Kwagh u Tartor u Aôndo Ua Va Er Yô

Tartor u Aôndo ngu hemen sha hegen. Ica a gba ga tsô ua hii u hemen shin tar shi ua sôr akaa sha tar, nahan tar ua doo. De se nenge ase akaa a dedoo agen a Tartor la ua va er yô.

1. Tartor u Aôndo ua va a bem shi ua na a gema eren perapera shin tar nena?

Yesu u a lu Tor u Tartor u Aôndo la una tim aferaior kua ugomoti cii sha shighe u ityav mbi Armagedon la. (Mpase 16:14, 16) Shighe la, kwagh u Bibilo i ôr ne una kure sha mi vindi vindi. I kaa ér: ‘Gadia shi côhin tsô iferor á kera lu ga.’ (Pasalmi 37:10) Yesu una va a bem man perapera sha tar cii sha ikyev i Tartor la.—Ôr Yesaia 11:4.

2. Shighe u a gema eren ishima i Aôndo shin tar la uma una lu nena?

Shighe u Tartor u Aôndo ua lu hemen la, ‘mbaperapera vea ya dyako u tar, vea lu ken u gbem.’ (Pasalmi 37:29) Hen ase er u lu ken tar u ior cii vea lu ior mba dedoo shi Yehova man mbagenev vea doo ve ishima ve, a lu la! Or môm nana kera gba angev ga, shi hanma or nana lu uma gbem sha won.

3. Shighe u a tim aferaior kera la, Tartor u Aôndo ua er nyi?

A va timin aferaior kera cii yô, Yesu una tema Tor anyom 1,000. Shighe la, Yesu man iorov 144,000 mba vea lu hemen vea na la, vea wase uumace mba shin tar cii vea kera lu mbaasorabo ga. Anyom 1,000 la aa been yô, tar cii ua hingir paradiso u doon ashe shi ior cii vea lu ungwan imo i Yehova nahan a saan ve iyol. Yesu maa una hide a Tartor la una na Ter na, Yehova. Hen shighe la, a “tsegha iti” i Yehova a hemba ave a tse. (Mateu 6:9, 10) Hanma or nana fa wang hen shighe la er Yehova a lu Orhemen u dedoo, u a we mba a hemen ve la ikyo yô. Yehova maa una tim Satan man azôv kua hanma or u nan hendan a hemen na cii. (Mpase 20:7-10) Akaa a dedoo a Tartor u Aôndo ua er la aa lu gbem sha won.

HEN KWAGH I ZA SHIMI

4. Tartor u Aôndo ua kar a gomoti u uumace kera

“Or ka nana lu a tahav sha orgen yô, nan eren nan ican.” (Orpasenkwagh 8:9) Yehova una er tom a Tartor na u been a ieren ne kera.

Ôr Daniel 2:44 man 2 Mbatesalonika 1:6-8, maa lam nen sha mbampin mban:

• Yehova man Wan na Yesu, vea er a ugomoti mba uumace kua mba ve suen ugomoti mban la nena?

• Kwagh u u hen sha kwagh u Yehova man Yesu la wase u u lun a vangertiôr wer hanma kwagh u vea er cii a lu u vough man u shami nena?

5. Yesu ka Tor u hemban doon cii

Er Yesu a lu Tor u Tartor u Aôndo yô, una wase ior mba shin tar cii sha igbenda kpishi. Nenge VIDIO i i lu heen ne sha er u nenge er Yesu a vande tesen ér sar un u wasen ior shi Aôndo a ne un tahav mbu eren kwagh ne yô.

VIDIO: Yesu Tese Kwagh u Tartor u Aôndo Ua Er Yô (1:13)

Shighe u Yesu lu shin tar la, yange pande tese kwagh u Tartor la ua va er yô. Ken averen a i ter heen ne, ka hanma u lu veren ashe a mini? Ôr avur a i nger shin heen ne, nahan nenge er a wase se u seer fan kwagh u averen shon yô.

6. Tartor u Aôndo ua na uma una va doo ken hemen

VIDIO: Akaa a Tesen Er Uma una Va Doo ken Hemen Yô (4:38)

Ôr Pasalmi 145:16, maa lam nen sha mpin ne:

• Er u fe wer Yehova una va ‘bugh uwegh nagh una na hanma kwagh u uma sha isharen na, a kuma un’ nahan ka u nena?

KA NYI U HENE?

Tartor u Aôndo ua er kwagh u Aôndo a soo ér u er la. Ua gema tar cii ua hingir paradiso, shi ior mba dedoo vea lu ker, vea lu civir Yehova gbem sha won.

Mbampin mba umbur kwagh u i hen yô

• Tartor u Aôndo ua tsegha iti i Yehova nena?

• Er nan se ne jighjigh ser Tartor u Aôndo ua er akaa a Bibilo i ôr laa?

• Ka nyi u lu veren ashe a mi ken akaa a doon a Tartor u Aôndo ua va er laa?

SEER HENEN KWAGH

Hen fa kwagh u a lu Armagedon yô.

“Ka Nyi i Lu Ityav mbi Armagedon?” (Ngeren u sha Intanet)

Time sha akaa aa va er hen shighe u Yesu yange yila ér “zegecan“ la yô.—Mateu 24:21.

“Ka Nyi I Lu Zegecan?” (Ngeren u sha Intanet)

Nenge er icombor ia fatyô u teman imôngo gbidyen kwar sha averen a Tartor a ken hemen la yô.

Tôô Wer U Ngu ken Paradiso (1:50)

Ôr ngeren u a lu a itinekwagh ér, “Yange M Lu a Mbampin Kpishi” la, nahan nenge er orpatii ugen u hendan a gomoti yange zua a kwagh u lu keren yô.

“Bibilo Gem Ior” (Iyoukura, Janawari 1, 2012)