Mpin U Mbaôron Takerada Ne . . .

Aôndo ngu a mhii-i?

▪ Bibilo kaa a vese ér Aôndo ngu a mhii ga. Aôndo ngu tsô ngu. Er kwagh u mtsôr u Aôndo ne a taver u kaven nahan kpa, se fatyô u gban huren kwagh ne kera tsô sha ci u a taver se u kaven yum ga.

Ka shami u henen ser se kôrcio u kaven igbenda i Aôndo cica ciili? Apostoli Paulu yange yôô ér: “Kpash! Mze u ikpelaakaa man mfe man kwaghfan u Aôndo ve za kweng ne! Ajir a ôron a Na gande u timen sha mi, igbenda Na kpaa i gande u tôvon tsôô!” (Mbaromanu 11:33) Ishima yase ia fatyô u kaven mze u kwaghfan man mfe u Aôndo cica cii ga, vough er anikyundan nana fatyô u kaven akaa a mbamaren mba nan ve eren cica cii ga nahan. Shin er mkaanem ma icighan jijingi mgbegha Paulu nger ne lu sha kwagh u kwaghfan u Aôndo man mhôônom nam ma ma hembe cii la nahan kpa, mkaanem nam man tese ér akaa agen nga sha kwagh u Yehova Aôndo man igbenda i a eren kwagh la aa a gande se u kaven yô. Kwagh u Aôndo a lu a mhii ga ne kpaa, alaghga tsô ka môm ken akaa shon. Nahan kpa, se fatyô u lumun a kwagh u Bibilo i tese se sha kwagh u Aôndo la a ishima yase cii. Yesu Kristu yange ôr kwagh u icighanruamabera kaa ér: “Ka kwaghôron Wou je a lu mimi ye.”—Yohane 17:17.

Mose ngise er msen hen Yehova kaa ér: “Hii sha uicôronmbaashighev je zan zan gbem sha won, U ngu Aôndo.” (Pasalmi 90:2) Heen ne Mose ôr kwagh u mlu u tsôron u Aôndo la yem a mi sha avegher ahar. Vegher môm yô, ka mtsôr na u ken hemen la. Yehova ka “Un u A lu uma gbem sha won la.” (Mpase 4:10) Nahan yô, mlu u tsôron u Aôndo la yem ken hemen zan zan gbem sha won. Vegher ugen la di ka vegher u ken ijime. Inja na yô, i gba Aôndo ga, shi ngu a mhii kpaa ga. Nahan yô, mlu u tsôron u Aôndo la yem ken ijime zan zan ikighir ngi ga.

Se kpishi, kwagh u i nengen a mi sha ashe kpôghôô ga ngu a taver se u kaven kpen kpen. Kpa, ashighe agen kwagh ka una taver kpa se lumun a mi, inja er u ôron iyenge yemen ken hemen man u ôron hiden ken ijime nahan. A fatyô u ôron iyenge yemen ken hemen shi hiden ajime ajime zan zan a ikighir shio. Er ikyav ne i̱ tese nahan, u hen wer kwagh u anyom a uma u Orgbanakaa la kpa kape i lu la ga he?

Sha nahan yô, ka Aôndo tseegh i yer un ér “Tor u tsôron” ye. (1 Timoteu 1:17) Hen ase sha kwagh ne: Yesu Kristu man mbatyomov mba ve lu sha udubu udubu la kua uumace mba ve lu shin tar ne cii mba a mhii sha ci u i gba ve. (Mbakolose 1:15, 16) Aôndo yô, kwagh na ngu nahan ga. Aluer ma or nan ngu sendegh ér Aôndo kpa i gba un a gba yô, nan ngu van a va a anyiman a ibume man mhen u gbilinigh sha kwagh u ka an nan gbe Orgbanakaa la tsô. Een, ka Yehova tseegh á vande lun, “hii shighe u gbem sha won je zan zan gbem sha won” ye. (Pasalmi 90:2, Bibilo i The New American Bible la) Inja na yô, Yehova lu je “er kwagh lu a vande lun ga” la.—Yuda 25.

Nahan kpa, fa wer kwagh u mlu u Aôndo u a lu a mhii ga ne gban kan di mhen u lun se a iwasen shio ga. Aluer se ver ishima sha msen u Mose er la yô, se nenge ser msen na ne tese ér, er Aôndo a lu uma gbem sha won yô, ityendezwa i dedoo ia er ér una na se uma u tsôron la ia kure kpee. Er hegen ne uma wase a ngôôr ga nahan kpa, i kaa a vese ér Aôndo ka “ijiir yase i teman, sha ikyov ikyov.” Yehova ka Ter wase u dooshima, u a vande lun uma yô, hegen kpa ngu, shi una za hemen u lun her hanma shighe cii sha ci u ior nav. Yô, mimi u injaa ne a̱ sur u ishima!—Pasalmi 90:1.