Ú Za Hemen U ‘Zenden Sha Jijingi’ Kpa?
“Zende nen sha Jijingi nahan né kera eren sha asaren a iyolough ga.”—MBAGALATIA 5:16.
1. Se er nan ve ishima ia de u nyian se ér se er icighan jijingi isholibo?
KWAGH u una wase se ve ishima a de nyian se ér se er icighan jijingi u Yehova isholibo yô, ka u eren sha kwagh u apostoli Paulu a kaa ér se er ne. A kaa ér: “Zende nen sha Jijingi nahan né kera eren sha asaren a iyolough ga.” (Mbagalatia 5:16) Aluer se de ser jijingi u Aôndo a hemen se yô, mayange je asaren a iyolough a vough ga la aa hemba se ga.—Mbaromanu 8:2-10.
2, 3. Aluer se mba zenden sha jijingi yô, kwagh la una wase se nena?
2 Aluer se za hemen u ‘zenden sha Jijingi’ yô, tahav mbu tomov mbu Aôndo mbu a mgbegha se se ungwan imo i Yehova. Nahan se dondo aeren a Aôndo ken tom wase u pasen kwagh man ken tiônnongo man hen ya kua ajiir agen kpaa. Ieren yase a ikyar yase i ken ivese man ônov asev man mba ve civir Aôndo a vese imôngo kua mbagenev cii ia tese ér se ume ityamegh ki jijingi u Aôndo.
3 Aluer se mba eren uma “sha inja i mlu u Aôndo” yô se palegh isholibo. (1 Peteru 4:1-6) Aluer se mba a jijingi u Aôndo yô mayange je se er isholibo i a de se ga la ga. Kpa ka sha igbenda i dedoo igen i nyi nahan aluer se mba zenden sha jijingi ve se zua a iwasene?
Lu Ikyua a Aôndo man Kristu
4, 5. Aluer se mba zenden sha jijingi yô, se nengen Yesu nena?
4 Er se zenden sha icighan jijingi yô, se ya ikyar kôôsôô vea Aôndo man Wan na. Paulu yange nger Mbakristu mba ken Korinte sha kwagh u uiyua mba jijingi, kaa ér: “M ngu pasen [ne mba ne vanden civir akombo] ne sha u fa nen, ma or u nan er kwagh sha Jijingi u Aôndo yô, nana kaa er: Yesu ngu a ifan iyol ga, man shi ma or nana fatyô u kaan er: Yesu ka Ter ga; saa sha Icighan Jijingi.” (1 Mbakorinte 12:1-3) Nyityô kwagh i i̱ mgbegh ior u wan Yesu ifan cii yô i due ken Satan Diabolo. Er se lu Mbakristu mba ve zenden sha jijingi yô, se na jighjigh ser Yehova nder Yesu shin mbakpenev shi a kende un sha hemba akaa agen a á gbe cii. (Mbafilipi 2:5-11) Se na nagh ku ipaan ku Kristu la jighjigh shi se lumun ser ka Yesu, Aôndo a ver un Ter wase ye.
5 Mbagenev mba ve senge ér mba Mbakristu sha derianyom u hiihii la yange ve nyiman ér Yesu va ken iyol i or ga. (2 Yohane 7-11) Er mbagenev lumun atesen a aiegh la yô, ve undu atesen a mimi sha kwagh u Yesu u a lu Mesiya la. (Marku 1:9-11; Yohane 1:1, 14) Aluer se mba zenden sha jijingi yô, mayange je se venda mimi ga. Saa se lu per ken jijingi ve Yehova una zungwe se mhôônom shi se za hemen u “zenden sha mimi” ye. (3 Yohane 3, 4) Nahan se palegh nen hanma inja i mvende u vendan mimi cii sha er se ya ikyar vea Ter wase u sha la taveraa yô.
6. Ka aeren a nyi jijingi u Aôndo ka a wase mba ve zenden sha jijingi ve lu a mini?
6 Shighe u Paulu lu ôron kwagh u “aeren a iyolough” er idya man hôngor la, a ter mbampav man mvende u vendan mimi geman civir akombo la kpaa. Kpa a pase wener: “Mba ve lu mba Kristu Yesu yô, ve mande iyol a ishima i kenden kua asaren a i sha kon u mtsaha imôngo ve. Aluer se lu uma sha Jijingi yô, shi sé zenden nen sha Jijingi kpaa.” (Mbagalatia 5:19-21, 24, 25, NW ) Ka aeren a nyi tahav mbu tomov mbu Aôndo ka mbu wase mba ve eren akaa a tesen ér mba zenden sha jijingi la ve lu a mini? Paulu yange nger ér: “Ityamegh ki Jijingi yô, ka dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.” (Mbagalatia 5:22, 23) De se time sha avegher a ityamegh ki jijingi ne.
‘Doo Nen Ayol a En’
7. Dooshima ka nyi, man dooshima eren nyi kpa gem eren nyi ga?
7 Vegher ugen u ityamegh ki jijingi yô ka dooshima, man dooshima wa u soon kwagh u mbagenev kpishi shi wan ve ikyo sha mimi shi lun kôôsôô a ve kpaa. I ôr ken Ruamabera ér, “Aôndo ka dooshima je” gadia ka un ieren la i hembe ngeen ken a na ye. Aôndo man Wan na tese uumace dooshima u hemban cii sha nagh ku ipaan ku Yesu Kristu na la. (1 Yohane 4:8; Yohane 3:16; 15:13; Mbaromanu 5:8) Er se lu mbadondon Yesu yô, mba fe se sha mdoo u se doo ayol a ase la. (Yohane 13:34, 35) Jighilii yô, i wa se tindi ér se ‘doo ayol a ase.’ (1 Yohane 3:23) Shi Paulu kaa ér dooshima we ishima, lu sar sar kpaa. Gbe iyuhe ga shi gengese iyol shin we dang shin keren kwagh na iyol na tsô ga. Nyoon ishima ga shi koson kwagh u bo ken ishima kpaa ga. Ka saan un iyol a ifer ga, kpa saan un iyol a kwagh u mimi. Un we ishima a akaa cii shi ne jighjigh sha akaa cii shi taver ishima sha akaa cii kpaa. Heela tseegh ga, dooshima been mayange ga.—1 Mbakorinte 13:4-8.
8. Hii nan ve i doo u mbacivir Yehova a vese imôngo vea doo se ishima?
8 Aluer se de jijingi u Aôndo maa dooshima ken a vese yô, Aôndo una doo se ishima kua mbawanndor a vese kpaa. (Mateu 22:37-39) Apostoli Yohane yange nger ér: “Or u nan lu a dooshima ga yô, ka ken ku nan tem ye. Hanma or u nan ker anmgbian u nan ihyom yô, ka orwuanor je; ne fa ma orwuanor nan ngu a uma u tsôron ken a nan ga.” (1 Yohane 3:14, 15) Yange or a wua or abu, man nana yevese a za yer ken gar u waren ker u ken tar u Iserael yô, i tôv nan i nenge aluer nan vanden kôron or u nan woo la ihyom ga yô, cii ve nan war ye. (Duteronomi 19:4, 11-13) Aluer icighan jijingi ngu hemen se yô, Aôndo man mba civir Aôndo a vese imôngo vea doo se ishima, kua mbagenev kpaa.
“Iember i Ne Ember Ter la Ka Agee a En Je”
9, 10. Iember kanyi, man ka akaa agen a nyi nahan a ne se iembere?
9 Iember ka shighe u i saan or iyol ken ishima tsung yô. Yehova ka “Aôndo u saan saan.” (1 Timoteu 1:11, NW; Pasalmi 104:31) Doo Wan u Aôndo u eren ishima i Ter na. (Pasalmi 40:8; Mbaheberu 10:7-9) Shi ‘iember i se ember TER la ka agee a ase je.’—Nehemia 8:10.
10 Iember i Aôndo a ne se la ngi ne se mkom sha u eren ishima i Aôndo shighe u uma a taver shin se lu zungwen shin i lu tôvon se a ican je kpaa. “Mfe u fan Aôndo” la ngu a na se msaanyol je i zua ga! (Anzaakaa 2:1-5) Se ya ikyar a Aôndo saan saan sha ci u mfe u vough u se zough a mi ne man jighjigh u se ne nagh ku ipaan ku Yesu la. (1 Yohane 2:1, 2) Kwagh ugen u shi a ne se iember yô ka mlu u se lu ken mzough u anmgbianev u mimi tar sha won cii la. (Sefania 3:9; Hagai 2:7) Ishimaverenkeghen i Tartor man ian i civirigh i se lu a mi i pasen loho u dedoo ne kpa ngi ne se iember. (Mateu 6:9, 10; 24:14) Kape ishimaveren i va zuan a uma u tsôron kpa i ne se iember je la. (Yohane 17:3) Er se lu a ishimaveren i doon ne yô, doo u se “mgbough a iember.”—Duteronomi 16:15.
Lu Bem Bem shi Waan Ishima Kpaa
11, 12. (a) U pase inja i bem wer nyi? (b) Bem u Aôndo la benden a vese nena?
11 Bem, u a lu vegher u ityamegh ki jijingi la, ka shighe u ayôôso a lu ga, ishima kpa i lu zan or iyol sha ma kwagh ga yô. Ter wase u sha la ka Aôndo u bem. I tôndo zwa a vese ér: “TER Una ver ior Nav sha bem.” (Pasalmi 29:11; 1 Mbakorinte 14:33) Yesu yange kaa a mbahenen nav ér: “M ngu veren ne bem, M ngu nan ne bem Wam.” (Yohane 14:27) Kwagh la yange wase mbadondon un nena?
12 Bem u Yesu na mbahenen nav la yange sur ve asema, nahan ve kera lu a mciem ga. Shighe u ve ngohol icighan jijingi la ve hemba lun a bem cii. (Yohane 14:26) Er jijingi a lu hemen se shi Yehova a ongo mbamsen asev yô, se mba ember “bem u Aôndo” u a gandeôron ne, gadia ne se m-mem. (Mbafilipi 4:6, 7) U seer yô, jijingi u Yehova wasen se u lun bem bem a mba ve civir Aôndo a vese imôngo la kua mbagenev kpaa.—Mbaromanu 12:18; 1 Mbatesalonika 5:13.
13, 14. Ishimawan kanyi, man er nan ve i doo u se waan ishima?
13 Ishima i wan gba zua vea u lun bem bem, gadia ka u wan ishima a kwagh u vihin u or er a orgen yô, veren ishima ér kwagh a va gema kposo. Aôndo we ishima. (Mbaromanu 9:22-24) Yesu kpa yange waan ishima. Ishimawan i Yesu la ngi se a inja nyian, gadia Paulu kaa ér: “Ka nahan man i zungwem mhôônom ye, ka sha u Yesu Una tese ishimawan Na cii ken mo u m hembe ne, i̱ hingir mbagenev ikyav mba vea mase va nan Un jighjigh sha u zuan a uma u tsôron yô.”—1 Timoteu 1:16.
14 Ishimawan ka i wase se u taver ishima shighe u mbagenev ve lam a vese dang shin ve er se kwagh u vihin je kpaa. Paulu yange wa Mbakristu kwagh ér: “Waan nen ishima a ior cii.” (1 Mbatesalonika 5:14) Er se cii se yen shi ashighe agen ka se er kwagh u vihin yô, ka se soo ser mbagenev ve waan ishima a vese shighe u se er ve kwagh u vihin yô. Sha nahan yô, i̱ hingir ieren yase u “wan ishima saan saan.”—Mbakolose 1:9-12.
Lu Sar Sar shi Eren Erdoo
15. Pase kwagh u a lu sar sar yô shi tese akav a ieren ne kpaa.
15 Ka se tese ieren i sar sar zum u kwagh u mbagenev a gbe se ishima, se lu ôron kwagh a ve kundu kundu shi eren akaa a wasen ve kpaa yô. Yehova ngu sar sar, Wan na kpa ngu sar sar. (Mbaromanu 2:4; 2 Mbakorinte 10:1) Mbakristu mba ve civir Aôndo cii gba u vea lu sar sar. (Mika 6:8; Mbakolose 3:12) Ior mba ve ye ikyar vea Aôndo ga je kpa “er a [mbagenev] doo je cier iyol.” (Aerenakaa 27:3; 28:2) Nahan aluer se mba “zenden sha jijingi” yô se lu sar sar.
16. Ka akaa a nyi nahan a mgbeghan se u eren erdoo a mbageneve?
16 Shighe u or lam a vese dang shin nan er se kwagh u vihin, nahan ishima i vihi se ker je kpa se fatyô u eren a nan doo doo. Paulu kaa ér: “Nyoon nen ishima, kpa de eren nen isholibo ga, iyange i̱ de been ne a ishima i vihin her ga. De ne nen diabolo ian ga. . . . Lu nen sar sar ayol a en, zungwen nen mhôônom, de nen ayol a en kwaghbo, er Aôndo kpaa A de ne ken Kristu nahan.” (Mbaefese 4:26, 27, 32) Hemba doon u eren a mba ve lu yan ican la doo doo cii. Kpa, aluer ortamen u ken Kristu nan nenge or u ken tiônnongo nan ngu nôngon u undun “kwagh u doon, man kwagh u perapera man kwagh u mimi” kpa nan cia ér nana va vihi or shon ishima, nahan nan kera wa nan kwagh ken Ruamabera ga yô, nan ngu eren erdoo a nan ga.—Mbaefese 5:9.
17, 18. Inja i erdoo ér nyi, man doo u ieren ne ia mgbegha se u eren nyi?
17 Erdoo shin mdoom ka ieren i dedoo, ka mlu u vough u doon tsung shin ieren i eren a orgen doo doo. Aôndo hemba mdoom tswen. (Pasalmi 25:8; Sekaria 9:17) Yesu ngu a ieren i dedoo shi a hemba fan u eren a mbagenev doon kpaa. Nahan kpa, shighe u i yila un ér “Ortesen u dedoo” yô a venda u lumun ér un ngu or u “dedoo.” (Marku 10:17, 18) Adooga lu sha ci u yange fa er i lu Aôndo a lu ikyav i hemban cii i erdoo yô.
18 Se mba fetyô u eren akaa dedoo tsembelee ga sha ci u dyako u isholibo u se ye la. (Mbaromanu 5:12) Kpa, aluer se sôn Aôndo ser a̱ ‘tese se mkav u dedoo’ yô se fatyô u eren erdoo a mbagenev. (Pasalmi 119:66) Paulu yange kaa a Mbakristu mba ve lu ken Roma mbara ér: “Anmgbianev av, sha kwagh wen yô, m fa dedoo mer ne mgbough a mdoom shi ne iv a mfe gbing gbing kpaa.” (Mbaromanu 15:14) Or u nan lu ortamen u ken Kristu yô nana̱ lu or u “kwagh u dedoo a doo nan” yô. (Titu 1:7, 8) Aluer jijingi u Aôndo ngu hemen se yô a hingir u fan se sha u eren a mbagenev dedoo, Yehova kpa una ‘umbur se sha akaa a dedoo’ a se er a mbagenev la.—Nehemia 5:19; 13:31.
“Jighjigh u Lun a Imanger Ga”
19. I pase inja i jighjigh u nan ken Mbaheberu 11:1 nena?
19 Jighjigh u nan “ka u fan kwagh u ishimaverenkeghen yase i lu sha mi la dedoo a akpelan a tan ga, ka ikyav i akaa a i nengen a mi ga la.” Ieren ne kpa ka vegher u ityamegh ki jijingi. (Mbaheberu 11:1) Aluer se na jighjigh yô se tôô ser uityendezwa mba Yehova cii vea kure sha mi vough. Ikyav i akaa a i nengen a mi ga la i̱ taver je yô a fatyô u kaan ér jighjigh u nan ngu kwaghmôm a ikyav shon. U tesen ikyav yô, akaa a Aôndo a gbe la tese ér Orgbanakaa ngu. Aluer se mba zenden sha jijingi yô, ka imba jighjigh u nan u se lu a mi je la.
20. Kanyi i lu “isholibo i ka i tseren se abur abur” laa, man se palegh i̱ man aeren a iyolough nena?
20 M-ban u jighjigh u nan ka “isholibo i ka i tseren se abur abur” yô. (Mbaheberu 12:1) Gba u se suur sha jijingi u Aôndo ve se kôr cio u palegh aeren a iyolough man inyaregh ki keren man atesen a aiegh a aa fatyô u vihin jighjigh wase la ye. (Mbakolose 2:8; 1 Timoteu 6:9, 10; 2 Timoteu 4:3-5) Jijingi u Aôndo ka a na mbacivir Yehova mba ainge ve lu a jighjigh u nan er mba civir un mba ve lu cii shighe u Mbakristu la man mbagenev mba i nger kwagh ve ken Bibilo mbara kpa lu a mi nahan. (Mbaheberu 11:2-40) Shi aluer se mba a “jighjigh u lun a imanger ga” la yô, una seer taver jighjigh u nan u mbagenev kpaa.—1 Timoteu 1:5; Mbaheberu 13:7.
Lu Ishima Legh Legh shi Kôron Iyol Tsaha
21, 22. Ishima i legh legh ka nyi, man er nan ve i doo u se lu a ieren nee?
21 Ishima i legh legh ka u or lun inja kundu kundu shi nyoon ishima ga. Ishima i legh legh ka ieren i Aôndo igen. Se fa kwagh ne sha ci u Yesu u lu inja legh legh la yange kav Yehova je kwagh shi ga. (Mateu 11:28-30; Yohane 1:18; 5:19) Nahan kanyi kwagh Aôndo a soo hen mba civir unu?
22 Er se lu Mbakristu yô, Aôndo soo ér se lu a ‘ishima i legh legh hen ior cii.’ (Titu 3:2) Ka se tese ishima i legh legh ken tom wase u pasen kwagh la. I wa mba ve vie ken jijingi la kwagh ér ve kôôm Mbakristu mba ve nenge gbev la “sha ishima i legh legh.” (Mbagalatia 6:1) Se cii se fatyô u nan sha er mzough man bem u Mbakristu la una za hemen yô sha u lun “a iyolgengese ga man a ishima i legh legh” kpaa. (Mbaefese 4:1-3) Aluer se mba zenden sha jijingi hanma shighe shi se mba kôron iyol yase tsaha yô, se lu tesen ishima i legh legh.
23, 24. Iyolkôrontsaha kanyi, man ngi wasen se nena?
23 Iyolkôrontsaha ka i wase se u wan ikyo sha mhen wase man iliam yase kua ieren yase kpaa. Yehova yange “wa ishima gbang gbang,” inja na yô yange kôr iyol na tsaha sha ieren na a ior i Babilon mba ve nande Yerusalem hingir ice la. (Yesaia 42:14) Wan na yange ‘ver se ikyav’ sha iyol i a kôr tsaha shighe u lu yan atsan la. Shi apostoli Peteru wa Mbakristu kwagh ér ve ‘seer u kôron iyol tsaha sha kwaghfan.’—1 Peteru 2:21-23; 2 Peteru 1:5-8.
24 Gba u mbatamen mba ken Kristu vea kôron iyol tsaha. (Titu 1:7, 8) Jighilii yô, mba icighan jijingi a hemen ve yô mba ker ayol a ve tsaha, nahan ka ve palegh idya i eren man iliam i dang shin nyityô kwagh i vihin Yehova cii. Aluer se de ser jijingi u Aôndo a maa iyolkôrontsaha ken a vese yô, mbagenev vea fa sha ieren man iliam yase.
Za Hemen u Zenden sha jijingi
25, 26. U zenden sha jijingi la una bende a ikyaryan yase nyian man ken hemen nena?
25 Aluer se mba zenden sha jighjigh yô, se lu mba pasen kwagh u Tartor sha gbashima. (Aerenakaa 18:24-26) A doo ior u lun a vese imôngo, hemban je yô mba civir Aôndo. Er se lu mba jijingi a hemen ve yô, shi se lu mba taver mbacivir Yehova a vese imôngo asema. (Mbafilipi 2:1-4) Ka isharen i hanma Orkristu je ne ga he?
26 Ka kwagh u ican kpishi u zenden sha jijingi ken tar u Satan a hemen u ne. (1 Yohane 5:19) Nahan kpa ior umiliôn imôngo mba zenden sha jijingi nyian. Aluer se suur sha Yehova a ishima yase cii yô, se ember uma nyian shi se za hemen u zenden sha igbenda i perapera i Aôndo u a ne se icighan jijingi sha dooshima la gbem sha won.—Pasalmi 128:1; Anzaakaa 3:5, 6.
Ú Na Mlumun Wer Nyi?
• U ‘zenden sha jijingi’ la bende a ikyar i se ye vea Aôndo man Wan na la nena?
• Ka aeren a nyi a kohol cii a lu ityamegh ki jijingi?
• Ka sha igbenda igen i nyi se fatyô u umen ityamegh ki jijingi u Aôndo?
• U zenden sha jijingi la bende a vese nyian man mlu wase u ken hemen nena?
[Picture on page 10]
Icighan jijingi u Yehova ka a na anmgbianev asev ve doo se ishima
[Picture on page 11]
Lu sar sar sha u ôron akaa shi eren akaa a aa wase mbagenev yô