Tese Wer U Ngu Ordondon Kristu U Mimi

‘Hanma kon u injaa ngu um atam a injaa; kpa kon u bo yô, ngu um di atam a bo je.’—MAT. 7:17.

1, 2. Mbadondon Kristu mba mimi mba kposo a Mbakristu mbaaiev, hemban je yô sha shighe u mkur ne nena?

YESU yange kaa ér a fa mkposo u mba ve senge ér mba dondon un la man mbadondon un mba mimi mbara sha atam a ve, ka atesen man aeren a ve je la. (Mat. 7:15-17, 20) Mimi je, kwagh u or henen sha mi ken ishima i nan la ngu a bende a aeren a nan kpee je. (Mat. 15:18, 19) Ior mba i koson ve sha mbampase mba sha aie la mba um “atam a bo,” kpa mba i tesen ve akaa a mimi a ken jijingi yô, mba um “atam a injaa.”

² Mkposo u atam a kon u dedoo man kon u bo la due tseer tseer sha shighe u mkur ne. (Ôr Daniel 12:3, 10.) Mbakristu mbaaiev mba a mhen u kpeegh sha kwagh Aôndo shi mba hembe civir un sha imanger, kpa mba ve zough a mkav u ken jijingi yô, mba civir Aôndo “ken jijingi kua ken mimi kpaa.” (Yoh. 4:24; 2 Tim. 3:1-5) Ka ve nôngon u tesen aeren a dedoo a Kristu la sha afatyô ve cii. Kpa gema se asange asange di ye? U nguren nengen sha akav a ataan a i fe Mbakristu mba mimi a mi la yô, pine iyol you wer: ‘Ieren yam man Kwagh u m tesen mbagenev la zua sha Mkaanem ma Aôndo wang kpa? Ieren yam man kwagh u m tesen la na mimi sar mba ve keren un la kpa?’

Eren Kwagh u Mkaanem ma Aôndo ma Kaa La

 3. Kanyi Aôndo a soo, man kwagh ne wa ieren i Mbakristu mba mimi sha kwagh u nyi kere?

³ “Ka hanma or u nana kaa a Mo er, Tere! Tere! man nana nyôr sha tartor u Sha ga, saa u nan eren ishima i Terem u A lu Sha yô.” (Mat. 7:21) Ka u kaan a kaa ér m ngu Orkristu la Aôndo a soo ga, kpa ka u eren kwagh u i gbe u Orkristu nana eren la. Mbadondon Kristu mba mimi yô, ka kwagh u i gbe u Orkristu nana eren la tseegh ve eren ken uma ve ye, man kwagh ne wa ieren ve sha kwagh u inyar man tom u uke man iemberyolough man aeren a ityôô man uiniongo mba taregh man ivaa kua akaa agen a ve eren vea uumace mbagenev imôngo la cii ker. Nahan kpa, Mbakristu mbaaiev yô, mba a mhen u taregh shi mba eren akaa a tar u eren, aa a hembe hendan a Aôndo ken ayange a masejime ne la.—Ps. 92:7.

4, 5. Se er kwagh u mkaanem ma Yehova ma i nger ken Malaki 3:18 mara ma kaa la ken uma wase nena?

⁴ Profeti Malaki yange nger kwagh sha kwagh u ayange a masejime ne ér: “Né gema né kav mkposo u orperapera a iferor, man u or u civir Aôndo a or u civir Un ga la.” (Mal. 3:18) Er u lu gbidyen kwar sha mkaanem man la, pine iyol you wer: ‘Mlu wam ngu kwaghmôm a u ior i tar nee, shin m ngu kposo? Ka m shi nôngon sha afatyô wam cii mer me lu er mba ken tar mba m ze makeranta a ve imôngo shin se eren tom imôngo la nahanaa, shin m kor atindiakaa a Bibilo sha gbashima, shi ka m pase mbagenev a je kpaa shighe u ian i dugh yôô?’ (Ôr 1 Peteru 3:16.) Jighilii yô, Se soo u tesen ser se hemba perapera ga, kpa doo u se lu kposo a mba Yehova a doo ve ishima ga shi ve civir un kpaa ga la.

⁵ Aluer u nenger wer doo u ú sôr inja you yô, er nan ú er msen sha kwagh shon shi u ker gbenda u taver ken jijingi sha msen u eren man u zan mbamkombo man u henen Bibilo hanma shighe ga? Er u lu hemban dondon mkaanem ma Aôndo ken uma wou la ú lu hemban umen “atam a injaa” cii, kua “atam a ityumbujôôgh i pasen iti [i Aôndo] ken igbar” la.—Heb. 13:15.

Yôô Angwe u Tartor u Aôndo

6, 7. Ka mkposo u nyi a lu hen atô u Mbakristu mba mimi man Mbakristu mbaaiev sha kwagh u loho u Tartor laa?

⁶ Yesu kaa ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.” (Luka 4:43) Er nan ve Yesu tsua Tartor u Aôndo lu itinekwagh na i pasen kwagha? Yange fa er un, u un lu Tor u Tartor shon vea anmgbianev nav mba una va nder ve ken jijingi la vea va tim akaa a á lu zayol u uumace jim jim la yô, ka isholibo man Diabolo je la. (Rom. 5:12; Mp. 20:10) Ka nahan ve yange wa mbadondon un tindi ér ve pase kwagh u Tartor la zan zan mkur u tar ne ye. (Mat. 24:14) Ior mba ve senge ér ve mba mbadondon Kristu la mba eren tom ne ga, shi vea fatyô u eren u kpaa ga. Sha ci u nyi? Sha ci u atôakyaa a atar ne: Hiihii yô, vea fatyô u pasen kwagh u ve kav ga la ga. U sha uhar yô, ve mbagenev kpishi mba hiden a ayol a ve ijime ga shi mba a ishimataver i tagher a ityuhwanev man ahendan a alaghga aa due shighe u ve lu pasen mbawanndor a ve loho u Tartor la ga. (Mat. 24:9; 1 Pet. 2:23) U sha utar yô, Mbakristu mbaaiev mba a jijingi u Aôndo ga.—Yoh. 14:16, 17.

⁷ Kpa mbadondon Kristu mba mimi yô, ve kav kwagh u Tartor u Aôndo u lu la kua kwagh u ua va er la kpaa. Heela tseegh ga, ve tsua u eren akaa a Tartor la hiihii ken uuma vev shi pasen kwagh u ú sha tar cii, sha iwasen i jijingi u Yehova. (Sek. 4:6) Ú ngu eren tom u pasen kwagh ne hanma shighe kpa? Ú ngu nôngo sha gbenda u alaghga u seer shighe ken tom wou u pasen kwagh la shin u fa igbenda i pasen kwagh sha er u seer fan u yôôn kwagh u Tartor kpa? Mbagenev nôngo ér vea seer fan u yaren tom a Bibilo sha er vea hemba pasen kwagh kôron inya yô. Apostoli Paulu, u yange ôron kwagh a ior sha akaa a ken Ruamabera la nger ér: “Mkaanem ma Aôndo ma uma je, ma tem gbilin ga.”—Heb. 4:12; Aer. 17:2, 3.

8, 9. (a) Ka uvande-eren mba nyi ve tese er i lu a inja u yaren tom a Bibilo ken tom wase u pasen kwagh laa? (b) Se er nan ve se hemba fan u yaren tom a Mkaanem ma Aôndoo?

⁸ Shighe u anmgbian ugen lu pasen kwagh sha uya uya yô, a za pase orya ugen u zaan adua u Fada yô kwagh, a ôr un Daniel 2:44 shi a pase un er Tartor u Aôndo ua va a bem man mkor u mimi yô. Or la gema kaa a na ér: “M wuese kpishi er u bugh Bibilo u tesem akaa a Ruamabera a er, u kera ôrom sha zwa tseegh ga yô.” Zum u anmgbian ugen ôr Kwase ugen u zan adua ken Greek Orthodox (iyouadua i ityô i Grika) la ivur Ruamabera yô, kwase ne pine mbampin kpishi mba tesen ér sar un u fan mimi. Kwa ne kpa, anmgbian la vea kwase na yange ve na kwase la mbamlumun ken Bibilo. Kwase la maa va kende kaa a ve ér: “Ne fa er i hii ve ashen m lumun u lamen a ven kpa? Ne va hen hunda wam a Bibilo, shi ne bugh i̱ ne ôr.”

⁹ Sha kpôô yô, ityakerada yase ngi a inja, shi doo u nan i ken won. Nahan kpa, ka Bibilo se hembe yaren tom a mi ye. Wea yaren tom a Bibilo hanma shighe ken kwaghpasen wou ga yô, er nan u tsough u eren nahan ga? Alaghga u tsua avur kpuaa a á pase kwagh u Tartor u Aôndo u lu, man er Tartor shon ua sôr mbamzeyol mba ve bende a ior hen ijiir you la. Nahan wa iyol sha avur shon keghen a kegh u ôron ior shighe u ú lu pasen kwagh sha uya uya yô.

Lumun Iti i Aôndo Vangertiôr

10, 11. Sha gbaa u yaren tom a iti i Aôndo la, ka mkposo u nyi a lu hen atô u Yesu man mba ve senge ér ve mba mbadondon un laa?

¹⁰ “Ka . . . ne ne lu mbashiada Av ye, kape TER A kaa ne; ka Mo M lu Aôndo ye.” (Yes. 43:12) Orshiada u Yehova u hemban cii, Yesu Kristu yange nenge ér u lumun iti i Aôndo shi pasen i la ka kwagh u civirigh. (Ôr Ekesodu 3:15; Yohane 17:6; Mbaheberu 2:12.) Sha mimi yô, i yila Yesu ér “Orshiada u jighjigh” sha ci u yange pase iti i Ter na.—Mpa. 1:5; Mat. 6:9.

¹¹ Kpa ior kpishi mba ve senge ér ve mba mbatomov mba Aôndo kua Wan na la cii ve tese ieren i kunya kpishi sha kwagh u iti i Aôndo, je ve dugh i ken mbamgem mba Bibilo vev kera kpaa. U suen ieren ne yô, semberee ne, i tindi a kwaghwan hen ubishôp mba kwaghaôndo u Fada cii ér “iti i Aôndo i ka i nger ér YHWH, i yer ér tetragrammaton la i de yaren tom a i ga, shin u teren i” tsô kpa i de teren shighe u i lu eren adua ga.a Mhen ne kôr kunya kpen kpen!

12. Mbacivir Aôndo yange ve hemba sôsom a Yehova ken inyom i 1931 la nena?

¹² Mbakristu mba mimi mba yaren tom a iti i Aôndo sha u dondon ikyav i Kristu kua “ikpela i mbashiada” mba ve vande yaren tom a iti ne cii man Yesu la. (Heb. 12:1) Jighilii yô, ken inyom i 1931 la, mbacivir Aôndo hemba sôsom a Yehova sha u lumun iti i Mbashiada mba Yehova la. (Ôr Yesaia 43:10-12.) Nahan, lu sha gbenda u injaa tsung je mbadondon Kristu mba mimi hingir “ior mba i yer ve sha iti i [Aôndo]” ye.—Aer. 15:14, 17.

13. Se er nan ve se kuma u yilan se sha iti i Aôndo a ne se laa?

¹³ Se er nan ve se er kwagh u i gbe u mba i yer ve sha iti i Aôndo vea eren laa? Kwagh môm u se er yô, gba u se eren shiada sha kwagh u Aôndo sha mimi. Apostoli Paulu nger ér: “Hanma or u nan yer sha iti i Ter yô, nana war. Nahan á er nan man ior vea yila sha iti i Un u ve ne Un jighjigh ga laa? Man shi á er nan man vea na Un jighjigh, Un u ve lu a ungwa kwagh Na ga laa? Man shi á er nan man vea ungwa aluer or u ôron kwaghaôndo nana lu ga yôô? Man shi á er nan man vea ôr kwaghaôndo aluer a tindi ve ga yôô?” (Rom. 10:13-15) Shi gba u se pon atesen a kwaghaôndo u aiegh aa a vihin iti i Orgban se la sha kwaghfan, er ityesen i sha kwagh u igyamusu, i i er kwagh u tesen ér Aôndo u dooshima la ngu a aeren a bo a Diabolo la.—Yer. 7:31; 1 Yoh. 4:8; nenge Marku 9:17-27.

14. Yange i pase ior mbagenev iti i Aôndo nahan ve er nena?

¹⁴ Ka u kwagh u icivirigh er i yer u sha iti i Teru u sha la kpa? U ngu wasen mbagenev sha u ve kpa ve fa icighan iti la kpa? Kwase ugen ken gar u Paris, ken tar u France yange ungwa ér Mbashiada mba Yehova fa iti i Aôndo, nahan va zough a Kwaseshiada ugen yô, a kaa a na ér a̱ tese un ape una zua a iti la ken Bibilo na yô. Kwase la er Pasalmi 83:18 yô, mimi la bende a na kpishi, maa hii u henen Bibilo, hegen ngu eren tom u pasen kwagh ken tar ugen. Shagbakwase ugen ken tar u Australia di yange zaan adua u Fada, kpa er va nenge a iti i Aôndo ken Bibilo sha kwa u hiihii yô, doo un je vaa. Kwase ne ngu pania u keke anyom imôngo hegen. Sember sember ne kpa, zum u Mbashiada mba Yehova mba ken tar u Jamaika tese kwase ugen ken tar la iti i Aôndo ken Bibilo na yô, un kpa doo un je mliam haa un ashe. Nahan yô, i lu u kwagh u civirigh er i yer u sha iti i Aôndo yô, dondo Yesu sha u pasen iti i injaa la hen ior cii.

“Tar u̱ De . . . Doon Ne Ishima Ga”

15, 16. Mbakristu mba mimi mba nengen tar nena, man ka mbampin mba nyi i doo u se pine ayol a ase?

¹⁵ “Tar u̱ de kera doon ne ishima ga shin akaa a lu shin tar tsô kpaa ga. Aluer anti or tar ua doo nan yô, dooshima u Ter ngu ken a nan ga.” (1 Yoh. 2:15) Tar kua jijingi u taregh u a lu a aeren a iyolough la mba hendan kwagh a Yehova kua icighan jijingi na. Nahan mbadondon Kristu mba mimi mba kera palegh u yan ikyar a tar ne tseegh ga, tar jimin cii kpa doo ve ishima ga. Gadia ve fa er “u yan ikyar a tar i lu u lun ihyom a Aôndo” yô, er orhenen Yakobu nger nahan.—Yak. 4:4.

¹⁶ Alaghga a taver se u dondon mkaanem ma Yakobu mara ken tar u u ngee a igbenda i meen ior yum ne. (2 Tim. 4:10) Sha ityôkyaa ne yô, Yesu er msen sha ci u mbadondon un ér: “M ngu eren msen Mer: Kura ve shin tar ne kera ga, kpa M ngu sônon Mer kura ve sha ifer. Ve mba ior i tar ne ga, er Mo kpaa M lu or u tar ne ga nahan.” (Yoh. 17:15, 16) Pine ase iyol you wer: ‘M ngu nôngon sha afatyô wam cii mer me lu or u tar ne ga kpa? Ior mbagenev fa mtil wam sha kwagh u uiniongo mba eren man aeren a ityôô aa a har sha Ruamabera ga, man aeren a alaghga a dugh hen mbafanaôndoga jighilii ga, kpa a gem a tese jijingi u taregh wang la kpa?’—2 Kor. 6:17; 1 Pet. 4:3, 4.

17. Kanyi ia fatyô u mgbeghan mbaasemaamimi u tan ikyaa a Yehovaa?

¹⁷ Jighilii yô, mtil wase u a har sha Bibilo la una na tar ua soo se ga, kpa una gema a mgbegha mbaasemaamimi u fan Aôndo. Sha kpôô yô, aluer ambaaior la nenge er jighjigh u nan wase a we amishe ken Ruamabera dông shi aeren a ase jimin cii a har sha Ruamabera yô, alaghga vea gema a kaa a Mbakristu mba i shigh ve mkurem mbara ér: “Sé za a ven imôngo, gadia se ungwa ser, Aôndo ngu a ven.”—Sek. 8:23.

Tese Dooshima u Orkristu u Mimi

18. U Yehova man mbawanndor a vese doon se ishima la wa nyi man nyi kere?

¹⁸ Yesu kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii” shi “or u nan we ndor a we yô, nana̱ doo u ishima er we iyol you nahan.” (Mateu 22:37, 39) Dooshima (u i yer ken zwa Grika ér a·gaʹpe) la ka dooshima u wang, u i gbe u a tesen un sha tindi man sha mimi man sha icivir kpaa yô, kpa dooshima ne wa u soon or a ishima you cii ker. Dooshima ne ka mlu u sar sar man u doon a or ken ishima tsung. (1 Pet. 1:22) Ieren ne ngi kposo a ieren i tangen iyol la, gadia ka dooshima u i tesen un sha mkaan man aeren aa a lu a iyoltangen ker ga yô.—Ôr 1 Mbakorinte 13:4-7.

19, 20. Ôr uvande-eren mba ve tese tahav mbu dooshima u Mbakristu yô.

¹⁹ Er i lu jijingi u Aôndo ka a na or lu a dooshima yô, dooshima ka a wase Mbakristu u eren kwagh u mbagenev vea fatyô u eren gayô, er u palegh kwagh u mbavia a mbavia man aeren a ityôô kua pati nahan. (Ôr Yohane 13:34, 35; Gal. 5:22) Mba ve lu er ka iyôngo la ka vea nenge a imba dooshima ne yô, i sar ve tsung. Ikyav i tesen yô, zum u gumor u Mbayuda ugen ken tar u Iserael za mkombo u Mbakristu sha kwa na u hiihii yô, kpiligh un iyol u nengen er anmgbianev mba ken tsombor u Mbayuda man mba ken tsombor u Mbaarabia lu civir Yehova imôngo yô. Nengen nahan yô, a hii u zan mbamkombo nduuluu shi hii u henen Bibilo kpaa. U tesen anmgbianev ou imba dooshima u soon or a ishima you cii la kpa? U nôngon wer u sugh mbahenen Bibilo mbahev ken Iyou i Tartor sar sar, a u den wer kwagh u tar ve man mlu u kwavyolough ve man aan a ve lu sha mi la a yange u ga kpa?

²⁰ Er se lu Mbakristu mba mimi yô, ka se nôngon sha afatyô wase cii ser se tese hanma or dooshima. Gumkwase u civir Yehova ugen ken tar u El Salvador yange lu henen Bibilo vea ngôkwase u lun anyom 87, u zaan adua u Fada tseegh yô. Nahan, iyange igen vihi kwase ne iyol kpishi, i za kôr un gambe ken iyouci. Er hungwa gambe hide ken ya na yô, anmgbianev asev mba kasev lu zan hen ya na za nan un kwaghyan. Ve er nahan nôngo u kuman uwer jimin. Or môm ken côôci i kwase ne za pe lu ga. Nahan nyi i due kere? Kwase ne yange kura ieev mbi lu a mi la haa kera, shi due ken côôci na la sha, hide shi hii u henen Bibilo. Mimi je, dooshima u Mbakristu ngu a tahav! Ngu a kôr or ken ishima i hemba kwaghôron u sha zwa.

21. Se er nena ve mlu wase u ken hemen una doo?

²¹ Ica ia kera gba ga tsô Yesu una kaa a mba ve senge ér mba civir un la cii ér: “Mayange je M ngu a fa ne ga, yem nen heen kera, ne mbavendanatindi mban.” (Mat. 7:23) Nahan yô, de se ume nen ityamegh ki kia na Ter man Wan icivir yô. Yesu kaa ér: “Hanma or u nan ongo akaaôron Am ne man nan eren sha a yô, á kar nan sha orfankwagh u nan maa iyou i nan sha vande” la. (Mat. 7:24) Sha mimi yô, aluer se mba tesen ser se mba mbadondon Kristu mba mimi yô, a doo Aôndo a vese, nahan mlu wase u ken hemen la una doo, vough er i maa un sha vande nahan!

[Ngeren u shin kpe]

Ú Umbur Kpa?

• Mbadondon Kristu mba mimi mba kposo a Mbakristu mbaaiev nena?

• Ter “atam” agen a i fe Mbakristu mba mimi a mi la.

• Ka akaa a nyi nahan u tsough u eren sha er u ume ityamegh ki Mbakristuu?

[Foto u sha peeji 13 la]

Ú yaren tom a Bibilo ken kwaghpasen wou hanma shighe kpa?

[Foto u sha peeji 15 la]

Mbagenev fa mtil wou sha kwagh u uiniongo mba taregh kpa?