande soon ér una er tom u wasen ior. Maa a kaa ér: “Sha ci u atôakyaa a u ter ne yô, m nenge mer doo u me na u ian i u soo la. Kpa u fa er inyaregh ki i kimbin we la kia pande yô ga̱?” Emilia kaa ér un fa, shi aluer gba hange hange yô, una eren akaa ken uma na akuma akuma. Shi a kaa ér: “Kwagh u hemban doon u or a tsua u eren yô, ka u eren akaa a aa wase ior mbagenev la.” Orvesen la kaa a na ér: “M soo kwagh u ior mba ve ne ayol a ve a iyoltangen shio sha u wasen mbagenev yô.”

Er yange i gba je kômpeni la lu a na or imba ian ne ga. I na Emilia ian hegen i eren tom ayange anyiin tseegh ken kasua. Kwagh u a hembe kpiligh un iyol je yô, i seer un inyaregh, nahan inyaregh ki i kimbin un hegen la ki kwaghmôm a ki yange i vanden kimbin un la. Nahan a kaa ér: “Awashima wam kure sha mi vough!”

U hen wer u fatyô u sôron shighe wou sha er u hingir pania shin u hide u hii u eren pania kpa?

[Mkaanem ma sha peeji 32 la]

Orvesen la kaa a na ér: “M soo kwagh u ior mba ve ne ayol a ve a iyoltangen shio sha u wasen mbagenev yô”