Kwagh U Se Hen Hen Yesu

Sha Kwagh u Mbamsen mba Aôndo a Ongo La

Ashighe kpishi Yesu yange una soo u eren msen yô, a yem hen ijiir i i huan yô, shi yange kaa a mbadondon un ér ve kpa ve eren nahan. Bibilo kaa ér: “Tsô lu eren msen ijiir igen, kur yô, orhenen Na u môm kaa a Na er: Tere, tese se u eren msen . . . A kaa a ve er: Zum u nea eren msen yô, kaa nen ner: Tere, i̱ tsegha iti You.” (Luka 5:16; 11:​1, 2) Nahan Yesu tese ér se eren msen hen Ter na, Yehova. Sha ci u ka un tseegh a lu Orgban se shi a “ongo msen” ye.​—⁠Pasalmi 65:⁠2.

Aôndo Ongo Mbamsen Ciili?

Aôndo ongo mbamsen mba i kimbir a kimbir la ga. Yesu kaa ér: “Sha msen u eren la kpaa, de zeren nen kimbir gbilin gbilin . . . ga.” (Mateu 6:⁠7) Doo u se lamen a Ter wase u sha la a ishima yase i môm. Sha shighe ugen la Yesu kaa ér, aluer orsholibo u nan soo u geman ishima sha mimi nan er msen yô, Aôndo una hemba ungwan msen u nan la a msen u or u wan imanger u nan dondon aeren a kwaghaôndo u nan la. (Luka 18:​10-14) Nahan aluer se soo ser Aôndo a ungwa mbamsen asev yô, a gba u se hide a iyol yase jime, se nôngon u eren akaa a Aôndo a kaa ér se er la. Yesu shi kaa ér: “M er akaa er Ter A tesem yô . . . M eren akaa a doon Un gbem.” (Yohane 8:​28, 29) Yesu yange ôr ken msen ér: “Ka ishima Yam ga, i̱ lu ishima You i̱ er ye.”​—⁠Luka 22:⁠42.

Doo u se er msen se sôn nyi?

Er i vande vihin Aôndo iti kera yô, Yesu kaa ér: ‘Yô, eren nen msen nahan, ner: Ter wase u Sha, i̱ tsegha iti You, tartor Wou u̱ va, i̱ er ishima You shin tar kpaa vough er i eren i Sha nahan.’ (Mateu 6:​9, 10) Doo u se eren msen ser Tartor u Aôndo u va, sha ci u ka Tartor la ua na a er ishima i Aôndo, sha man shin tar ye. Yesu kaa ér se fatyô u eren msen ser, Aôndo a na se “kwaghyan wase u a lu sha ci u ayange ayange la.” Shi se fatyô u eren msen hen Yehova sha kwagh u tom wase man ijiir i tsan man akondo man mkpeyol wase kua mbamgbe asev mbagen kpaa. Heela tseegh ga, Yesu shi kaa ér se eren msen ser i de se asorabo ase.​—⁠Luka 11:​3, 4.

Doo u se eren msen sha ci u mbagenevee?

Yesu yange eren msen sha ci u mbagenev. Bibilo kaa ér: “I va a mbayev mba kiriki her a Na er A̱ penda ve ave sha ityou, A̱ er msen; kpa mbahenen gema zôhô a ve.” (Mateu 19:13) Yesu yange kaa a apostoli Peteru ér: “M er msen sha ci wou sha u jighjigh wou u nan a̱ de yen ga yô.” (Luka 22:32) Yesu kaa a mbadondon un ér ve eren msen sha ci u mbagenev, kua mba ve tev ve a ican man mba ve eren ve akaa a dang la je kpaa.​—⁠Mateu 5:44; Luka 6:⁠28.

Doo u se taver ishima sha msen u eren sha ci u nyi?

Yesu eren msen kpoghuloo, nahan a taver mbadondon un ishima ér ve “eren msen zumbee,” ve de ‘gbe uwer ga.’ (Luka 18:⁠1) Yehova lôhô se ér se tese ser se na un jighjigh sha u sônon un akaa a kwagh a gbe se a mi la hanma shighe. Yesu kaa ér, “Sôn nen, á na ne.” Nahan cii kpa, kwagh ne tese ér ka taver Yehova u ungwan msen u mba a doo ve ishima shi ve civir un ér ngu Ter ve la ga. Yesu kaa ér: “Aluer ne mba ne lu mbaaferev je kpaa ne fa u nan ônov enev uiwua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?”​—⁠Luka 11:​5-13.

Aluer u soo u seer ôron kwagh u msen yô, ôr ityough 17 ki takerada u Bibilo Tese Ér Nyi Jimi? laa

[Ngeren u shin kpe]