Tor Davidi Er Isholibo

Saulu yange kpen kera yô, Davidi hingir tor. Hen shighe ne Davidi lu anyom 30. Yange tema tor anyom nga karen yô, a due iyange igen aikighe, lu zenden sha kpoyou na u masen sha. Kpekpe u kpoyou u masen sha yange a tav i gba hen iwenge tseegh, shi i cir haav sha mi ga. Nahan Davidi ta ashe za nenge a kwase u doonashe ugen. Davidi pinen yô, i kaa a na ér iti na ér Batesheba. Lu kwase u orshoja ugen, iti na ér Uria. Tsô Davidi tindi i za va a Batesheba hen ya na. Davidi maa yav a na, kwase shon maa wa iyav. Davidi maa hide er kwagh u una na ve ior vea fa kwaghbo na ne ga yô. A kaa a orhemen shoja na la ér a̱ ver Uria sha hemen ken utya, henpe ityav mbi hembe taver yô, maa ve hide ijime ve undu un, nahan i wua un. Mba wuan Uria ken ityav mbira yô, Davidi maa vôso Batesheba.

Kpa Yehova nenge akaabo a Davidi er la cii. Yehova una er nena? Yehova maa tindi profeti Natan hen Davidi. Natan za kaa a na ér: ‘Ornyar ugen lu a iyôngo kpishi, shi icanor ugen gema lu a an-waniyôngo môm tseegh, u doo un ishima kpishi yô. Ornyar ne undu iyôngo na, gema za kôr waniyôngo u icanor ne lu a mi môm tseegh la.’ Davidi ungwan nahan yô, ishima vihi un, a kaa ér: ‘Ornyar la kuma ku!’ Natan maa kaa a Davidi ér: ‘Ka we je u lu ornyar shon ye!’ Yange ishima vihi Davidi kpishi, nahan a kaa a Natan ér: ‘M er Yehova isholibo.’ Isholibo ne yange i va Davidi kua tsombor na cii a zayol kpishi. Yehova tsaha a tsaha Davidi tseegh, a wua un ga. Sha ci u Davidi hide a iyol ijime shi gema ishima sha mimi.

Davidi yange va soo u maan Yehova tempel, kpa Yehova tsua Solomon, wan u Davidi ér i lu un a maa un tempel ye. Tsô Davidi gba kohol ikyav mbi maan tempel veren sha ci u Solomon, shi kaan ér: ‘Gba u tempel u Yehova una kehe shi una doo ashe. Solomon ngu wanye her, nahan me wase un, me kohol ikyav me ver un.’ Davidi iyol na yange na inyaregh kpishi sha u i va er tom ne a mi yô. Shi a ker mbatomov mba fan tom a ver. Shi a kohol zenaria man azurfa, shi a tindi i va un a ikyon i sedar ken Tiru man Shidon. Shighe u zurum u Davidi una kpe la, a tese Solomon er tempel shon una lu yô. Akaa ér: ‘Yehova ôrom kwagh ne, m nger shin takerada sha ci wou. Yehova una wase u. De cian ga. Taver ishima er tom la.’