“Gbenda man Mimi man Uma”

1, 2. Er nan ve i lu u se fatyô u kporom hen Yehova a iwasen shio ga, man Yesu Kristu wase se sha gbaa ne nena?

Í LU nahan u tsume gbenda vee? Alaghga u umbur ma shighe u yange u lu zan hen ya u ma huror wou shin ma anmgbian wou ve u za tsume gbenda yô. Er yange u lu zan sha gbenda u ú fa u ga la nahan, u tile u pine or gbenda kpa? Tôô ase wer or u yange u pine nan gbenda la nan tese u gbenda tseegh ga, kpa er nan lu or u fan kwagh yô, nan kaa a we ér: “Dondo sha a mo, m za a we hen ya u huror wou la.” A̱ shi nan kpa, ishima yange i gba u shimi kpishi!

² Se fatyô u kaan ser Yesu Kristu er imba kwagh la a vese. Se tseegh yô, ma se fetyô u yan ikyar a Aôndo ga. Er uumace ve ye dyako u isholibo man myen yô, uumace tsume gbenda, “mba paleghaa a uma u Aôndo.” (Mbaefese 4:17, 18) Gba u a wase se sha er se hide se tsera sha gbenda yô. Yesu, or u veren se ikyav u a ngee a erdoo la er kwagh hemba di u tesen se a tese gbenda tseegh tsô la. Er i pase ken Ityough 1 nahan, Yesu lôhô se ér: “Va dondo sha a Mo.” (Marku 10:21) Nahan kpa, shi a na se ityôkyaa i vesen i í doo u se lumun mlehe na ne yô. Sha shighe ugen la Yesu kaa ér: “Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.” (Yohane 14:6) De se time nen sha atôakyaa agen aa a ne ve i lu u saa se kar hen Wan keng ve se fatyô u zan hen Ter la. Se faan atôakyaa ne a wanger se yô, se mase nengen er mimi je Yesu a lu “gbenda man mimi man uma” kpaa yô.

 3. Er nan ve i lu sha ikyev i Yesu tseegh se fatyô u zan hen Aôndoo?

³ Kwagh u hiihii yô, ka sha ikyev i Yesu tseegh se fatyô zan hen Aôndo ye, sha ci u Yehova tsua Wan na, na un tom u hemban lun a inja cii.a Ter ver un ér a lu ityough sha u kuren mbaawashima Nav cii. (2 Mbakorinte 1:20; Mbakolose 1:18-20) De se time nen sha kwagh u yange er ken sule u Eden, ape nomsoor man kwase u hiihii la kohol Satan sha u hemban Yehova ato la, tsô se mase kaven tom u hange hange u Wan a lu a mi la.—Genese 2:16, 17; 3:1-6.

 4. Ihyembeato i ken sule u Eden la yange i va a ikyaa i nyi, man lu nyi Yehova wa ishima u eren sha er una kure ikyaa nee?

⁴ Ihyembeato i ken Eden la yange i va a ikyaa i í bende a akaa a Aôndo a gbe a la cii yô, ikyaa shon yô ka i ne: Yehova Aôndo ngu hemen akaa aa a gbe a la sha inja je kpa? Er gba u a kure ikyaa ne yô, Yehova tsua wan na u ken jijingi u vough la ér a va shin tar ne. Kwagh u gba u wan u ken jijingi ne una er la lu kwagh u hange hange kpishi—lu u una na uma na sha u tesen er hemen u Yehova u lu u vough yô, shi una lu ipaan sha ci u uumace kpaa. Lu u wan u i tsua ne una lu jighjigh zan zan ku na, nahan una fatyô u sôron mbamzeyol mba ihyembeato i Satan i ve a mi la cii. (Mbaheberu 2:14, 15; 1 Yohane 3:8) Kpa Yehova lu a ônov mba ken jijingi umiliôn umiliôn, mba ve lu vough yô. (Daniel 7:9, 10) Lu hanmô ken ônov nav mban yange tsua ér nana er tom u ú hembe lun hange hange cii nee? Yehova tsua “Wan Na u môm môm,” u i va gema yilan un ér Yesu Kristu la.—Yohane 3:16.

5, 6. Yehova yange tese ér un ngu a vangertiôr ken Wan na nena, man vangertiôr la har sha nyi?

⁵ Doo u a kpiligh se iyol er hii ve Yehova tsua un yôô? Mayange ga! Ter na Wan na u môm môm ne jighjigh tôô ave sha. Yehova tsengaôron ér Wan na una nyiman jighjigh na ga, shin er una ya atsan kposo kposo nahan kpaa; a ôr kwagh ne anyom kar uderi imôngo cii ve Wan ne mase van shin tar ne ye. (Yesaia 53:3-7, 10-12; Aerenakaa 8:32-35) Nenge ase mzeyol u yange ma fatyô u duen ken kwagh u Aôndo tsengakaan ér Wan una nyiman jighjigh na ga ne yô. Wan u Aôndo lu a ian i eren kwagh u sha ishima na, tsuan kwagh u a soo yô, vough er mbatyomov man uumace kpa ve lu a mi nahan. Nahan kpa, Yehova lu a vangertiôr ken a na je tsengaôron kwagh u jighjigh u Wan na. Vangertiôr ne har sha nyi? U tan a ta aningir ga yô, yange har sha mfe. Yehova fa Wan na kôr inya, shi a fa er i gbe Wan na ishima tsung u eren ishima Na yô. (Yohane 8:29; 14:31) Ter doo wan ishima, Yehova di kpaa Wan Na doo un ishima. (Yohane 3:35) Mdoo u Ter vea Wan ve doo ayol a ve la magh ve imôngo, shi kwagh ne na yô, ve na ayol a ve jighjigh je kwagh môm una fatyô u paven ve ga.—Mbakolose 3:14.

⁶ Er Wan a lu a tom u hange hange shi Ter na a ne un jighjigh shi dooshima a magh ve imôngo yô, kera kpiligh se iyol er i hii ve i lu sha ikyev i Yesu tseegh se fatyô u zan hen Aôndo ga. Shi ityôkyaa igen kpa ngi, i í ne ve i lu Wan tseegh una fatyô u hemen se zan a vese hen Ter yô.

7, 8. Er nan ve Yesu yange kaa vough ér ma or fa Ter ga “saa Wan” tseegh-le?

⁷ Akaa nga a i gbe u se er ve se fatyô u zan hen Yehova yô. (Pasalmi 15:1-5) Ma or môm kpa fa kwagh u se er ve se kura atindi a Aôndo shi una lumun se la hemba wan ga. Yesu kaa ér: “Akaa cii Terem gema a, wam sha ikyev, man shi ma or fa Wan ga, saa Ter tseegh, man shi ma or fa Ter kpaa ga, saa Wan, man shi hanmô u Wan [a] we ishima u pasen nan yô.” (Mateu 11:27) Se nenge nen er i hii ve Yesu yange kaa vough, a u kehen a kwaghôron shio ér ma or fa Ter ga “saa Wan” tseegh yô.

⁸ Er Wan a lu “Waniunda ken akaa a i gbe a cii” yô, hemba ngun kôôsôô a Yehova a hanma orgen cii. (Mbakolose 1:15) Hen ase sha kwagh ne tsô u nenge mlu u kôôsôô u lu hen atô u Ter man Wan, zum u ve lu ve uhar tseegh sha uicôronmbaashighev, sha mhii u igbetar zan zan shighe u i va kar gban mbatyomov mbagenev kpaa la. (Yohane 1:3; Mbakolose 1:16, 17) Nenge imba er Wan lu a ian i civirigh i fan mbamhen mba Ter na sha akaa kposo kposo shi henen fan ishima i Ter na man atindi a na kua igbenda na shighe u lu vea na la sha wono! Sha mimi yô, aluer i kaa ér Yesu hemba fan Ter na a hanma orgen cii kpa mba kehen a kehe a kwaghôron ga. Mlu ve u kôôsôô ne na yô, Yesu fatyô u pasen kwagh u Ter na sha igbenda i ma orgen môm ma nan pase ga yô.

9, 10. (a) Ka sha nyi igbenda nahan Yesu yange pase kwagh u Ter naa? (b) Aluer se soo ser Yehova a lumun se yô, gba u se er nyi?

⁹ Atesen a Yesu la tese ér yange fa mnenge u Yehova sha akaa vighe vighe shi fa kwagh u A soo ér mbacivir un ve eren la kpaa.b Yesu pase kwagh u Ter na sha gbenda u dedoo ugen kpaa. A kaa ér: “U nan nenge a Mo yô, nan nenge a Ter je ve.” (Yohane 14:9) Yesu dondo ikyav i Ter na vough sha akaaôron a na cica cii man sha aeren a na kpaa. Nahan ka sea ôr kwagh u Yesu ken Bibilo sha kwagh u mkaanem nam ma lun a tahav shi doon u ungwan, ma yange ôron ken ityesen na, kua kunya u ú kôron un a ior ve been ve angev la, man mhôônom ma yange ma kôr un kwagen ve vaa la yô, ka se mase kaven ser yange a lu Yehova kpa ka akaa a ma ôr shi ma er vough je la. (Mateu 7:28, 29; Marku 1:40-42; Yohane 11:32-36) Mkaanem ma Wan kua aeren a na pase igbenda i Ter man ishima na vough, a mshi shio. (Yohane 5:19; 8:28; 12:49, 50) Nahan yô, aluer se soo ser Yehova a lumun se yô, gba u se dondon atesen a Yesu kua ikyav na la kpaa.—Yohane 14:23.

¹⁰ Er Yesu a fe Yehova tsembelee shi a dondon ikyav na vough yô, kera taver u kaven er i hii ve Yehova a tsough Wan ér a̱ lu gbenda u zan hen Ter ga. Er hegen se fe er i hii ve i lu sha ikyev i Yesu tseegh or nana fatyô u van hen Yehova yô, de se time nen sha inja i mkaanem ma Yesu ôr ér: “Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo” la.—Yohane 14:6.

11. Er nan ve i lu sha ikyev i Yesu tseegh Aôndo una fatyô u lumun ér se ya ikyar a naa?

¹¹ Se hila nenge er i lu sha ikyev i Yesu tseegh se fatyô u van hen Aôndo yô. Kpa seer tôvon sha kwagh ne, fa inja i mkaanem man ma lu a mi hen a vese jighilii yô. Yesu ka “gbenda” sha ci u ka sha ikyev na tseegh se fatyô u yan ikyar vea Aôndo sha inja i una lumun se ye. Er nan ve kwagh a lu nahana? Yesu yange er kwagh sha jighjigh zan zan kar kpen, nahan a na uma na sha u a lu ipaa sha ci wase. (Mateu 20:28) A nagh ku ipaan kun shio yô, se fatyô u van hen Aôndo ga cii. Isholibo ka kwagh u yisan uumace u van hen Aôndo, gadia Yehova ngu icighan, nahan mayange una lumun isholibo ga. (Yesaia 6:3; 59:2) Kpa nagh ku Yesu la kar a kwagh u yisan la kera; nagh kura hingir iwom i hange hange sha ci u asorabo a ase. (Mbaheberu 10:12; 1 Yohane 1:7) Aluer se lumun nagh ku Aôndo a ne sha ikyev i Kristu ne shi se na nagh kun jighjigh yô, Yehova una lumun se. Ma gbenda ugen môm ngu u a “hime se a Aôndo” sha won ga.—Mbaromanu 5:6-11.

12. Ka sha avegher a nyi Yesu a lu “gbenda”?

¹² Yesu ka “gbenda” sha gbaa u msen u eren. Ka sha ikyev i Yesu tseegh se fatyô u van hen Yehova ken msen, shi se lu a vangertiôr ser una ungwa mzamber wase u sha ishima i môm la ye. (1 Yohane 5:13, 14) Yesu iyol na kaa ér: “Nyityô kwagh i ne sôn Ter yô, Una na ne i ken iti Yam . . . Sôn nen, né ngohol, sha u iember yen ia hôm yô.” (Yohane 16:23, 24) Se fatyô u eren msen hen Yehova ken iti i Yesu, nahan yilan Un vough ser “Ter wase.” (Mateu 6:9) Yesu shi ngu “gbenda” sha vegher ugen kpaa. Ngu gbenda sha ikyav na ia ver se la. Er se vande pasen nahan, Yesu yange dondo ikyav i Ter na vough. Nahan ikyav i Yesu la tese se akaa a se eren ve a lu sha ishima i Yehova yô. Sha nahan yô, aluer se soo u van hen Yehova yô, gba u se dondo Yesu ijime.—1 Peteru 2:21.

13, 14. (a) Yesu yange ôron mimi ken kwaghôron na nena? (b) Yange gba u Yesu una er nyi ve una lu “mimi,” man lu sha ci u nyi?

¹³ Yesu yange ôron mkaanem ma Ter na la sha mimi hanma shighe cii. (Yohane 8:40, 45, 46) I zua a icugh sha zwa u Yesu ma shighe môm ga. (1 Peteru 2:22) Mbaihyomov nav je kpa yange ve lumun ér “ka sha mimi je [A] tesen gbenda u Aôndo ye.” (Marku 12:13, 14) Nahan kpa, zum u Yesu kaa ér “Mo M ngu . . . mimi” la, lu kaan ér un er mimi shi un pasen mimi shi un tesen ior mimi tseegh tsô ga. Kwagh ne hemba u ôron di a ôr mimi tseegh tsô la ica je.

¹⁴ Umbur wer Yehova yange mgbegha mbangeren Bibilo ve ôr akaaôron a profeti sha kwagh u Mesiya shin Kristu anyom uderi imôngo ken ijime. Akaaôron a profeti ne tsengaôron kwagh u uma man tom man ku u Yesu vighe vighe. Heela tseegh ga, Tindi u Mose la lu a lu mure u akaa a wasen se u kaven or u nan lu Mesiya yô. (Mbaheberu 10:1) Yesu una lu jighjigh zan zan ku na, nahan una kure akaaôron a profeti a i ôr sha kwagh na la kpa? Ka er Yesu una er nahan la ve una tese ér Yehova ka Aôndo u kwaghôron u profeti na a lu u mimi ye. Ikyaa i vesen ne cii har sha Yesu. Akaa a Yesu eren ken uma na cii, mkaanem nam kua ityom i a er la cii tese ér akaaôron a profeti la cii lu mimi kpôô kpôô. (2 Mbakorinte 1:20) Sha nahan yô, Yesu lu “mimi.” Lu inja er kwaghôron u profeti u Yehova la cii hingir mimi sha mve u Yesu la nahan.—Yohane 1:17; Mbakolose 2:16, 17.

15. Inja i u nan Wan jighjigh yô ér nyi, man se er nahan yô se zua a nyi?

¹⁵ Yesu ka “uma,” gadia ka sha ikyev na tseegh man se fatyô u zuan a uma ye, ka “uma u a lu uma jim” je la. (1 Timoteu 6:19) Bibilo kaa ér: “U nan ne Wan jighjigh yô, nan ngu a uma u tsôron; kpa u nan hembe Wan ato yô, nana nenge a uma ashe ga, kpa iyugh i Aôndo ngi sha a nan.” (Yohane 3:36) Inja i u nan Wan u Aôndo jighjigh la ér nyi? Inja na yô gba u se fa dedoo ser a Yesu shio yô, se fatyô u zuan a uma ga. Shi inja na yô, gba u se tese jighjigh u nan wase sha aeren a ase shi se za hemen u henen kwagh sha ikyev i Yesu shi se nôngo kpoghuloo se dondon atesen a na man ikyav na kpaa. (Yakobu 2:26) Nahan yô, aluer se na Wan u Aôndo jighjigh yô, kwagh ne una za a vese ken uma u tsôron—Mbakristu mba i shigh ve mkurem, mba ve lu “anikyumuile u kpeghee” la vea zua a uma u ken jijingi u kpen ga la, “zegeikpelaior” i “iyôngo igen” la di vea zua a uma u vough ken paradiso shin tar.—Luka 12:32; 23:43; Mpase 7:9-17; Yohane 10:16.

16, 17. (a) Yesu una lu “uma” hen mba ve kpe la je kpaa nena? (b) Ka vangertiôr u nyi se fatyô u lun a mini?

¹⁶ Man gema mba ve vande kpen kera la di ye? Ve kpa, Yesu ngu “uma” hen a ve. Cii man Yesu nder huror na Lasaru shin ku yô, a kaa a Marta, anmgbian u Lasaru u kwase la ér: “Mo M ngu mnder man uma kpaa; or u nana nam jighjigh yô, shin nana kpe kpaa, nana lu uma.” (Yohane 11:25) Yehova na Wan na “ishindan i kuugh man i Hade,” nahan a na un tahav mbu nderen mbakpenev. (Mpase 1:17, 18) Yesu u i ver un sha ian i vesen la una bugh hunda u Hade a ishindan i a lu a mi la, nahan mba ve lu shin iwar i uumace la cii vea due.—Yohane 5:28, 29.

¹⁷ Yesu yange pase awashima u tom na man uma na shin tar ne sha kwaghôron u tiônôô ne, ér: “Mo M ngu gbenda man mimi man uma kpaa.” Mkaanem man ma se a inja nyian kpishi. Umbur wer Yesu seer kaan ér: “Ma or gbe van hen Terem ga, saa nana kar her a Mo.” (Yohane 14:6) Mkaanem ma Yesu man ma se a inja nyian vough er shighe u i ôr ma la nahan. Nahan yô, se fatyô u lun a vangertiôr ser aluer se dondo sha Yesu yô, mayange se tsume gbenda ga. Ka un tseegh una tese se gbenda u zan ‘hen Ter’ ye.

18. U lun mbadondon Yesu mba mimi la wa nyi kere?

¹⁸ Er Yesu a lu a tom u hange hange shi a fe Ter na i ker inya yô, se mba a ityôkyaa i dedoo i dondon sha Wan. Er se vande ôron ken ityough ki karen kira nahan, u lun mbadondon Yesu mba mimi la ka kwagh u sha mkaan shin mlu u ken ishima yase tseegh ga, kpa kwagh ne wa aeren a ase kpa ker. U dondon sha Kristu la wa u dondon atesen a na man ikyav na la kpa ker. (Yohane 13:15) Takerada u ú lu ôron hegen ne ua wase u sha gbaa ne.

19, 20. Takerada ne ngu a nyi ker i̱ ia wase u ken iniôngon you i u lu nôngon wer u dondo sha Kristu laa?

¹⁹ Mtom ma ma dondo ne ma a time sha uma u Yesu man tom na vighe vighe. I pav mtom man ker avegher atar. Hiihii yô, se sav ôron kwagh u aeren a na man igbenda na. Kwagh u sha uhar yô, se tôv sha ikyav na i pasen ior kwaghaôndo kpoghuloo shi tesen ve la. Kwagh u sha utar yô, se time sha gbenda u yange tese ior dooshima la. Hii Ityough ki sha 3 kira je, hanma ityough yô ki a ngeren u kiriki u a lu a itinekwagh ér “U Dondo sha Yesu Nena?” yô. I nger avur a ruamabera man mbampin mba ken ngeren ne sha inja i vea wase se u gbidyen kwar sha gbenda u se dondo Yesu sha mkaan man sha ieren yô.

²⁰ Sha iwasen i Yehova yô, ityôkyaa ngi i u saa toho, u lu paleghaa a na ga. Yehova yange ya ican ken ishima kpishi sha u tindin Wan na sha dooshima ér a va tese se er se ya ikyar a na sha inja i una lumun se yô. (1 Yohane 4:9, 10) Yô, ishima i mgbegha u ker lumun dooshima u vesen u Aôndo ne, sha u vengese mlehe u Yesu a lehe u ér: “Dondo sha a Mo” la.—Yohane 1:43.