Pase Loho u Dedoo u Mlumun u sha Mhôôn La

1, 2. Apostoli Paulu yange tese ér un ngu a iwuese sha mlumun u sha mhôôn u Aôndo la nena?

APOSTOLI Paulu yange ôr sha mimi nahan ér: “Mlumun Na u sha mhôôn u hen a mo la lu gbilin ga.” (Ôr 1 Mbakorinte 15:9, 10.) Paulu yange fa wang je ér un yina u Aôndo una zungwe un mhôônom sha ci u ngise un lu or u tôvon Mbakristu a ican.

² Shighe u zurum u Paulu una kpe la, a nger Timoteu u lu ikyartom na la washika kaa ér: “M ngu wuese Un u A nem agee la, ka Kristu Yesu Ter wase, gadia A nenge er m ngu jighjigh, A verem sha tom.” (1 Tim. 1:12-14) Lu nyi tomo? Paulu yange pase mbatamen mba ken Efese kwagh u tom la, a kaa ér: ‘M wa uma wam ikyo ga, ngum er ka ma kwagh u ikyoogh ga, sha u me kure zende wam man tom u m ngohol hen Ter la kpaa, ka u me pase Loho u Dedoo u sha mhôônom ma Aôndo la.’—Aer. 20:24.

 3. Lu tom u injaa u nyi i na Paulu? (Nenge foto u a lu sha mhii u ngeren ne la.)

³ Ka “loho u dedoo” u nyi Paulu pase, u u wase ior u fan kwagh u mlumun u sha mhôôn u Yehova laa? Yange kaa a Mbakristu mba ken Efese la ér: “Ne ungwa kwagh u tom u i wem sha ikyev sha ci wen la sha mlumun u sha mhôôn u Aôndo” la. (Ef. 3:1, 2) Yange i na Paulu tom u pasen mba ve lu Mbayuda ga la loho u dedoo sha er ve kpa vea fatyô u lun ken ior mba vea za hemen vea Kristu ken Tartor na u Mesiya la yô. (Ôr Mbaefese 3:5-8.) Paulu yange er tom na ne sha gbashima shi tese ér mlumun u sha mhôôn u Aôndo hen a na la lu “gbilin ga,” nahan a ver Mbakristu mba sha ayange a ase ne ikyav i doon tsung i vea dondo yô.

4, 5. Se fatyô u kaan ser “Loho u Dedoo u tartor” la ngu kwaghmôm a loho u dedoo u “mlumun u sha mhôôn u Aôndo” la sha ci u nyi?

⁴ Ken ayange a masejime ne, i na ior mba Yehova tom u pasen “Loho u Dedoo u tartor ne . . . sha u u̱ lu mpase hen akuraior cii” yô. (Mat. 24:14) Shi loho u se lu pasen la ka “Loho u Dedoo u sha mhôônom ma Aôndo la” sha ci u averen a se lu veren ishima u va zuan a mi sha hemen u Tartor la cii, ka mlumun u sha mhôôn u Yehova a tese se ken Kristu la, a na ve kwagh a lu nahan ye. (Ef. 1:3) Se asange asange se mba tesen iwuese sha mlumun u sha mhôôn u Yehova la, sha u eren tom u pasen kwagh la sha gbashima, er Paulu nahan kpa?—Ôr Mbaromanu 1:14-16.

⁵ Ken ngeren u karen la, se hen er se lu mbaasorabo nahan kpa, se zua a iwasen sha mlumun u sha mhôôn u Yehova la sha igbenda kpishi yô. Er se zough a iwasen kpishi yô, se mba a tom u tesen mbagenev er ve kpa vea fatyô u zuan a iwasen la yô. Shi se fatyô u tesen ve er ve doo Yehova ishima yô. Ka igbenda i nyi nahan se fatyô u wasen mbagenev, vea lu a iwuese sha mlumun u sha mhôôn u Aôndo laa?

6, 7. Shighe u se lu pasen ior kwagh u naagh kura yô, se mba pasen loho u dedoo u mlumun u sha mhôôn u Aôndo la nena?

⁶ Ken tar u u ne hanma or ian i eren ishima i nan ne, ior kera nenge isholibo i eren ér ka kwaghbo ga, nahan ve kpishi ve fa er i gbe u a yima ve ga. Kpa ior kpishi gema nenge ér, er tar u ne ior ian i eren ishima ve nahan kpa, kwagh ne ngu nan ve a msaanyol u mimi ga. Ior kpishi fa kwagh u a lu isholibo ga, kua er ka i vihi mlu wase la kpaa. Shi kwagh u se er ve se kera lu ikpan i isholibo ga la kpa, ve fa ga. Saa ka vea va zua a Mbashiada mba Yehova ve ve fa akaa ne ye. Mbaasemaamimi ka vea va kav er i lu mdoo u se doo Yehova ishima tsung la, man mlumun u sha mhôôn na la yange mgbegha un ve tindi Wan na shin tar ne sha u a va paa se sha ikyev i isholibo man ku u isholibo i ve a mi la yô, i doo ve kpen kpen.—1 Yoh. 4:9, 10.

⁷ Paulu yange ôr kwagh u Wan u Yehova u ishima ishima la kaa ér: “Ken a Na [Yesu] yô, se mba a mpaa u sha awambe Na man shi mde u gbev mbu nôngon sha mlumun Na [Yehova] u sha mhôôn u ngeen yum la.” (Ef. 1:7) Naagh ku Kristu yange na sha u paan se la ka ikyav i vesen i i tese ér se doo Aôndo ishima shi mlumun u sha mhôôn na la ngee kpishi yô. Ka kwagh u saan kpishi er se fe ser, aluer se na naagh ku Yesu kura jighjigh yô, a de se asorabo a ase shi a wanger imoshima yase yô! (Heb. 9:14) Kwagh ne ka loho u dedoo u i doo u se pase mbagenev yô!

 8. Gba u a hime uumace mba ve lu mbaasorabo ne a Aôndo sha ci u nyi?

⁸ Se mba a tom u pasen uumace mbagenev ser vea fatyô u yan ikyar kôôsôô vea Orgban ve. Ior ka vea na naagh ku Yesu kura jighjigh ga yô, Aôndo a nenge ve ér mba mbaihyomov nav. Apostoli Yohane yange nger ér: “U nan ne Wan jighjigh yô, nan ngu a uma u tsôron; kpa u nan hembe Wan ato yô, nana nenge a uma ashe ga, kpa iyugh i Aôndo ngi sha a nan.” (Yoh. 3:36) Kwagh gema er doo yô, naagh ku Kristu kura na yô, se fatyô u himen a Aôndo. Paulu kaa ér: “Ne mba ngise ne lu paleghaa, ne lu mbaihyomov ken mhen wen sha aeren a bo la, ne kpaa A hime ne sha iyol Na i inyam la sha ku.”—Kol. 1:21, 22.

9, 10. (a) Ka tom u nyi Kristu yange na anmgbianev nava? (b) Mba ve lu “iyôngo igen” la mba wasen anmgbianev vev mba i shigh ve mkurem la nena?

⁹ Kristu na asande a anmgbianev nav mba ve shi shin tar her la tom u Paulu a yer ér, “tom u mhim” la. Paulu yange pase kwagh ne ken washika u nger Mbakristu mba sha ayange a mbaapostoli la, ér: “Akaa ne cii ka hen Aôndo A dugh ye, Un u A him se a iyol Na ken Kristu, shi A ne se tom u mhim la sha ikyev kpaa la. Inja na yô, Aôndo lu ken Kristu, lu himen tar a iyol Na, kera na ve ibo sha mbamper mba ve per tindi la ga, shi A na se loho u mhim la sha ikyev kpaa. Nahan yô, se mba mbaôronkwagh sha ci u Kristu za iyol er ka Aôndo A lu ôron kwagh a ven ken a vese yô. Se mba zamber a ven sha ci u Kristu ser, i̱ hime ne a Aôndo.”—2 Kor. 5:18-20.

¹⁰ Mba ve lu “iyôngo igen” la nenge tom u pasen kwagh u ve lu wasen anmgbianev vev mba i shigh ve mkurem la ér ka icivir je i ne ve ye. (Yoh. 10:16) Er mba ve lu “iyôngo igen” la kpa ve lu mbatomov mba Kristu a tindi ve yô, mba hemban eren tom u tesen ior mimi shi wasen ve u yan ikyar a Yehova kôôsôô la cii. Kwagh ne ka vegher u vesen ken tom u pasen ior loho u dedoo u mlumun u sha mhôôn u Aôndo la.

11, 12. Aluer ior fa ér vea fatyô u eren msen hen Yehova yô, kwagh la ka loho u dedoo sha ci u nyi?

¹¹ Ior kpishi ka ve er msen sha ci u ka vea er nahan yô, i kundu ve iyol, ka i lu sha ci u ve na jighjigh ér Aôndo ongo msen yum ga. Gba u ior vea fa er Yehova a “ongo msen” yô. Orpasalmi Davidi yange nger ér: “We, u U ongo msen, ka hen a We man uuma cii vea va ye. Aferakaa hembam agee, akaabo ase yô, ka We U ese a kera Ye.”—Ps. 65:2, 3.

¹² Yesu yange kaa a mbahenen nav ér: “Aluer ne sôn nyityô kwagh ken iti Yam yô, Me er i.” (Yoh. 14:14) Jighilii yô, ishember i “nyityô kwagh” la ngi tesen ér hanma kwagh u se sen Yehova shi a lu sha ishima na cii yô, una ungwa. Yohane na se ibumun ér: “Ka vangertiôr wase u se lu a mi sha ishigh Nagh ne: ka sea sôn nyityô kwagh u a lu sha ishima Na vough yô, A ungwa se.” (1 Yoh. 5:14) Ka sea tese mbagenev kwagh la yô, i doo kpen kpen, sha ci u msen ka di kwagh u nan or mpeveryol tseegh tsô ga, kpa ka gbenda u doon tsung u kporom ikyua a “ikyônough ki torough ki mhôôn” ki Yehova kira! (Heb. 4:16) Aluer se mba tesen ve gbenda u vough u eren msen, man Or u i doo u vea er msen hen a nan man akaa a i doo u vea sônon la yô, se wase ve vea kporom ikyua a Yehova shi vea zua a msurshima shighe u ve lu yan ican yô.—Ps. 4:1; 145:18.

13, 14. (a) Ka averen a doon tsung a nyi mba i shigh ve mkurem la vea va zua a mi ken hemene? (b) Mba i shigh ve mkurem la vea va er tom u doon tsung u nyi sha ci u uumace?

¹³ Shighe u botar ne una kar kera la kpa, Yehova una za hemen u tesen ior mlumun u sha mhôôn na la. Paulu yange ôr kwagh u ian i civirigh i i Aôndo a ne mba 144,000, mba i yer ve ér ve za hemen vea Kristu sha, ken Tartor na la ér: “Aôndo ngee a mhôônom ma zungwen, ka sha dooshima Na u vesen u se doo Un ishima la man A na se uma a Kristu imôngo je er se lu kpenegh ken gbev mbu nôngon la ye, ka sha mlumun u sha mhôôn i yima ne ye, man A nder se a Na imôngo, A ver se se tema a Na imôngo sha ajiir a Sha ken Kristu Yesu. Ka sha u ken ayange a a lu van ken hemen la Una pase mlumun Na u sha mhôôn u a ngee yum, a hemba sha won la, sha a vese ken Kristu Yesu.”—Ef. 2:4-7.

¹⁴ Taver kpishi u fan akaa a doon tsung a Yehova a ser a ver sha ci u Mbakristu mba i shigh ve mkurem, shighe u vea za tema sha mkônom vem ma torom, vea hemen vea Kristu sha la. (Luka 22:28-30; Fil. 3:20, 21; 1 Yoh. 3:2) Yehova una “pase mlumun Na u sha mhôôn u a ngee yum, a hemba sha won” la sha a ve. Vea hingir “Yerusalem u he,” inja na yô, ka kwasehe u Kristu je la. (Mpa. 3:12; 17:14; 21:2, 9, 10) Vea er tom u “been akuraior angev” la vea Yesu, shi vea shir uumace ikyav mbi isholibo man ku u tee ve la, shi vea wase uumace zan zan vea kar hingir vough.—Ôr Mpase 22:1, 2, 17.

15, 16. Yehova una va tese mba ve lu “iyôngo igen” la mlumun u sha mhôôn na la ken hemen nena?

¹⁵ Mbaefese 2:7 kaa ér Aôndo una va tese mlumun u sha mhôôn na la “ken ayange a a lu van ken hemen la.” Akperan nga ga, Yehova una pase “mlumun Na u sha mhôôn u a ngee yum, a hemba sha won” la, ken tar u he la. (Luka 18:29, 30) Gbenda u hemban cii u Yehova una tese mlumun u sha mhôôn na u a doo yum la yô, a lu mnder u una va nder uumace mba ve lu shin “Sheol” la. (Yobu 14:13-15; Yoh. 5:28, 29) Nomso man kasev mba jighjigh mba ve kpe sha ayange tsuaa, cii man Kristu va na naagh la, kua mba ve lu “iyôngo igen,” mba ve til sha mimi zan zan ku ve ken ayange a masejime la cii, a va nder ve, vea za hemen u civir Yehova.

¹⁶ Uumace mbagenev umiliôn imôngo, mba yange ve kpe a u fan kwagh u Aôndo shio la kpa, a va nder ve. A na ve ian i lun sha ikyev i hemen u Yehova la. Yohane nger ér: “M nenge mbakpenev tile sha ishigh ki ikyônough ki torough kira, mbavesen kua mbakiriki cii. Nahan i bugh uruamabera. I shi i bugh ruamabera ugen kpaa, ka ruamabera u uma je la. Tsô i ôr mbakpenev ijir sha akaa a i nger ken uruamabera mbara, sha aeren a ve. Zegemnger na mbakpenev mba ve lu shin a na la. Ku man Hade kpaa na mbakpenev mba ve lu shin ve la. I ôr hanma or ijir sha aeren a nan ser ser.” (Mpa. 20:12, 13) Nahan kpa, gba u mba a va nder ve la vea hen u dondon atindi a Aôndo a a lu ken Bibilo la. Heela tseegh ga, a gba u vea dondo akaawan a injaa a a lu ken “uruamabera,” mba vea tese kwagh u Yehova a soo ér ior ve eren sha u vea kuma u lun ken tar u he la yô. Shighe u a pase akaa a a lu ken uruamabera mban ne la, kwagh ne kpa a lu gbenda ugen u Yehova una tese mlumun u sha mhôôn na la yô.

17. Ka nyi i doo u se lu a mi ken ishima shighe u se lu eren tom wase u pasen kwagh laa?

¹⁷ Er mkurtar a zurum ne, hemba kan hange hange u se pase loho u dedoo u Tartor la cii! (Mar. 13:10) Akperan nga ga, loho u dedoo la ngu pasen mlumun u sha mhôôn u Yehova la. Nahan gba u se lu a kwagh ne ken ishima shighe u se lu eren tom wase u pasen kwagh la. Shighe u se lu pasen kwagh yô, awashima wase i lu u van Yehova a icivir. Se fatyô u eren kwagh ne sha u pasen ior ser, averen a Yehova a tende zwa u nan se ken tar u he la cii, ka gbenda u tesen mlumun u sha mhôôn na u a doo yum la.

18, 19. Se fatyô u wuese mlumun u sha mhôôn u Yehova la nena?

¹⁸ Shighe u se lu pasen mbagenev kwagh yô, se fatyô u ôron ve ser, zum u Yesu una lu hemen ken Tartor na la, uumace vea zua a mtsera kpishi sha naagh ku ipaan kura shi a za a ve kure kure vea kar aren sha mlu u vough la. Bibilo kaa ér: “Akaa a i gbe a la kpaa á va pase a sha ikyev i mlu u hôôn la á tuhwa, á za a mi ken mlu u engem u lun a ikyangenev ga u ônov mba Aôndo la.” (Rom. 8:21) Ka mlumun u sha mhôôn u Yehova u doon tsung la, a na ve i gbe u kwagh a va lu nahan ye.

¹⁹ Se mba a ian i civirigh i pasen mba ve soo u ungwan ityendezwa i doon tsung i i er ken Mpase 21:4, 5 la cii, ser: “[Aôndo] Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” Maa Yehova, u a tem sha ikyônough ki torough la, kaa ér: “Nenge M ngu geman akaa cii hingir a he.” Shi a kaa ér: “Nger, gadia akaaôron ne ka a jighjigh man ka a mimi kpaa.” Ka sea pasen mbagenev kwagh sha gbashima yô, se mba wuese mlumun u sha mhôôn u Yehova la tsung!