Mbampin Mba Mbaôron Takeda Ne Ve Pin la

Mbagen mba ve ôr Bibilo hen ijiir ne kpa ve hen sha mi ga yô, ve pine mpin la. Kpa avur ne ôr kwagh u iorov uhar mba i yilan ve ér Mefibosheti yô. Aluer se hide se tôv sha kwagh u yange za hemen la yô, se fatyô u henen kwagh ker.

Tor Saulu yange lu a ônov mba nomso utaankaruhar, mbakasev uhar. Wan u Saulu u hiihii lu Yonatan. Ken masejime yô, Tor ne shi va mar wan u nomso ugen ii un iti ér Mefibosheti. Yange mar un a kwase ugen, iti i kwase la ér Risepa. Kwagh gema er yô, Yonatan kpa va mar wan u nomso, ii un iti ér Mefibosheti. Sha nahan yô, Tor Saulu lu a wan u nomso u i yilan un ér Mefibosheti la, shi wan u wan na kpa i yilan un nahan.

Hen shighe ugen la, Tor Saulu hingir ayôôso a Mbagibeon mba ve lu ken tar u Iserael la, nahan nôngo ér una tim ve kera. Ikyav tese ér yange i wua mbagenev kpishi. Man kwagh la lu shami ga cii. Sha ci u nyi? Sha ci u tsuaa ken ijime, sha ayange a Yosua la je, mbatamen mba ikyurior i Iserael vande tseghan zwa a Mbagibeon ér vea lu vea ve ken Bem.—Yos. 9:3-27.

Nahan sha shighe u Saulu la kpa ve lu eren kwagh sha iceghzwa ve la her. Kpa Tor Saulu kera wa iceghzwa la ikyo ga. Lu nôngon ér una tim Mbagibeon kera. Kwagh la yange na yô, ‘[ibo] i awambe lu sha Saulu kua ya na.’ (2 Sam. 21:1) Ken masejime yô, Davidi hingir Tor. Nahan Mbagibeon mba yange ve war la va ôr un kwagh u vihin kpishi u Tor Saulu er la. Tsô Davidi pine ve kwagh u ve nenge ér gba u a er ve, ibo i awambe i kwaghbo u Saulu er la ia kar kera, nahan Yehova una haa iveren sha tar u Iserael ua doo yô. Kpa Mbagibeon kaa ér i kimbi ve inyaregh ga, ve gema ve kaa ér i na ve ônov mba nomso utaankaruhar, mba or u yange “wa ishima u timin” ve la, vea wua. (Num. 35:30, 31) Nahan Davidi er kwagh u ve ôr la.—2 Sam. 21:2-6.

Saulu vea Yonatan yange ve vande kpen ken utya cii ve shighe ne ye. Kpa Mefibosheti, wan u Yonatan la yô lu uma her. Shighe u lu cuku la je aikyôr sombo un, kera zenden ga. Nahan yange wa uwegh sha num u ter na u tamen ta sha Mbagibeon la ga. Davidi yange er iceghzwa vea Yonatan ér vea lu ijende, man iceghzwa ne lu sha ci u wasen ônov mba Yonatan kpaa, kua wan na Mefibosheti. (1 Sam. 18:1; 20:42) I ôr kwagh u yange er ne ér: “Tor [Davidi] yima Mefibosheti, wan u Yonatan, wan u Saulu, sha ci u mbum u TER u a lu hen atô ve la.”—2 Sam. 21:7.

Nahan kpa, Davidi er kwagh u Mbagibeon kaa la. Yange na Mbagibeon ônov mba Saulu mba nomso uhar. U môm lu u i yilan un ér Mefibosheti la, kua ônov mba ônov mba Saulu mba nomso utaan. (2 Sam. 21:8, 9) Kwagh u Davidi er ne na yô, ibo i awambe kera lu sha tar u Iserael ga.

Yange i gba eren kwagh ne tsô ga. Tindi u Aôndo yange tese kwagh ne wang. Tindi la kaa ér: I “de woo ônov sha ci u isholibo i uter ga”. (Dut. 24:16) Ônov mba Saulu mba uhar mbara kua ônov mba ônov nav mba utaan mbara yange vea lu iyol ishô yô, Yehova ma lumun ér i er kwagh u yange i er a ve la ga. Tindi la shi kaa ér: “Hanma or ka sha ci u isholibo i nan iyol i nan á wua nan ye.” Nahan kwagh ne tese ér iorov utaankaruhar mba hen tsombor u Saulu mban yange ve er kwagh sha u keren gbenda u timin Mbagibeon. Sha nahan yô, iorov mba utaankaruhar mban cii kpe sha ci u isholibo ve.

Kwagh ne tese ér, aluer or er kwagh shami ga man nan ngu palegh iyol, henen shin kaan ér nan er ka kwagh u i kaa ér nana er yô, nana lu a ishô ga. I ôr injakwagh igen sha kwaghfan ér: “Sôr gbenda u angahar a ou u̱ lu vaanaa, man igbenda you cii kpaa i̱ lu taveraa.”—Anz. 4:24-27; Ef. 5:15.