Tar U He Ú Aôndo A Tende Zwa U Van A Mi la

BIBILO, Mkaanem ma Aôndo á ne í nger la, na se ishimaverenkeghen tsung zum u i er mkaanem man ne, ér: “Se mba keghen Usha mba hev je man tar u he u perapera una tema ker yô, sha ityendezwa Na la.”—2 Peteru 3:13.

“Usha mba hev” mban kanyi? Bibilo ter sha, sha gbaa u hemen. (Aerenakaa 7:49) Nahan “Usha mba hev” la ka gomoti u he u una hemen sha tar yô. Í yila un ér ka u he, gadia una kar a tile sha hemen ú ú lu hegen ne; shi ken mkur u awashima u Aôndo kpaa, ka kwagh u he. Ka Tartor shon u ngise Yesu tese se ér se̱ sônon je ne. (Mateu 6:10) Er Aôndo á lu Imbor i Tartor shon, shi un á lu sha yô, ka nahan ve í yer ú ér “tartor u Sha” ye.—Mateu 7:21.

“Tar u he” la di gema kanyi? Ka gburumaa u taregh u he ga, gadia Bibilo pase wang je ér ior a lu sha tar gbem sha won. Nahan “tar u he” la ka mtem u he u orumace. Mtem la una lu u he sha ci u hen zum la á tim aferaior sha tar kera. (Anzaakaa 2:21, 22) Ior mba vea lu uma sha tar hen shighe la cica cii vea ungwan imo i Orgbanakaa shi vea eren ishima na kpaa. (Pasalmi 22:27) Mba lôhôn ior sha tar cii hegen ér ve̱ hen ve̱ fa kwagh u Aôndo a soo la, nahan ve̱ nyôôso uuma vev, ve̱ gema eren kwagh u a soo la. We ú ngu eren kwagh ne kpa?

Ken tar u he ú Aôndo yô, hanma or cii nana wa hemen Na ikyo. Aôndo doo ú ishima je ka sagher we iyol u ungwan imo na kpa? (1 Yohane 5:3) Ikyav tese ér ú ngu eren nahan hen ya wou kpa? shin sha makeranta kpa? shin inja uma you yô í tese imba ikyo i wan ne kpa?

Ken tar shon u he la, uumace cii vea gema civir Aôndo u a lu u mimi la ken mzough kangenaa. We ú ngu civir Un shon u a gbe sha man tar la kpa? Sha mimi je gbenda u ú civir Aôndo la na ú, ú ngu ken mzough vea mba ve civir a we imôngo la tar sha won cii, kua akuraior a sha tar cii, man hanma zwa cii kpa?—Pasalmi 86:9, 10; Yesaia 2:2-4; Sefania 3:9.

[Ngeren u kiriki u a lu sha peeji 17 la]

Aôndo Shon U A Er Uityendezwa Mban La

Ka Un a gbe sha u se nengen a mi ne kua tar ú ú lu kpuun ne cii ye. Ka un Yesu Kristu yange yila ér “Aôndo u mimi tswen” ye.—Yohane 17:3.

Uumace kpishi mba civir mbaaôndo mba í lu ve ayol a ve ve er yô. Mbagenev umiliôn imôngo mba gur inya mba civir ieev mbì mbí lu a uma kpaa ga yô. Mbagenev di yô ka mbamzough mba uumace ve ver la ve suur sha mi ye, mbagenev di ka mbamhen mba kwaghfan u taregh, shin asaren a ve. Mba ve senge ér mba dondon Bibilo je kpa, ka ve cii ve civir iti i un shon u i yer ér ka “Aôndo” u mimi la, ga.—Duteronomi 4:35.

Orgbanakaa ôr kwagh sha iyol na, kaa ér: “Kpa iti Yam i TER (ka Yehova je la) ne yô, ve fa ga.” (Ekesodu 6:3) Ken ijô i yange i nger Bibilo a mi hiihii la yô, iti ne due war kuman kwa 7,000. Yesu Kristu ngise tese mbadondon nav ér ve̱ eren msen, ve̱ kaan ér: “Ter wase u Sha, i tsegha iti You.”—Mateu 6:9.

Aôndo u mimi ne ngu nan jimi? A ôr kwagh sha iyol na á kaa ér un ngu Aôndo u “mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je,” kpa tsaha yô, mayange un den tsahan mba ve per atindi na sha apera la ga. (Ekesodu 34:6, 7) Hii sha igbetar je, kwagh u a er a orumace la tese ér kwagh u í er sha a na heen ne ka u mimi vough.

Ka u a tsegha iti la, kua un u í yer un sha iti shon la kpaa keng. Er í lu un a lu Tor u Hemban sha won cii yô, nahan á kuma u se ungwan imo na, shi se civir un a ishima i môm kpaa. We yô, ú eren a na nahan kpa?

[Ngeren u kiriki/​Foto u sha peeji 18]

‘Usha Mba Hev man Tar u He’ la Vea Va a Mbamgem mba Nyiivi?

Á gema tar ua hingir Paradiso Luka 23:43

[Ngeren u kiriki/Foto u sha peeji 19]

Ú Zua a Mtsera Kpa?

Aôndo eren aie ga!—Titu 1:2.

Yehova yôô ér: “Kwaghôron Wam . . . una hide her a Mo gbilin ga, kpa una er kwagh u M we ishima yô, ikôr ia lagh un sha kwagh u M tindi un u eren yô.”—Yesaia 55:11.

Yehova ngu gban “Usha u he man tar u he kpaa.” Gomoti shon u sha la hii tom kera kpaa. Imaagh ki “tar u he” la kpa í vande tímin kera.

Mba er akaa a kpilighyol agen a “Usha u he man tar u he” la vea va orumace a mi cii yô, Mpase shi kimbir kwagh u Aôndo iyol na u a lu Tor u Hemban Cii la ngise ôr yô, ér: “Nenge M ngu geman akaa cii hingir a he.” Shi a kaa ér: “Nger, gadia akaaôron ne ka a jighjigh man ka a mimi kpaa.”—Mpase 21:1, 5.

Mpin u a lu hegen sôngo sôngo yô, ka un ne, ér: Se mba nyôôso iyol hegen er i doo la sha er se kpa á va wa se ken ior mba vea lu ken “tar u he” ú ua lu sha ikyev i “Usha u he” la kpa?