Ityough 12
U Ngu Iyol ken Kwagh u Hange Hang
1, 2. (a) Er nan gbenda u ú eren a uma wou la kwagh a gbe shamini? (b) Ka an kpaa kwagh a gbe nan shamini, man ka sha ciu nyi?
ER Ú EREN á uma wou la kwagh gba shami. Tese er ú vá zua a msaanyol ken hemen ga yô á lu ahenge a van. Ken masejime yô ú va kar kera aa tar ne imôngo ga yô ú va war ú nyôr ken tar u perapera ú he ú Aôndo á lu van a mi hen ape ú lu uma gbem sha won la.—1 Yohane 2:17; 2 Peteru 3:13.
2 Kpa er we u lu eren a uma wou la kera ka we tseegh kwagh a gbeu sha mi ga. Bende a mbagenev kpaa. Kwagh u ú eren la ngu a bende sha a ve kpaa. Ikyav i tesen, aluer mbamaren ough vea lu uma yô, kwagh u ú eren la una va ve a icivir ga yô á lu kunya. Bibilo i kaa er: “Wan u fan kwagh ka nan na i saan ter u nan iyol, kpa ibumewan yô, ka nan na ngô u nan ishima i zunguluu.” (Anzaakaa 10:1) Kwagh u hemban lun u vesen yô, er ú eren á uma wou la cii bende a Yehova Aôndo. Á fatyô u nan un msaanyol ga yô ishimavihin. Sha ciu nyi? Ka sha ciu kwagh u hange hange u we kpaa ú lu ker ne.
UUMACE VEA NA JIGHJIGH HEN AÔNDO KPA?
3. Yange Satan naha Yehova tar sha nyi?
3 Ka Satan Diabolo yange va á kwagh ne ye. Á va á mi shighe u yange mee Adam vea Ifa ve vihi tindi u Aôndo ve hingir mba kohol un ken ihyembeto sha ishigh ki Aôndo la. (Genese 3:1-6) Shi wase u nan Satan u henen ken ishima er un zua a atôakaa a za tilen sha ishigh ki Yehova nahan un tar kaan er: ‘Ior mba civir we kpa ka sha ci u akaa a ve zough a mi hen a we yô. Nam a se ian kpeghee tsô me gema hanmaor hen a we kera.’ Mkaanem man yô ma ken Bibilo nahan kpee ga, kpa kwaghôron u Satan a Aôndo tese er yange ôr kwagh za nahan. Bibilo i pase kwagh ne ken takerada u Yobu.
4, 5. (a) Ka an yange nan lu Yobu? (b) Kanyi kwagh yange i er sha sha ayange a Yobu laa?
4 Yange Yobu lu uma shighe u ihyembeto i ken sule u Eden la i er anyom kar uderi kpishi nahan. Un lu or u perapera man u jighjigh sha ishigh ki Aôndo. Kpa yange kwagh gba Aôndo shin Satan sha jighjigh u Yobu la je kpa? Bibilo i tese er yange kwagh gba shami. i pase se kwagh u mze u Satan yange za tile shaala sha ishigh ki kwavjir u Yehova yô. Yô ver ase ikyav sha itine kwaghôron ve la:
5 “Nahan iyange igen ônov mba Aôndo va, va tile sha ishigh ki TER, Satan di kpaa va a ve imôngo. Tsô TER pine Satan er: U due hana? Satan gema kaa a TER er: Ka ken ijende wue wue shin tar, u kôndon man u senen shin u. Nahan TER pine Satan er: U fa kwagh u wanakiriki Wam Yobu dedoo kpa? Gadia ma or kuma sha a na shin tar ga, ka or u mimi, u perapera, u cian Aôndo, palegh kwaghbo.”—Yobu 1:6-8.
6. Ka nyi kwagh Bibilo i tese er yange i er sha ayange a Yobu laa?
6 Ka sha ci u nyi yange Yehova ôr sha ato a Satan er Yobu ka or u mimi? Wanger, yange ityôkwagh lu u̱ fan aluer Yobu una lu aa jighjigh hen Yehova shin una lu a mi ga kpaa. Hen sha kwaghpinen u Aôndo la er, “U due hana?” man ikyar i nan i Satan, “Ka ken ijende wue wue shin tar, u kôndon man u senen shin u.” Kwaghpinen kua ikyar i nan i Satan ne tese er yange Yehova lu nan Satan ian sha u á yar tom sha tarnahan u yange kaa er una fatyô u geman ior hen Aôndo kera la. Nahan, Satan yange na ikyar sha mpin u Yehova sha kwagh u jighjigh u nan u Yobu la nena?
7, 8. (a) Yange Satan kaa er Yobu yange lu civir Aôndo sha nyi ityôkwagha? (b) Sha u sôron kwagh la yô yange Yehova er nena?
7 “Tsô Satan gema kaa a TER er: Ka gbilin Yobu a cie Aôndo yee? U wa un igyar, U kase un a ya na kua akaa a a lu a mi cii gaa? U ver tom u ave na dedoo, uzendenya nav kpaa seer kpishi shin tar. Kpa naregh ase uwegh Ough, bende akaa a a lu a mi la cii, tsô una venda U sha ishigh Yough je!”—Yobu 1:9-11.
8 Sha ikyar i nan na ne Satan lu van a ityôikyaa i jighjigh u nan u Yobu hen Aôndo. ‘Yobu cie U,’ ka pe Satan sendegh la, ‘ka sha ciu akaa a u ne un yô, ka sha ciu a soo U yum ga.’ Satan shi na ityôikyaa er yange Yehova lu yaren tom a zegeutaha na la sha gbenda u mimi kpee ga. ‘U kor un hanma shighe,’ ka pe a sendegh la. Sha u kulen kwagh ne yô, Yehova kaa er: “Yô, nenge, akaa a a lu a mi cii nga sha ikev you; kpa sha iyol na jim yô, de ze uwegh ga.”—Yobu 1:12.
9. Ka azaiyol u nyi yange Satan va Yobu a mini, man za kule nena?
9 Hen shighe la je Satan hii u nan Yobu ican. A tim Yobu ilev purututu sha u wuan i shin sha u iin a ii kpaa. Shi ônov mba Yobu mba ve lu 10 mbara cii wua ve cica. Shi kpeghee tsô akaa a Yobu yange ma tim cica, je kpaa a tile sha jighjigh hen Yehova heregh. A tuhwa Aôndo ga cii. (Yobu 1:2, 13-22) Kpa yange lu mkur u kwagh ga.
10. Kanyi i tese er yange Satan gba uwer ga?
10 Shi Satan za due sha ishigh ki Yehova a mbatyomov mbagenev. Shi Yehova pine Satan aluer una nenge a jighjigh u nan u Yobu yô shi a kaa er: “Man shi a kusu mimi na taveraa.” Tsô Satan gema kaa er: “Kwavyolough sha kwavyolough; mimi je, hanma kwagh u or nan lu a mi cii, nana na sha ci u uma u nan. Naregh ase uwegh Ough, bende ikuhe na kua inyam na, tsô una venda U sha ishigh Yough je.”—Yobu 2:1-5.
11. (a) Ka ameen a nyi yange Satan shi va Yobu a mini? (b) Shi kule nena?
11 Sha u nan ikyar yô, Yehova na Satan ian i eren Yobu hanma injakwagh i a feityô u eren cii, kpa Aôndo kaa a na er: “Kpa ka di uma na tsô de ye.” (Yobu 2:6) Nahan Satan maa haa Yobu angev mbu kpilighyol. Yobu yange ya ican je sôn er guda ma un kpe. (Yobu 2:7; 14:13, 14) Kwase na kpaa kera ta ikyaa ken ana ga, kpa gema kaa er: “Venda Aôndo, yô, kpe kera.” (Yobu 2:9) Kpa Yobu venda u eren nahan. “Zan zan me kpe je kpaa, me gbihi mimi wam ga,” ka pe yange Yobu kaa je la. (Yobu 27:5) Yobu tile sha jighjigh hen Aôndo heregh. Nahan imbwase i yange Satan lu kaan er Yobu ngu civir Aôndo sha ciu akaa a á lu á mi kpa ka sha dooshima ga la yange kwagh la tese er ka aie. Shi kwagh la tese er Satan una fatyô u yangen hanmaor er nana ta Aôndo kera ga.
12. (a) Yange Yobu na Aôndo ikyar sha tarnahan u Satan la nena? (b) Jighjigh u nan u Yesu na hen Aôndo la yange tese er nyi?
12 U hen wer yange Yehova nenge sha jighjigh u Yobu la nena? Yange na un msaanyol kpishi je! Mkaanem ma Aôndo wa se kwagh er: “Wan wam, lu orfankwagh, na i saan mo iyol, sha er me gema me kaa imo a or u a laham yô.” (Anzaakaa 27:11) Ka Satan a lahan Yehova ye. Kpa jighjigh u Yobu la na Aôndo msaanyol ken ishima. Kwagh ne na Aôndo ikyar sha ilyahan i Satan shin tarnahan na u yange kaa er uumace vea fatyô u civir Un ken ican ga la. Mbagenev kpishi kpa ve na Aôndo inja ikyar la. Ikyar i hemban lun tseer tseer yô ka i sha ikyev i or u waeng ka Yesu je la. Yange tile sha mimi na dôung hen Aôndo shin er yange Satan va un aa akaren man ameen nahan kpaa. Shi kwagh ne tese er or u waeng Adam kpa yange ma fatyô u eren nahan aluer yange una soo yô, shi Aôndo yange ban a perapera sha u keren ikyo i wan hen or ga.
KA HAN U TILI?
13. (a) Gbenda u ú eren a uma wou la bende sha kwagh ne nena? (b) Se fatyô u nan Aôndo msaanyol shin vihin un ishima sha nyi?
13 Sha kwagh u uma wou ye? Alaghga u ngu henen wer er ú eren a uma wou la kwagh gba shami ga. Kpa kwagh gba shami. Wea fa nahan shin wea fa ga kpaa, ieren la ngi tesen mtile u ken vegher u Aôndo ga yô ken vegher u Satan. Yehova weu ikyo, shi a soo er una nenge er we ú ngu civir un sha er ú va lu uma gbem sha won ken paradiso shin tar ne yô. (Yohane 3:16) Shighe u yange Mbaiserael vea hemba Aôndo ato yô, yange i nyoon un iyol shi i vihi un kpaa. (Upasalmi 78:40, 41) Ieren i ken uma wou la ka i nan Aôndo msaanyol shin ka i vihin un ishima? Sha mimi yô, u nan Aôndo msaanyol yô gba u ú hen sha u fan atindi a na man u kuran a kpaa.
14. (a) Sha kwagh u yaven a kwase yô, ka atindi a nyi se kura keng sha u nan Aôndo msaanyolo? (b) Ka sha ciu nyi u peren atindi la i lu ifere?
14 Awashima u Satan jim yô ka u meen ior sha u ve̱ per atindi aa Aôndo sha kwagh u tahav vev mbu maren la, kua sha kwagh u mlu u ken ivese man tsombor cii. Atindi a Aôndo a ne sha u kuran msaanyol wase la kaa er mba ve zough ivaa ga yô ve de yaven a kwase shin nomsoor ga, shi mba ve er ivaa di yô ve yaven a kasev vev tseegh kua noov vev tseegh. (1 Mbatesalonika 4:3-8; Mbaheberu 13:4) Zum u ka a per tindi u Aôndo yô, ka i mar mbayev kpa ve kera lu a mbamaren mba nengen sha a ve sha dooshima ga. Alaghga ungô mbara vea fatyô u vihin iyav, wuan mbayev ken uya. Kwagh u seer shami yô, mba ve eren ijimba mbara ka ve tôô iangev mbi bov mbi mbia fatyô u va vihin mbayev mba yange vea mar la kpaa. Kwagh ne ka ieren i shami ga, ka ifer i eren sha ishigh ki Aôndo, u za yaven a kwase shin or u ú er ga la. Yange Yobu kaa er: “Aluer ishima yam ia nzughul sha isharen i kwase, man mea lian hen hunda u or u nan we ndor a mo yô, . . . ka kwaghbo u a kom mtsaha sha ikev i mbaajiriv je la.”—Yobu 31:1, 9, 11.
15. (a) Aluer se er idya yô, ka an se ne i doo nanaa? (b) Ka sha ciu nyi i doo u wan atindi a Aôndo ikyo?
15 I de kpiligh se iyol ga sha er tar u i lu Diabolo a lu tor u u ne ua na sha u i beeu er ka vough shi ka pe i gbe u ma i lu je la sha u we yaven á or u ú zough ivese a nan ga kpaa. Kpa aluer ú er nahan yô, ka an ú lu eren ishima i nanaa? Ka Satan, ka Yehova ga. Sha u nan Aôndo msaanyol yô, saa ne ‘yevese idya’ keng. (1 Mbakorinte 6:18) Ka mimi, u tesen jighjigh sha ishigh ki Aôndo ka kwagh u peesa ga. Hen Yobu kpaa yange i lu peesa ga. Kpa umbur, gema tese kwaghfan sha u wan atindi a Aôndo ikyo la. Aluer ú er nahan yô hegen je á hemba saan we iyol. Kpa, kwagh u hemban lun u vesen yô, ú lu tilen ken vegher u Aôndo sha ityôkwagh la shi ú lu nan un msaanyol kpaa. Shi una nau iveren i uma u tsôron ken msaanyol shin tar.
16. (a) Yange i na Yobu iveren sha jighjigh na u nan la nena? (b) Sha iyolvihin i Satan a ve a mi la, á kaa er nyi, er iwoo i ônov mba Yobu mba 10 mbara nahan?
16 Ka mimi, yange Satan na Yobu hingir or u ibanave shi tim ônov nav mba 10 mbara kpaa cica. Anyiman nga ga yange kwagh saa Yobu zegenan je lu ashe tugh ga. Kpa er Yobu yange tile sha jighjigh yô, Aôndo na un iveren hemba mlu na u tsuaa u yange lu shami cii man Satan mase van a ikyaren sha iyol na la. Shi Yobu hide mar ônov 10. (Yobu 42:10-17) Kwagh u genegh yô, se fa ser ônov mba Yobu mba 10 mba yange Satan wua la cii á va nder ve shin mbakpenev. Ka mimi, kwaghbo môm shin atsan a i ne Satan ian sha u eren a la cii a Ter u dooshima, Yehova, una va sôr ga kpa nga ga.
17. Hii nan gbenda u se eren a uma wase la kwagh a gbe shamini?
17 Nahan kwagh u ú lu ami ken ishima you yô fa wer er ú lu eren a uma wou la cii kwagh gba shami. Kwagh gba shami sha ishigh ki Yehova Aôndo kua shi Diabolo Satan. Kwagh ngu nahan sha ciu we kpaa ú ngu iyol ken kwagh u fan shin uumace vea luun a jighjigh u nan hen Aôndo shin vea luun a mi ga kpaa ne.
[Foto u sha peeji 106 la]
Yange Aôndo na ikyar sha tarnahan u yange Satan kaa er or a fatyô u tilen sha jighjigh hen Aôndo sha shighe u ican ga la
[Foto u sha peeji 110 la]
U yaven a kwase shin or u ú zough ivaa a nan ga la ka ifer sha ishigh ki Aôndo
[Foto u sha peeji 111 la]
Yehova yange na Yobu iveren sha akaa kpishi sha jighjigh na la hemba akaa a yange vande lun a mi la