Ú Ngohol “Jijingi U Mimi” Vee?
“Ter . . . Una na ne Orsurunshima ugen u Una lu a ven gbem yô, ka Jijingi u mimi.”—YOHANE 14:16, 17.
1. Ka kwagh u injaa u nyi yange Yesu ôr a mbahenen nav zum u a mase shin vea ve sha kpoyou u sha laa?
“TERE, Ú za hana?” Ka mpin ugen u mbaapostoli mba Yesu yange ve pine un er a mase lun vea ve sha kpoyou u sha ken Yerusalem je la. (Yohane 13:36) Er ve tema ve lu her la je, Yesu pase ve wener shighe kuma u una undu ve una hide hen Ter na yô. (Yohane 14:28; 16:28) Una kera lu a ve imôngo sha u wan ve kwagh shi nan ve mlumun sha mbampin vev ga. Kpa a taver ve ishima, a kaa ér: “Me sôn Ter, man Una na ne Orsurunshima ugen u Una lu a ven gbem yô.”—Yohane 14:16.
2. Yesu yange tôndo zwa wener una yem yô una tindi mbahenen nav a nyi?
2 Yesu yange pase orsurunshima shon shi pase er una wase mbahenen nav yô. A kaa a ve ér: “Kpa akaa ne yô, M kaa ne a sha hiihii la ga, sha ci u M lu a ven her yô. Kpa hegen yô, M ngu zan hen Un u A tindim la . . . Ka ne a inja u Me yem yô; gadia aluer Me yem ga yô, Orsurunshima Una va her a ven ga. Kpa aluer Me yem yô, Me tindi ne a Na. . . . Zum u Un, Jijingi u mimi la, Una va va yô, Una hemen ne Una za a ven ken mimi cii.”—Yohane 16:4, 5, 7, 13.
3. (a) Ka hanma shighe yange i tindi a “jijingi u mimi” la hen Mbakristu mba tsuaa mbaraa? (b) Ka gbenda ugen u injaa u nyi yange jijingi shon lu “orsurunshima” ve?
3 Ityendezwa ne yange i̱ iv sha iyange i Pentekosti u 33 S.W. la, er apostoli Peteru lu er shiada nahan. A kaa ér: “Ka Yesu shon ne je, Aôndo nder Un ye, se cii se mba shiada sha kwagh ne. Er i kende Un sha A lu ken uwegh ku yanegh ku Aôndo man er A ngohol ityendezwa i Icighan Jijingi hen Ter A haa Un yô, ka kwagh shon u ne lu nengen shi ne lu ungwan kpaa je ne.” (Aerenakaa 2:32, 33) Er se va nenge ken hemen nahan, icighan jijingi u yange i haa sha iyange i Pentekosti la kure akaa kpishi sha ci u Mbakristu mba tsuaa mbara. Kpa Yesu yange er ityendezwa ér “Jijingi u mimi” la una ‘umbur ve akaa a un er ve cii.’ (Yohane 14:26) Lu u una wase ve u umbur tom u Yesu man atesen a na kua mkaanem nam jim je kpaa, shi vea nger akaa shon inya. Kwagh ne va lu a iwasen hemban je yô hen apostoli Yohane u beeyol la ken mkur u derianyom u hiihii S.W. la, ka shighe u yange hii u ngeren Ivangeli na je la. Kwagh la kua kwaghwan u injaa u yange Yesu wa shighe u a ver iniongo i M-umbur u ku na la.—Yohane, ityough 13 zan zan 17.
4. “Jijingi u mimi” la yange wase Mbakristu mba tsuaa mba i shigh ve mkurem mbara nena?
4 Yesu shi yange er ityendezwa a mbahenen mba tsuaa mbara ér jijingi una ‘tese ve akaa cii’ shi ‘Una hemen ve Una za a ve ken mimi cii.’ Jijingi una wase ve u kaven akaacimin a Ruamabera shi kuran mhen ve man mkav ve man awashima ve cii una lu gungur môm. (1 Mbakorinte 2:10; Mbaefese 4:3) Nahan icighan jijingi yange na Mbakristu mba tsuaa mbara tahav u zuan gungur môm eren tom u “wanakiriki u jighjigh man u fan kwagh” la, nan Mbakristu mba i shigh ve mkurem asange asange “kwaghyan sha ashighe ashighe” ken jijingi.—Mateu 24:45.
Jijingi Eren Shiada
5. (a) Kanyi i he Yesu yange pase mbahenen nav hen tugh mbu Nisan 14, 33 S.W. laa? (b) Yange lu u icighan jijingi ia er nyi sha u ivin ityendezwa i Yesu laa?
5 Hen tugh mbu Nisan 14, 33 S.W. la, Yesu ta mbahenen nav ankyurce ér ken masejime yô a ngohol ve vea za lu sha vea na man Ter na. A kaa a ve ér: “Ken ya u Terem ayou nga kpishi; a lu nahan ga yô, ma M kaa ne; gadia Me yem sha u Me za sôr ne ijiir. Me yem Me za sôr ne ijiir yô, Me shi Me hide, Me va kua a ven sha er ne kpaa né lu hen ape M lu yô.” (Yohane 13:36; 14:2, 3) Vea tema tor a na imôngo ken Tartor na. (Luka 22:28-30) U ve̱ zua a ishimaverenkeghen i yemen sha la yô, a gba u a ‘mar ve ken Jijingi’ vea hingir ônov mba Aôndo mba ken jijingi man mba i shigh ve mkurem sha u ve̱ lu utor man upristi vea Kristu yô.—Yohane 3:5-8; 2 Mbakorinte 1:21, 22; Titu 3:5-7; 1 Peteru 1:3, 4; Mpase 20:6.
6. (a) “Myer u a dugh Sha” la yange hii hanma shighe, man ka iorov u me í yer ve? (b) Mba yange i yila ve mbara í er ve batisema ken nyi?
6 “Myer u a dugh Sha” ne hii sha iyange i Pentekosti u sha 33 S.W. la, man ikyav tese ér vegher u vesen la yange kure ken atôatô u kwavanyom u 1930 la. (Mbaheberu 3:1) Iyenge i mba i ver ve ikyav sha icighan jijingi sha u ve̱ lu ken Mbaiserael mba ken jijingi la ka iorov 144,000 “mba i paa ve ken ior” yô. (Mpase 7:4; 14:1-4) Mban cii yange i er ve batisema ken iyol i Kristu i ken jijingi la man ken tiônnongo na man ken ku na kpaa. (Mbaromanu 6:3; 1Mbakorinte 12:12, 13, 27; Mbaefese 1:22, 23) Yange mba eren ve batisema shin mnger shi mba i shigh ve mkurem ma sha icighan jijingi yô, ve nyôr ken uma u geman uuma vev nan naagh a mi, ka mtil u tilen sha mimi zan zan ku ve je la.—Mbaromanu 6:4, 5.
7. Hii nan ve i lu Mbakristu mba i shigh ve mkurem mbara tseegh ve lu a ian i yan bredi shi man wain ken iniongo i M-umbur laa?
7 Er Mbakristu mba i shigh ve mkurem mban ve lu Mbaiserael mba ken jijingi yô, ve lu ken ikuryan i he i Yehova ya vea “Iserael u Aôndo” la. (Mbagalatia 6:16; Yeremia 31:31-34) Awambe a Kristu haa la yange na ikyuryan i he la kera lu kwagh u bunden mayange ga. Yesu yange ter kwagh ne shighe u lu veren iniongo i M-umbur u ku na la. Luka nger ér: “A tôô bredi, sughun Aôndo yô, A coon, A na ve, A kaa er: Ngun ka iyol Yam je ne, i i ne sha ci wen; eren nen kwagh ne sha u umbur Mo. Iyongo di kpaa nahan, er kwaghyan bee kera yô, A kaa er: Iyongo ne ka ikuryan i he i ken awambe Am a i hee sha ci wen” yô. (Luka 22:19, 20) Asande a iorov 144,000 mba ve shi shin tar her la, ka ve ve lu a ian i yan bredi shi man wain u a lu ikyav, u ka i kar ior sha iniongo i M-umbur u ku u Kristu la ye.
8. Ka i er nan ve mba i shigh ve mkurem mbara ve fa ér i yila ve m-yer u yemen sha?
8 Mba i shigh ve mkurem mbara ka ve fa ér i yila ve m-yer u yemen sha la nena? Icighan jijingi ka a er ve shiada wang akperan a lu ga. Apostoli Paulu yange nger hen amba la ér: “Ve mba Jijingi u Aôndo A hemen ve la cii, ka ônov mba Aôndo je la. . . . Ka Jijingi iyol Na A lu eren shiada vea jijingi wase imôngo er, se mba ônov mba Aôndo ye. Aluer se mba ônov yô, se mba mbayandyako kpaa, ka mbayandyako u Aôndo man mbayandyako a Kristu imôngo kpaa, aluer sea ya ican a Na imôngo sha u shi á na se iengem a Na imôngo kpaa yô.” (Mbaromanu 8:14-17) Shiada u jijingi a lu eren ne ngi a agee je yô, ior mba akperan a te ve kpuaa sha myer ve u yemen sha la vea fatyô u kuren ikyaa sha inja nahan ér i yila ve ga, nahan shi vea palegh u yan bredi shi man wain sha iyange i iniongo i M-umbur la.
Jijingi man Iyôngo Igen
9. Ka ikwe ihiar i tseer tseer i nyi í ter í ken hanma Ivangeli cii kua ken takerada u Mpase laa?
9 Yesu yange lu a iyenge i Mbakristu mba i yer ve ér ve̱ za lu Mbaiserael mba ken jijingi la ken ishima, ka nahan ve yange yila ve ér anikumuile u kpeghee” ye. Í va a ve ken “ityôr” i ikyuryan i he la, mba a ikpela i̱ “iyôngo igen” i Yesu kaa ér í kpaa una kohol í ijiir i môm la. (Luka 12:32; Yohane 10:16) Iyôngo igen i i lu kohol í ken ayange a mkur ne ia kohol cii ia hingir “zegeikpelaior” i̱ í gbe u ia war “zegecan,” ia lu a ishimaveren i lun uma gbem sha won ken paradiso shin tar la. Kwagh ka a er i doo yô, mpase u sha mnenge u yange i na Yohane ken mkur u derianyom u hiihii S.W. la pav zegeikpelaior ne ver kposo a Mbaiserael mba ken jijingi mba iorov 144,000 la. (Mpase 7:4, 9, 14) Iyôngo igen la kpa ngi ngohol icighan jijingi shinii, man aluer ngi ngohol yô, benden a uuma vev nena?
10. Mbá eren iyôngo igen batisema “ken iti i Ter man Wan man Icighan Jijingi” nena?
10 Icighan jijingi eren tom ken uuma mba iyôngo igen tagher tagher je. Ka ve tese ikyav i iyoltseghan ve hen Yehova sha u eren batisema “ken iti i Ter man Wan man Icighan Jijingi.” (Mateu 28:19) Ve kav hementor u Yehova shi ve wa ayol a ve sha ikyev i Kristu ér ngu Tor ve kua Orpaan ve kpaa, shi mba dondon gbendatesen u jijingi u Aôndo shin tahav mbu tomov nav mbura ken uuma vev. Hanma iyange yô ka ve ver ian ken uuma vev u umen “ityamegh ki Jijingi,” ka “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha” je la. (Mbagalatia 5:22, 23)
11, 12. (a) I tsegha mba i shigh ve mkurem la sha gbenda u vesen nena? (b) Ka sha nyi gbenda i tsegh iyôngo igen shi i ver í wang na?
11 Shi saa iyôngo igen ne ia de ér Mkaanem ma Aôndo man icighan jijingi na ve̱ ôô ve shin ve̱ tsegha ve keng. I vande tseghan mba i shigh ve mkurem la sha gbenda u vesen, i na ve ishô, ve hingir mbaperapera shi mba wang er kwasehe u Kristu nahan. (Yohane 17:17; 1 Mbakorinte 6:11; Mbaefese 5:23-27) Profeti Daniel ôr kwagh ve wener mba “uicighanmbaiorov mba Uhembansha” mba ve ngohol Tartor sha ikyev i “wan u or,” Kristu Yesu yô. (Daniel 7:13, 14, 18, 27) Yehova yange vande ôron kwagh a ikyurior i Iserael sha ikyev i Mose man Aron tsuaa kaa wener: “Ka Mo M lu TER Aôndo wen [ye]; nahan tsegha nen ayol a en, lu nen uicighanmbaiorov je, gadia Mo M ngu icighan je.”—Levitiku 11:44.
12 Ishember i í yer ér “mtsegh” la inja na jighilii yô ér “u geman kwagh hingir icighan shin paven veren kposo shin paven veren sha ci u tom u Yehova Aôndo; ka u hingir icighan shin u i tsegha un shin i wanger la.” Tsuaa ken inyom i 1938 la je, Iyoukura nger ér Mbayonadabi, shin iyôngo igen la “gba u ia fa ér ka hange hange u hanma or u nana va hingir vegher u zegeikpelaior la di tsô yô, saa nana tsegha iyol i nan shi nana wanger í kpaa.” Ken mpase u sha mnenge u zegeikpelaior u i nger ken takerada u Mpase la, i ôr kwagh ve ér “ve ôô uriga vev ken awambe a Waniyôngo, ve kungu ve,” man ve lu eren Yehova “tom ken tempel Na tugh man atetan.” (Mpase 7:14, 15) Iyôngo igen ne ngi nôngon sha afatyô ve cii u aren sha icighan atindi a Yehova a ver la, sha iwasen i icighan jijingi na.—2 Mbakorinte 7:1.
U Eren a Anmgbianev mba Kristu Doo Doo
13, 14. (a) Sha injakwagh i Yesu yange ôr sha kwagh u iyôngo man ivo la yô, myom u iyôngo la har sha nyi? (b) Ken ayange a mkur ne, iyôngo igen ne er a anmgbianev mba Kristu doo doo nena?
13 Yesu yange pase mlu u iyôngo igen i i lu kôôsôô vea anikumuile u kpeghee la ken injakwagh i iyôngo man ivo, í yange wa ken kwaghôron na u profeti u sha kwagh u “iyange i mkurtar” la. Ken injakwagh shon la, Kristu pase ken igbar ér myom u iyôngo igen la har sha ieren ve a mba i shigh ve mkurem, mba a yila ve ér “anmgbianev Av” la. A kaa ér: “Zum la Tor la Una kaa a mba ve lu ken uwegh Nagh ku yanegh la er: Va nen, ne mba i saan ne iyol mba Terem, ya nen dyako u tartor u i ver sha ci wen hii sha igbetar je la. . . . Mimi je M kaan ne ne, er ne er a mô gen u ken anmgbianev Av mba hemban gban ijime mban nahan yô, ka Mo je ne er a Mo nahan ye.”—Mateu 24:3; 25:31-34, 40
14 Ishemberkwaghôron i í kaa ér “er ne er a mô gen” la ngi ôron kwagh u iwasen i í ne anmgbianev mba Kristu mba i mar ken jijingi mbara sha dooshima la, ve mba shon mba tar u Satan ú nzughul a ve er ka mbavannya, je yange i wuhe mbagen ken gaadi kpaa la. Ibanave i kwaghyan man i ikondo i zeren tser ve, shi ve gba angev kpaa. (Mateu 25:36) Ken shighe u mkur ne, hii ken 1914 la je, imba kwagh ne tser ior mba i shigh ve mkurem la kpishi. Kwagh u Mbashiada mba Yehova mba ainge ne tesen ér akar a ve a a lu iyôngo igen la nga suen ve er jijingi a lu mgbeghan ve u suen ve la.
15, 16. (a) Ka sha nyi tom nahan iyôngo igen i hembe wasen anmgbianev mba Kristu mba i shigh ve mkurem ve lu shin tar laa? (b) Mba i shigh ve mkurem mbara tese iwuese ve hen iyôngo igen nena?
15 Jim yô iyôngo igen ne ngi suen anmgbianev mba Kristu mba i shigh ve mkurem, ve lu shin tar her ken ayange a mkur ne sha u eren tom u Aôndo a ne ve u ‘pasen Loho u Dedoo u tartor tseren tar, sha u u̱ lu mpase hen akuraior cii’ la. (Mateu 24:14; Yohane 14:12) Er iyenge i mba i shigh ve mkurem, ve lu shin tar ne i lu panden a pande nahan kpa, iyenge i iyôngo igen la seer je nyôr umiliôn imôngo. Udubu imôngo ken atô ve ka mbaivangeli mba eren tom keke—mba pania man mbamishen—mba samber a loho u dedoo u Tartor ne ‘zan zan aren ken ikighir i tar’ je. (Aerenakaa 1:8) Mbagenev ka ve lu a ci ken tom ne sha er ve fetyô la cii, shi mba suen tom u injaa ne sha inyar a iember kpaa.
16 Anmgbianev mba Kristu mba i shigh ve mkurem la mba a iwuese sha tom u iyôngo igen i i lu akar a ve ne i lu eren la a ishima i môm ne je zua ga! Yange ve pase ishima ve ken takerada u i yer ér Worldwide Security Under the “Prince of Peace,” ú wanakiriki u fan kwagh yange na ken inyom i 1986 la. Ú kaa ér: “Hii shighe u Ityav mbi Tar cii Mbi sha II mbira je, m-iv u kwaghôron u profeti sha kwagh u ‘iyange i mkurtar’ la ngu zan hemen sha ci u tom u ‘zegeikpelaior’ i ‘iyôngo igen’ i̱ lu eren la. . . . Nahan se mba sughun ne kigh kigh, ne ‘zegeikpelaior’ i ne lu ityar ityar shi ne lamen ijô kposo kposo la, sha tom wen ú ne er taveraa sha u ivin kwaghôron [u Yesu] u a lu ken Mateu 24:14 la!”
‘Ve Hingir Vough a Vese Shio Ga’
17. Ka sha nyi gbenda nahan mbajighjigh mba ngise mba á va nder ve shin ku vea lu shin tar la “vea gba hingir vough” a mba i shigh ve mkurem mbara shio ga?
17 Apostoli Paulu, u un kpa lu môm ken mba i shigh ve mkurem la ngur ôron kwagh sha kwagh u nomso man kasev mba jighjigh mba ve vande lun cii man mve u Kristu la yô, a nger ér: “Mban cii ka sha jighjigh u nan man lu i er ve shiada u dedoo ye, nahan kpaa ve lu a ngohol kwagh u i tende zwa sha mi la ga, gadia Aôndo vande veren kwagh u hemban doon sha ci wase [se mba i shigh se mkurem ne], sha er vea gba hingir vough ga saa se kpaa sé lu a ve imôngo” yô. (Mbaheberu 11:35, 39, 40) Ken hemen u Anyom Dubu la, Kristu man anmgbianev nav mba i shigh ve mkurem ve lu iorov 144,000, ve lu sha la vea lu utor man upristi man vea yar tom a mtsera u naagh ku ipaa ku Kristu la shin tar. Tsô iyôngo igen la ia “hingir vough” ken iyol man ken mhen kpaa.—Mpase 22:1, 2.
18. (a) Mimi u a lu ken Bibilo la una wase iyôngo igen u wuese nyi? (b) Iyôngo igen la ngi keghen “mpase u á va pase ônov mba Aôndo” a ishimaverenkeghen i nyi?
18 Akaa ne cii a̱ nyôr a̱ tema iyôngo igen la ken asema, ve̱ kav er i hii ve Ruamabera u Mbakristu u ken Zwa Grika a har ishima sha Kristu man anmgbianev nav mba i shigh ve mkurem la man tom u vesen u ve lu a mi u eren mbaawashima mba Yehova la yum yô. Nahan iyôngo igen tôô ér ka ian icivirigh je ve lu a mi u suen wanakiriki u i shigh un mkurem la sha hanma gbenda cii, er ve lu keghen “mpase u á va pase ônov mba Aôndo ken igbar” ken Armagedon man ken Dubuanyom yô. Vea fatyô u lun a ishimaveren ér á va ‘pase ve sha ikev i mlu u hôôn la á tuhwa, á za a ve ken mlu u engem u lun a ikangenev ga u ônov mba Aôndo la.’—Mbaromanu 8:19-21.
U Lun ken Mzough ken Jijingi ken Iniongo i M-umbur
19. “Jijingi u mimi” la er nyi sha ci u mba i shigh ve mkurem la man akar a ve, man vea hemba lun gungur môm kangenaa hen aikighe u Maaci 28 la nena?
19 Yesu yange er msen u kuren hen tugh mbu Nisan 14, 33 S.W. la kaa wener: “M [ngu] eren msen . . . sha u ve cii ve̱ lu kwagh môm, er We Ter, U lu ken a Mo, Mo kpaa M lu ken a We nahan, sha u ve kpaa ve̱ lu ken a vese; sha er tar u̱ na jighjigh er U tindim yô.” (Yohane 17:20, 21) Ka sha dooshima man Aôndo tindi Wan na ér a̱ va na uma na sha u waren mba i shigh ve mkurem mbara man tar u orumace u ungwan tindi kpaa ye. (1 Yohane 2:2) “Jijingi u mimi” la zua anmgbianev mba Kristu man akar a ve hingir gungur môm. Sha aikighe u uwer u Maaci 28 la, iyange a milen cii yô, iniongo i ihiar ne ia kohol imôngo sha u umbur ku u Kristu shi umbur hanma kwagh u Yehova a er sha ci ve sha ikyev i naagh ku Kristu Yesu, Wan na u ishima ishima la. M lu ve her sha iyange i injaa la a̱ taver mzough ve shi a̱ taver ishimataver ve ve̱ za hemen u eren ishima i Aôndo, tsô vea lu tesen ikyav ér ve mba ember er ve lu ken mba ve doo Yehova ishima yô.
U̱ Kimbir Timen Shami Asav-Asav
• Ka hanma shighe yange i tindi Mbakristu mba tsuaa mbara a “Jijingi u mimi” laa, man yange lu ve “orsurunshima” nena?
• Mba i shigh ve mkurem mbara ka ve fa ér i yila ve u yemen sha nena?
• Jijingi u Aôndo yaren tom ken iyôngo igen sha nyi igbenda?
• Iyôngo igen la er a anmgbianev mba Kristu doo doo nena, man ia “gba hingir vough ga” saa mba i shigh ve mkurem mbara vea lu a ve imôngo nena?
[Picture on page 27]
Yange i haa “Jijingi u mimi” la sha mbahenen sha iyange i Pentekosti u 33 S.W. la
[Pictures on page 29]
Iyôngo igen la er a anmgbianev mba Kristu doo doo sha u suen ve ken m-iv u ivin icighan tom u pasen kwagh la