Yehova, Aôndo U Mimi

“U paam, TERE, We, Aôndo u mimi.”—PASALMI 31:5.

 1. Sha shighe u aie u eren lu ga la, akaa yange lu nena shaala, man shin tar di lu nena?

SHIGHE ugen yange lu u̱ mayange je aie u eren lu ga yô. Ujijingi mba lun vough, lu sha usha mba shaav mba i nengen a mi ga la, lu civir Orgban ve, u a lu “Aôndo u mimi” la. (Pasalmi 31:5) Sha shighe la, aie u eren shin icugh lu ga. Yehova ôron ônov nav mba ken jijingi mban kwagh u mimi. Ôron kwagh a ve sha mimi sha ci u ve doo un ishima shi kwagh ve gba un ishima kpen kpen. Kape shin tar kpaa, kwagh lu je la. Yehova yange gba nomsoor man kwase u hiihii la, á ver gbenda u una lamen a ve yô, nahan hanma shighe yô á ôr ve kwagh wang, sha gbenda u vough man sha gbenda u mimi kpaa. Nenge imba er kwagh ne yange una doo sha wono!

 2. Ka an yange nan hii aie u erene, man lu sha ci u nyi?

² Nahan kpa, shighe karen yô, wan u Aôndo u ken jijingi ugenegh mough sha cihi je gba hendan kwagh a Yehova ér un kpa una lu aôndo er un nahan. Or u ken jijingi, u i va hingir u yilan un ér Satan Diabolo ne, soo wener ior ve civir un. Sha er una kure awashima na ne yô, á va a aie u eren, hingir un gbenda u una udugh mbagenev sha u ve lu sha ikyev na yô. Kwagh u yange er ne na yô, á hingir “or u aie shi ka ter u aie” kpaa.—Yohane 8:44.

 3. Adam man Ifa yange ve er nena sha mbaaie mba Satan er ve laa, man lu akaa a nyi due kere?

³ Satan ôr kwagh a Ifa, kwase u hiihii la, sha ikyev i iyô, á kaa a na ér aluer á per tindi u Aôndo, á ya ityamegh ki kon u i te icin sha mi la kpa una kpe ga. Kwagh ne lu aie ci ca. Shi á kaa a na ér, aluer á ya ú yô una hingir er Aôndo nahan, una gba fan kwagh u dedoo man kwagh u bo. Kwaghôron ne kpa lu aie purututu. Shin er mayange je or lu a vande eren Ifa aie ga nahan kpa, ka keng yange una kav er kwagh u iyô i er un la a kaha kposo a kwagh u Aôndo lu ôr a nom na Adam la yô. Nahan kpa, u ma na Yehova jighjigh yô, gema lu Satan na un jighjigh ye. Nahan de Satan tsugh un vindi vindi, maa á zôr ityamegh ki kon la á ya je. Ken masejime yô, Adam kpa ya ityamegh ki kon shon. (Genese 3:1-6) Er or lu a vande eren Ifa aie ga nahan, kape Adam kpa mayange je or lu a vande eren un aie ga je la, kpa lu un i tsugh ga. (1 Timoteu 2:14) Un yô, lu sha ieren na la venda Orgban na ye. Kwagh u yange er ne va a akaa a vihin kpishi sha uumace jimin cii. Ihyembeato i Adam ne i samber a isholibo man ku man hôngor man atsan agen kpishi je sha tsombor na cii.—Mbaromanu 5:12.

 4. (a) Mbaaie mba yange i er ken Eden la ve lu inja nena? (b) Kanyi kwagh i gbe hange hange u se er ve Satan una tsugh se ga?

⁴ Kape aie kpa yange samber wuee je la. Doo u se fa ser mbaaie mba yange i er ken sule u Eden la lu u hendan a mlu u mimi u Yehova, man kwagh ne bende a na jighilii je. Satan kaa wener Aôndo ngu tsughun nom man kwase u hiihii la, sha nahan yô ngu nyumen ve kwagh u dedoo. Kpa sha kpôô yô, kwagh lu nahan ga cii. Adam man Ifa zua a ma kwagh môm u injaa ken ihyembeato ve la ga. Ve kpe vough er Yehova lu kaa a ve ér vea kpe nahan. Nahan cii kpa, Satan za hemen a mbaaie nav mba eren sha iyol i Yehova sha sendetyo ne heregh, zan zan je yô er uderimbaanyomov imôngo va kar ken hemen yô, apostoli Yohane nger kwagh sha ikyev i icighan jijingi kaa wener Satan ngu “tsughun tar cii.” (Mpase 12:9) Ka hange hange u se na mimi u Yehova jighjigh elegh elegh je kua Mkaanem nam kpaa, sha er Satan Diabolo una fatyô u tsughun se ga yô. Ú fatyô u maan jighjigh wou u nan hen Yehova shi taver un, shi nyôôso iyol you sha er ú hendan a icugh man mbaaie mba Orihyom na a lu samber a mi la nena?

Yehova Fa Mimi

 5, 6. (a) Mfe u Yehova a lu a mi la ngu nena? (b) Aluer i tôô mfe u uumace la i kar sha mfe u Yehova nahan una lu nena?

⁵ Bibilo pase kwa kimbir kimbir ér ka Yehova a “gbe akaa cii” ye. (Mbaefese 3:9) Ka un a “er Sha man tar man zegemnger kua akaa a a lu ken ve cii kpaa ye.” (Aerenakaa 4:24) E̱r i lu Yehova a lu Orgbanakaa cii yô, á fa mimi u hanma kwagh cii. U tesen ikyav yô: Hen ase sha kwagh u or u nan ndera iyou i nan cica cii nan bee, shi nan maa i shi nan mande haav mbu iyou shon vough vough nan za kur la. Nana fa iyou shon vindi vindi, a hemba or u i lu nan nan maa i̱ ga la zende zende je. Ior ka ve lu a mfe kpishi sha kwagh u i lu ve iyol ve ve ndera shi ve er sha ave ve yô. Kape Orgbanakaa cii kpa a fe hanma kwagh u a gbe sha ave na vindi vindi je la.

⁶ Profeti Yesaia pase er mfe u Yehova a lu la doo ungwan je zua ga. Á kaa ér: “Ka an nan kar gidamnger sha ikevwe i nan, shi nan kar Usha sha ishiva, nan kohol vuulevu u tar shin ikagh ki karen kwagh a mi, man nan kar iyohov mbu iwoov sha ikaren, man agungu kpaa sha iyôgh ki karen kwagh a mini? Ka an nan lu wa Jijingi u TER kwagh, shi nan lu orwasen Un henen kwagh, nan tesen Unu? Ka an A hen kwagh a nan man nan pase Un kwagh, nan tese Un gbenda u vough, nan seer Un mfe man nan pase Un gbenda u kaven kwagh ase?” (Yesaia 40:12-14) Sha mimi yô, Yehova ka “Aôndo u fan kwagh,” shi ngu a “mfe u mimi” kpaa. (1 Samuel 2:3; Yobu 36:4; 37:16) Nenge er mfe wase a ndahar, a kom sha u na cuku kpaa ga sha wono! Shin er uumace ve zough a mfe kpishi nahan kpa, mkav wase u se lu a mi sha akaa a igbetar la ar sha “akaa a ken kpe u aeren a [Aôndo]” tsô kpaa ga. Mkav ne ngu er ka “anivur u aun” a i kar sha ‘mdor u idyuran’ nahan.—Yobu 26:14.

 7. Kanyi yange Davidi kav sha kwagh u mfe u Yehova, man kanyi i doo u se kpa se kav keng-ne?

⁷ Er i lu Yehova a gbe se yô, doo u se kure a ishima yase ser á fa se doo doo je. Tor Davidi yange fa kwagh ne nahan. Á nger ér: “TERE, U tôvom, U fam. Mtem wam man mmough wam kpaa We U fa, U fa mhen wam ken ica je. U tôv zende wam man myav wam, U fa igbenda yam cii. Gadia er kwaghôron a lu a duem ken zwa ga je tsô, We TER U fa cii.” (Pasalmi 139:1-4) Nahan kpa, Davidi lu kav er uumace ve lu a ian i eren kwagh sha asema ve yô—Aôndo na se tahav mbu tsuan ser se ungwa imo na shin se hemba un ato. (Duteronomi 30:19, 20; Yosua 24:15) Nahan cii kpa, Yehova fa se hemba er se se fe ayol a ase la ica je. Á soo kwagh u a hembe doon sha ci wase yô, shi ngu a tahav mbu una kôôm igbenda yase kpaa. (Yeremia 10:23) Sha kpôô yô, ma ortesen shin orfankwagh tsor tsor shin or u wan se kwagh ugen kposo nan ngu u nana hemba tesen se mimi shin kwaghfan shin nana na se msaanyol ga.

Yehova Er Kwagh sha Mimi

 8. Er nan ve se fe ser Yehova er kwagh sha mimi-ni?

⁸ Aluer or fa mimi je kpa, kwagh ne tese ér hanma shighe yô nana ôron kwagh u mimi shin nana lu or u mimi ga. U tesen ikyav yô, Diabolo venda u ‘tilen sha mimi.’ (Yohane 8:44) Kpa Yehova ngu nahan ga, un ngu a “mimi wuee je.” (Ekesodu 34:6) Ruamabera ôr kwagh u mimi u Yehova ciligh ciligh je. Apostoli Paulu kaa ér “Aôndo . . . Una fatyô u eren aie . . . ga,” shi Aôndo “eren aie ga.” (Mbaheberu 6:18; Titu 1:2) Mimi ka vegher u hange hange u ieren i Aôndo. Se fatyô u haren sha Yehova shi suur sha a na sha ci u er kwagh sha mimi; mayange je tsughun mba ve te ikyaa a na la ga.

 9. Iti i Yehova gba zua a mimi nena?

⁹ Iti i Yehova jim jim kpa tese er a eren kwagh sha mimi yô. Inja i icighanti ne ér “Ka A Na i Hingir.” Iti ne pase er Yehova a eren akaa a ma kwagh u tagher un shio sha u hingir Or u Ivin uityendezwa nav cii yô. Ma or môm nan ngu a tahav mbu eren kwagh nahan ga. Er i lu Yehova a lu Uhembansha cii yô, ma kwagh môm tsô ngu u una yàngè un u kuren mbaawashima nav ga. Er Yehova a lu u mimi nahan, shi ka un tseegh a lu a tahav man kwaghfan u eren kwagh u á kende zwa a er la sha u á kure shami vough ye.

10. (a) Yosua nenge er Yehova a eren kwagh sha mimi nena? (b) Ka uityendezwa mba Yehova mba nyi nahan ú nenge ve kure?

¹⁰ Yosua lu môm ken ior kpishi mba ve nenge akaaeren a kpilighyol a a tese mimi u Yehova yô. Yosua lu ken Igipiti sha shighe u Yehova va a atsan pue sha ikyurior shon la; Yehova lu tsengaôron hanma ican cii i̱ mase eren shami vough ye. Kwagh ugen ken akaa a yange i tsengaôron u̱ Yosua yange nenge yô, lu mkur u ityendezwa i Yehova er wener una war Mbaiserael ken Igipiti, una hemen ve a yem a ve ken Tar u Ityendezwa shi una hemba akumautya a ageegh a Mbakanaan a á hendan a ve cii. Sha shighe u Yosua beeyol mase shin di u una kpe la, á kaa a mbatamen mba ikyurior i Iserael ér: “Ne kpaa ne fa ken asema a en cii kua ken uuma enev cii kpaa, ma kwagh môm sha akaa a dedoo a TER, Aôndo wen, ter sha a ven la bunde ga, a cii i kure ne a vough, ma kwagh môm bunde ga.” (Yosua 23:14) Shin er ú nenge a uivande mba Yosua nenge a mi ga la nahan kpa, sha ayange a ú lu uma ne, ú shi nenge er uityendezwa mbagen mba Aôndo a er la ve kuren shami je kpa?

Yehova Pasen Mimi

11. Kanyi i tese ér Yehova soon ér una ôr uumace mimi?

¹¹ Hen ase a ishima you yôô, aluer ormaren nan ngu a mfe kpishi, kpa nan fe lamen a mbayev mba nan ga nahan a lu nena. Doo ú kpishi er Yehova ti a lu inja nahan ga he? Yehova lamen a uumace sha dooshima, shi lamen a ve gbar gbar kpaa. Ruamabera yila un ér “Ortesen Uhembancii” (Yesaia 30:20, NW.) Mba ve keghen ato a na ga je kpaa, ka a tese ve mhôônom nam, a lam a ve. Ikyav i tesen yô, Yehova yange kaa a Esekiel ér á za pase ior mba yange fa doo doo ér vea kegh ato a na ga la kwagh na. Yehova kaa ér: “Wan u or, za ase hen ya u Iserael, za ôr ve akaaôron a Am.” Maa á ta icin ér: “Una ver ato her a we ga; gadia ve rumun u veren ato her a Mo ga; gadia ya u Iserael cii ka mbatavertyough man mbakehenasema kpaa.” Tom ne taver tsô, kpa Esekiel er ú sha jighjigh, man er yange er kwagh nahan yô, lu mhôônom ma Yehova a lu a mi la je lu tese ye. Aluer ú ngu pasen kwagh hen ijiir i tom u kwaghpasen u taver her tsung man ú har sha Aôndo yô, ú fatyô u lun a vangertiôr wer una taver we ishima er yange taver profeti Esekiel nahan keng a bunde ga.—Esekiel 3:4, 7-9.

12, 13. Ka sha nyi igbenda nahan Aôndo a lam a uumacee?

¹² Sar Yehova u “ior cii ve̱ war ve̱ ar sha mfe u fan mimi la.” (1 Timoteu 2:4) A ôr kwagh sha ikyev i uprofeti nav man mbatyomov nav kua sha ikyev i Yesu Kristu u a lu Wan na u ishima ishima la je kpaa. (Mbaheberu 1:1, 2; 2:2) Yesu yange kaa a Pilatu ér: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye. Hanma or u nan lu or u mimi yô, nan ongo imo Yam.” Pilatu zua a ian injaa i ma hen mimi u gbenda u Yehova ver u van a myom la sha ikyev i Wan u Aôndo iyol na. Nahan kpa, kwagh gba Pilatu a mimi ga, shi soo u henen kwagh sha ikyev i Yesu kpaa ga. Pilatu gema tôv a tôv un, pine un ér: “Ka nyi i lu mimi?” (Yohane 18:37, 38) Kwagh u Pilatu er ne vihi tsô! Kpa, ior mbagenev kpishi ungwa mimi u Yesu yôô la. Á kaa a mbahenen nav wener: “Saan ashe a en iyol, gadia nga nengen, ato a en kpaa saan a iyol gadia nga ungwan.”—Mateu 13:16.

¹³ Yehova koso mimi ken Bibilo, shi á na ior mimi ne hanma ijiir cii. Bibilo pase se akaa cii sha mimi. I̱ pase se aeren a Aôndo man mbaawashima nav man atindi a na, shi i̱ pase se hanma kwagh u a lu eren orumace cii yô sha mimi. Yesu er msen hen Yehova kaa ér: “Ka kwaghôron Wou je a lu mimi ye.” (Yohane 17:17) Ka sha ci u nahan ve, Bibilo i lu takerada u ú dugh tseer tseer ye. Ka i̱ tseegh i̱ lu takerada u Aôndo u̱ a fe akaa cii la a ne i nger ye. (2 Timoteu 3:16) Bibilo ka iyua injaa kpishi hen uumace, man ngi mbashiren Aôndo tom a inja je zua ga. Se lu eren kwagh sha kwaghfan aluer se mba ôron i̱ sha hanma sev yô.

Kôr Mimi Gbang Gbang

14. Ka akaa a nyi nahan Yehova a kaa ér una eree, man er nan ve i doo u se na un jighjigh?

¹⁴ Doo u se wa ikyo sha kwagh u Yehova a er se ken Mkaanem nam la doo doo. Yehova ngu kwagh u a kaa ér un ngu la, shi una er kwagh u a kende zwa a kaa ér una er yô. Se mba a atôakaa a se na Aôndo jighjigh je ka u ôron a ôr ga. Se fatyô u nan jighjigh sha kwagh u Yehova a kaa wener una “tsaha mba ve fe Aôndo ga man shi mba ve we Loho u Dedoo u Ter wase Yesu iko ga la kpaa” una tsaha ve la. (2 Mbatesalonika 1:8) Shi se na nen Yehova jighjigh ser, er á kaa ér mba ve zende perapera ityô la ve doo un ishima, shi una na mba ve lu a jighjigh u nan la uma u tsôron shi una kar a ican man mliam man ku kera nahan, kape una er je la. Yehova tese ér ityendezwa i se mase teren heen ne ia iv sha mi keng keng je; á kaa a apostoli Yohane ér: “Nger, gadia akaaôron ne ka a jighjigh man ka a mimi kpaa.”—Mpase 21:4, 5; Anzaakaa 15:9; Yohane 3:36.

15. Ka mbaaie mba nyi nahan Satan a samber a mini?

¹⁵ Satan kaha kposo a Yehova kuaa je. Er ma a pasen ior kwagh u mimi sha u tan ve iwanger yô, gem tsughun a tsugh ior. Satan samber a mbaaie kpishi sha er una kure awashima na u a lu a mi ù udugh ior duen a ve ken mcivir u mimi kera la. U tesen ikyav yô, Satan soo wener una mgbegha se se na jighjigh ser Aôndo nenge a ma ityôkyaa i una kporom ikyua a vese ga, shi kwagh tsô kpa gba un sha ican i se lu yan shin tar ne ga. Nahan kpa, Bibilo i tese ér Yehova we akaa a a gbe á la ikyo kpishi je shi kwaghbo man ican i yan vihi un ishima je zua ga. (Aerenakaa 17:24-30) Satan shi soo wener ior ve na jighjigh ér mzende u zendan akaa a ken jijingi ityô la ka shighe u vihin gbilin gbilin. Kpa er ma i lu nahan yô, Ruamabera taver se ishima ér ‘Aôndo ban a perapera ga. Tom wase ua hungur Un ga, shin dooshima u se tese sha ci u iti Na kpaa ga.’ Heela tseegh ga, ruamabera shi pase wang nahan ér “Un ne mba ve lu keren Un la injar.”—Mbaheberu 6:10; 11:6.

16. Er nan ve i lu hange hange u Mbakristu vea za hemen u lun tsevaa shi vea kôr mimi her gbang gbang-na?

¹⁶ Apostoli Paulu ôr kwagh u Satan kaa ér: ‘Aôndo u tar u ainge ne pir mbananjighjigh ga ashe a asema sha u ve̱ de nengen a iwanger i Loho u Dedoo u iengem i Kristu u̱ A lu ibeen i Aôndo la ga.’ (2 Mbakorinte 4:4) Satan Diabolo tsugh ior mbagenev vindi vindi er yange er a Ifa nahan. Mbagenev yô, dondo ieren i Adam la, un shon u yange i tsugh un ga, kpa lu un a ishima na dondo gbenda u ihyembeato la. (Yuda 5, 11) Sha nahan yô, ka a inja tsung u Mbakristu vea za hemen u lun tsevaa shi vea kôr mimi her gbang gbang kpaa.

Yehova Soo Ér Se Lu a “Jighjigh u Lun A Imanger Ga La”

17. Kanyi i gbe u se er keng keng ve Yehova una lumun se?

¹⁷ Er Yehova a eren kwagh sha mimi sha akaaeren a na cii yô, á ver ishima wener mba ve civir un la kpaa ve eren kwagh sha mimi. Orpasalmi yange nger ér: “TERE, ka an nana tsa ken tenti Wouwe? Man ka an nana lu sha icighanwo Wouwe? Ka u nan zenden jighilaa, nan eren perapera, nan er kwagh sha mimi ken ishima i nan” la. (Pasalmi 15:1, 2) Mter u i we icam i ter icighanwo u Yehova la, a shi nan kpa una umbur Mbayuda mba yange ve wan icam ne la kwagh u Uwo u Shion, ape Tor Davidi va a areki u ikyuryan va ver ken tenti u yange tim sha uwo shon la. (2 Samuel 6:12, 17) Uwo la man tenti la umbur ior kwagh u ijiir i Yehova i teman i sha ikyav la. Lu heen ior van hen Aôndo sha u va zamber un ér a zungwe ve ye.

18. (a) Kanyi i gbe u saa or a er keng keng ve nana lu ijende i Aôndo? (b) Kanyi se ôr kwagh sha mi ken kwaghngeren u a dondon nee?

¹⁸ Hanma or u nan soo u lun ijende i Yehova yô, saa nana ôron kwagh sha mimi “ken ishima i nan” keng keng, a lun sha ikpazwa ga. Ka hange hange u mba ve lu azende a Aôndo a mimi la vea lu a ishima i mimi shi vea tese ér ve mba a “jighjigh u lun a imanger ga la,” gadia ka ken ishima aeren a mimi á dugh ye. (1 Timoteu 1:5; Mateu 12:34, 35) Or u nan lu ijende i Aôndo yô, nan eren kwagh sha anyighe shin sha icugh ga, sha ci u “orcugh yô, ndôhôr TER ishima.” (Pasalmi 5:6) Mbashiada mba Yehova sha tar cii mba kaven Aôndo ve sha u nôngon kpoghuloo lun ior mba mimi. Kwaghngeren u a dondon ne una ôr kwagh sha itinekwagh ne.

Ú Na Mlumun Wer Nyi?

• Er nan ve Yehova a fe mimi u hanma kwagh ciilii?

• Kanyi i tese ér Yehova er kwagh sha mimi?

• Yehova pase se mimi nena?

• Kanyi i lu hange hange u se er sha gbar u kwagh u mimi?

[Pictures on page 20]

Aôndo u mimi fa akaa a á gbe la vighe vighe je mshi ngu ga

[Pictures on page 23]

Uityendezwa mba Yehova vea kure sha mi keng, a bunde ga