Mfe u Vough u Fan Aôndo la Surun Se Ishima

IOR mbagenev yô, kwagh u Bibilo i ôr sha kwagh u dooshima man mhôônom ma Aôndo la gema va ve aa mbampin mba zan iyol. Ka ve pine ér: Aluer Aôndo soo u been a ifer kera shi a fa gbenda u una er kwagh ne man ngu a tahav mbu eren nahan yô, er nan ve ifer i lu seer a seere? Mzeyol ve yô ka u kaven mbamhen mba utar mba i ter heen ne wang la, ér: (1) Aôndo hemba agee cii; (2) Aôndo ngu a dooshima shi eren akaa a dedoo kpaa; man (3) akaa a vihin nga zan hemen her tsô. Ka ve hen ér, er mhen u sha utar ne a lu mimi je i gande tunan yô, a̱ hemba kera kera kpa, môm ken mbamhen mba uhar mbagen mbara la una lu aie. Ve nenge ér, aluer ka agee a yina Aôndo u been a ifer kera ga yô, a lu sha ci u kwagh gba un sha kwagh u a lu zan hemen ne ga.

Er i ta num sha ijiir i kasua i í yer ér World Trade Center ken gar u New York la ayange nga karen yô, orhemen kwaghaôndo u í fe un dedoo ken tar u United States yô kaa ér: “Ior pinem kwagh . . . sha ayange a m lu uma ne er i hii ve Aôndo a ne ian ér aahe man ican i zan hemen la je kuma kwa deri imôngo hegen. M lumun mer m fa mlumun jim jim u me na sha mpin ne ve mo kpa a kumam ga cii.”

Ikpurorfantakerada ken gbar u kwaghaôndo ugen ngur ôron kwagh sha mkaanem nam mara yô, á kaa wener “ityesen i kwaghaôndo i dedoo” i orhemen kwaghaôndo ne a pase la doo un. Shi a sue mnenge u orfantakerada ugen yange nger la, wener: “Mlu u i lu kwagh u or nana fatyô u fan kwagh u ior ve lu yan ican ga ne ka môm ken akaa a Aôndo aa or a fatyô u fan ga yô.” Kpa, sha kpôô yô, se fatyô u fan er i hii ve Aôndo a ne ifer ian la gaa?

Mhii u Iferkwagh

Bibilo ôr kwagh u a lu kposo a hanma kwagh u alaghga mbahemenev mba ukwaghaôndo vea ôr la cii, i̱ tese ér ityôkyaa i í hii ve Aôndo a ne ifer ian i lu zan hemen la ka kwagh u a gande u á kav ga. Tamen kwagh u una wase se u kaven mpin u sha kwagh u ifer ne yô, ka u se kaven ser Yehova yange gba tar u ifer ga. Yange gba nomsoor man kwase u hiihii la ve lu vough, ve lu a isholibo ga. Yehova yange nenge hanma kwagh u un gbe yô, lu u “doon tsung.” (Genese 1:26, 31) Awashima na yange lu u Adam man Ifa ve samber a akighir a Paradiso u Eden la tar sha won cii shi ve ngee, ve iv ú a ior mba lun saan saan sha ikyev i hementor na u sha dooshima la.—Yesaia 45:18.

Ka or u ken jijingi ugen yange hii kwagh u ifer ye, shin er sha hiihii la lu eren kwagh sha jighjigh hen Aôndo nahan kpa, isharen i mbagen ma ve civir un la hingir u lun ken a na. (Yakobu 1:14, 15) Ihyembeato na la maa due ken igbar shin tar ne zum u Satan bume nom man kwase u hiihii la ér ve dondo un u hendan kwagh a Aôndo la. U ma ve ungwa kwagh u Aôndo ôr wanger wanger ér ve de ye shin benden atam a kon u fan kwagh u dedoo man kwagh u bo la ave ga yô, Adam man Ifa gema zôr atam a ú ya a ya kuaa je. (Genese 3:1-6) Sha u eren nahan la yô, ve tese ér ve hemba Aôndo ato shi ve soo u lun sha tseeneke ve kpaa.

I Due a Ikyaa i Kwagh u a Lu u Shami La

Ihyembeato i ken Eden ne due a ikyaa i kwagh u a lu u shami la, kwagh ne lu imbwase i í bende a hanma or sha won cii yô. Uumace mba hembanato mban gba ahon ér Yehova ngu hemen akaa a á gbe á la sha inja ga. Orgbanakaa la yange lu a ian i kaan ér uumace ve ungwan imo na vindi vindii? Alaghga tsô a hemba kpen ior iyol aluer ve lumun u lun sha tseeneke ve yôô?

Yehova er kwagh sha imbwase i yange i va a mi sha hementor na ne sha gbenda u yange u tese dooshima man perapera man kwaghfan man tahav la. Yange una soo yô, ma yar tom a tahav nav u been a ihyembeato la kera fese je. Luun er yange una er nahan je kpa ma lu inja er a er shami nahan, gadia lu a ian i eren kwagh nahan. Kpa u eren nahan ne yange ma na mlumun sha mbampin mba sha ikyaa i kwagh u a lu u shami í yange i due a mi la ga. Sha vegher ugen di yô, Aôndo yange ma fatyô u gban den isholibo la tsô. Alaghga mbagenev nyian ne vea nenge imba gbenda u eren kwagh nahan ne ér ka kwagheren u sha dooshima. Ngun ne kpaa, una na mlumun sha kwagh u Satan yange senge ér a hemba kpen uumace iyol aluer ve hemen ayol a ve la ga. Heela tseegh ga, u eren nahan ne una gema a taver a taver mbagenev ishima u ve kpa undun gbenda u Yehova ga zee? Kwagh u una due ker yô a lu ican i yan gbem.

Yehova er kwagh sha kwaghfan nahan a de wener uumace ve lu sha tseeneke ve sha anshighe kpuaa. Shin er u eren nahan ne i gbe u una na ian ér ifer i za hemen sha anshighe kpuaa nahan kpa, á de ér kwagh a lu nahan sha u nan uumace ian i tesen aluer vea fatyô u hemen ayol a ve doo doo aa Aôndo shio yô, man aluer vea fatyô u lun a atindi ve aa kwagh u shami man kwagh u bo, shi eren sha á vough kpaa yô. Kanyi i due ken kwagh nee? Tsegh ku mbayiase ku orumace iv a ityav mbi nôngon kpii kua ifer man mkighir man ican i yan kpaa. Ihyembeato i í hembe Yehova ato kpa kwagh môm u injaa a dugh ker ga ne ia kure ikyaa i yange i va a mi ke Eden la gbem sha won.

Sha shighe shon ne môm, Aôndo tese dooshima na sha u nan Wan na Yesu Kristu un u yange na uma na sha u a lu ipaa la. Kwagh ne na uumace ian i waren sha ikyev i ibo i isholibo man ku u ihyembeato i Adam yange i va a mi la. Ipaa la bugh gbenda u uma u tsôron sha ci u mba ve ne Yesu jighjigh cica cii.—Yohane 3:16.

Yehova ngu surun se ishima ér ican i yan i orumace cii ka hila tsô. Orpasalmi nger wener: “Shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga. Kpa mbaasemaleghlegh yô, vea ya dyako u tar, á saan ve iyol sha mngee u bem.”—Pasalmi 37:10, 11.

Mkpeyol man Msaanyol Ngu ken Hemen

Akaaôron a profeti a á kure sha mi yô tese ér shighe u Aôndo una va a mkur u angev man ijungwen man ku la mgbôghom. Yange i na apostoli Yohane mpase u sha mnenge u kpilighyol u akaa a a lu van. A nger wener: “Tsô m nenge Sha u he man tar u he kpaa, gadia Sha u hiihii man tar u hiihii la kar kera, zegemnger kpaa kera lu ga. . . . Aôndo iyol Na Una lu a [uumace]. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” Í kaa a Yohane ken kwaghôron ugen u a tese var var ér uityendezwa mban ka ve ve kom u suur sha mi yô, ér: “Nger, gadia akaaôron ne ka a jighjigh man ka a mimi kpaa.”—Mpase 21:1-5.

Gema di ior ubiliôn ubiliôn mba ve kpe iyol ishô hii shighe u ihyembeato i ken Eden la di ye? Yehova er ityendezwa ér una hide a nder mba ve lu yaven shin ku la una na ve uma. Apostoli Paulu kaa ér: “M ngu a ishimaverenkeghen sha Aôndo . . . [mer] mbaperapera kua mba ve lu perapera ga vea nder shin ku.” (Aerenakaa 24:15) Mban ne vea lu a ishimaverenkeghen i lun uma shin tar u “perapera una tema ker yô.”—2 Peteru 3:13.

Yehova de wener uumace ve ya ican shin tar ne sha anshighe kpuaa vough er ter u lun a dooshima ngu a de ér i pav wan na aluer a fa wener u eren nahan la una va a mbamtsera mba tsan gbem yô. Nahan kpa, averen a lun gbem sha won nga keghen mba ve keren u eren ishima i Aôndo la. Paulu pase wener: “I gbihi akaa a i gbe a cii ken dang, lu sha ishima i a nahan ga, kpa lu sha ishima i Un u A gbihi a ker la. Kpa lu sha ishimaverenkeghen, gadia akaa a i gbe a la kpaa á va pase a sha ikev i mlu u hôôn la á tuhwa, á za a mi ken mlu u engem u lun a ikangenev ga u ônov mba Aôndo la.”—Mbaromanu 8:20, 21.

Mimi je kwagh ne ka loho—ka imba í se nengen sha televishen shin se er ken pipa i abaver la ga, kpa ka loho u dedoo. Ka loho u hemban doon u ú dugh hen “Aôndo u A lu a ishimasurun cii” u kwagh a gbe un sha a vese la.—2 Mbakorinte 1:3.

[Pictures on page 6]

Shighe tese ér uumace vea fatyô u hemen sha tseeneke ve ayol a ve doo doo a Aôndo shio ga.

[Credit Line]

Tsombor u ken Somalia: UN PHOTO 159849/M. GRANT; bom u i yer ér atôm la: USAF photo; afo a mbakwarev: U.S. National Archives photo