Zua a Mbamtsera sha u Nan Ior Kwagh

WANKWASE ugen iti na ér Alexandra, yange tema shin bôôsu lu keghen ér dasenda ve na ian sha boda una nyôr ken tar ugen, shin veghertar u South America la. Ica i gbe ga yô, a ungwa i kaa ér, “bôôsu a yem, kpa Orchina ne yô ngu zan mape ga!” Alexandra hungwan shin inya ér una fa kwagh u a lu zan hemen la yô, a nenge Orchina ugen lu shalegh a zwa Ishpania (Spanish), pasen ordasenda ugen zayol na. Er Alexandra vanden zan mbamkombo vea tiônnongo u Mbashiada mba Yehova u ken zwa China yô, a tsua u wasen or la sha u pasen dasenda kwagh u or shon lu fantyô u ôron ve ga la.

Orchina la kaa ér un ngu iin a ii zan ken tar la ga, kpa yange mbaiv num un gbenda, ve ngohol un ityakerada kua inyaregh. Sha hiihii la, ordasenda la lumun a kwagh u or ne lu ôron la ga, shi gema lu nengen ér Alexandra ngu yemen a or shon u za teen. Ken masejime yô, a va lumun a kwaghôron u or la, kpa gema gba u or shon una kimbi inyaregh ki paan iyol na, sha ci u ityakerada i zan zende i yange lu a mi ga la. Er or ne lu a inyaregh ga yô, Alexandra na un udola 20. Or ne sugh Alexandra je kpa kuma un ga, a tôndo zwa ér una hide a kimbi Alexandra inyaregh ki hemban udola 20. Alexandra pase un ér un ngu keren injar sha iwasen la ga; yange saan un iyol u wasen or la kpishi sha ci u a nenge ér doo u una er nahan. Yange na or la ityakerada igen i pasen Bibilo, shi taver un ishima ér a za hen Bibilo vea Mbashiada mba Yehova.

Ka sea ungwa ser i tese ior mba se fe ve ga erdoo wuee nahan, i doo se je i zua ga, man ior mba ken ukwaghaôndo cii, kua mba ve lu ken kwaghaôndo ga la kpaa, mba eren ambaakaa la a ior. Yange a lu we nahan, ma u kegh iyol u nan iwasen a iyoltangen shio nahan kpa? Mpin ne ngu a inja, sha ci u Yesu yange kaa ér: “U nan a na kwagh hembe saan iyol a u ngohol a ngohol kwagh.” (Aerenakaa 20:35) Shi mbatwerev kpa tôv sha kwagh u nan kwagh la, nahan ve kaa ér aluer u ngu nan ior kwagh yô, a saan we iyol. De se nenge igbenda i kwagh a fatyô u lun nahan yô.

Akaa a a vande eren ior yô, tese ér ieren i nan kwagh la i wa zua vea msaanyol. Apostoli Paulu yange nger ér, “Ka or u nan ne kwagh sar sar la je nan doo Aôndo ishima ye.” (2 Mbakorinte 8:4; 9:7) Paulu lu ôron kwagh u Mbakristu mba yange ve na akaa mgbeghaa sha u i za wase mbananjighjigh mbagenev a mi, ve de kera ye ican kpishi ga la. Paulu kaa ér ve na kwagh sha ci u saan ve iyol ga. Kpa a kaa ér saan ve iyol sha ci u ve na kwagh.

Sha kpôô yô, kwaghtôvon ugen tese ér ka wea naan or kwagh yô, “igbela i ken mhirinim i ka i na or nan lu sar sar shi nan soo u lun vea mbagenev shi nan na or jighjigh la, i nalegh, nahan nan lu zwa ahan ahan.” Shi kwaghtôvon ugen kaa ér “or ka nana na ior inyaregh yô, i hemba saan nan iyol a u ma nan vihi ki sha kwagh u nan la.”

I lu nahan u hen sha mlu wou, maa u kaa wer u ngu a kwagh kuma u nan ior ga vee? Jighilii yô, hanma or nana fatyô u zuan a msaanyol, aluer nan ngu “or u nan ne kwagh sar sar” yô. Ka wea naan or inyaregh a awashima u vough yô, u kera keren wer saa i lu zege inyar ga. Kwase ugen ken nongo u Mbashiada mba Yehova yange tindi a loho kua iyua hen mbagberen magazin ne, a nger ken loho la ér: “Ken anyom a karen ne cii, m zuan a kwagh kpishi u me na iyua ken Iyou i Tartor ga.” Nahan kpa, kwase ne shi kaa ér: “Yehova Aôndo kimbim injar hemba kwagh u m fetyô u nan un la. . . . M ngu sughun ne kpishi er ne ne m fetyô u eren iyua ne yô. Kwagh ne na ishima gbam shimi.”

Jighilii yô, iyua i nan saa sha inyar tseegh ga. Igbenda igen kpa ngi i nan kwagh.

Bibilo kaa ér: “Or u zungwen mhôônom ka iyol i nan je nan eren a i dedoo ye, kpa ipilaor yô, ka iyol i nan je, nan eren i ican ye.” (Anzaakaa 11:17) Ior mba ve lu a mhôônom ma zungwen yô, mba ne ior kwagh mgbeghaa. Ka ve kegh iyol u nan ayol a ve sha ci u mbagenev, tesen ve ikyo i wan, shi eren ve akaa sha agee a ve, shi nan ve shighe ve kua akaa a ve agen kpaa. Ieren ne ka i va ve a mtsera sha igbenda kposo kposo. Msaanyol kpa ka mtsera u vesen u ka ve zua a mi sha ieren ve i nan kwagh wuee la yô.

Kwaghtôvon tese ér, mba ve ne ayol a ve u wasen ior la cii, ityough ki fe nanden ve ga, shi iyav shin alegh a iyolough agen kpaa nga fe nyoon ve ga, shi ishima fe vihin ve kpaa ga. Jighilii yô, ka ve lu gbong gbong. Ior mba ve lu a ucôronmbauangev er HIV, shin angev mbu kpen alegh nahan je kpa, ka vea naan ior kwagh wuee yô, i lu ve guda ken iyol. Shi ikyav tese ér ior mba yange msôrom vihi ve, kpa hegen ve lu nôngon ér vea hide a lu sha mar ve la, ka vea wasen mbagenev yô, ishima i kera fe zan ve iyol ga, nahan ka vea ma ga je kpa, i lu ve dang ga.

Er i hii ve kwagh ka a lu nahan yô, ikyav tese ér “ka wea zungwen ior mhôônom shi wea naan ior iwasen wuee shi wea eren kwagh a ior kundu kundu yô, u kera lu a zayol ken ishima kpishi ga.” Aluer u ngu nan ior kwagh yô, ishima ia kera lu u ker lenge lenge ga. Shi ior mba kasev vev shin noov vev ve saa ku je kpa, ka vea wasen mbagenev yô, ica ka i gba ga je tsô ve de u henen sha akaa a nan ve ishimavihin la.

Ka wea naan ior kwagh yô, i saan we iyol je i zua ga. Akperan nga sha kwagh ne ga.

Yesu yange wa mbadondon un kwagh kaa ér: “Na nen, nahan ne kpaa á na ne; ikaren i dedoo, i kindigh, i yegher, i ivin poo, á na i sha ikyum yen, gadia ikaren i ne karen a mi ne, ka i á va kar ne sha min ye.” (Luka 6:38) Ka wea naan ior kwagh yô, ve kpa ve nôngon u tesen iwuese sha kwagh u u ne ve mgbeghaa la, shi ve ayolave kpa ve hingir mbanan ior kwagh wuee. Sha nahan yô, ieren i nan ior kwagh la ka i na ior ve hingir u eren kwagh ken ijoughave shi yan ijende.

Mbatôvon sha akaa time sha gbenda u uumace ve ye ijende la, nahan ve kaa ér, “ior mba ve tesen mbagenev ikyo i wan hanma shighe a iyoltangen shio yô, ka ve na mbagenev kpa ve dondo ieren ve la.” Jighilii yô, “ior ka vea ôron ngeren mba ve ter akaa a doon tsung, a mbagenev ve er a ior la tseegh kpa, kwagh la a na ve kpa ve hingir mbanan iwasen wuee.” Sha nahan yô, kwaghtôvon ugen tese ér, “aluer iorov imôngo mba eren kwagh ken ijoughave yô, hanmô ve nana fatyô u geman asande a ior shin iorov uderi imôngo ken a ve sha ieren i nan, man a lu mbagenev mba nan lu a fa ve ga, shi nan lu a nenge a ve kpaa ga yô.” Inja na yô, kwagh môm u u er hen ijiir you u tesen ér u wa mbagenev ikyo la una na yô, ieren la ia hii u samber sha mbagenev môm môm zan zan tseren hen ijiir la cii. U lu hen imba ijiir la nahan, a doo u gaa? Sha kpôô yô, aluer ior kpishi mba nan mbagenev kwagh yô, mbamtsera mba doon tsung vea due ken ieren ve la kpishi.

De se nenge ikyav sha kwagh u dedoo u ngu a due ken ieren i nan kwagh wuee la, hen kpentar u Florida, ken tar u Amerika. Yange zegeuraahumbe ugen vihi akaa kpishi ken kpentar la, nahan Mbashiada mba Yehova mbagenev mba kuman iorov imôngo tsua a ishima ve, za u za nan mba akaa vihi ve la iwasen. Er ve lu keghen ér i va a ikyav mbi hev vea hii tom sha iyou i yange gba u vea sôr la yô, ve nenge fensi u orgen u ya na lu her ikyua yô, yôhôr haa inya, maa ve kaa ér vea hide a maa un her. Orya la yange va nger washika tindi a mi hen afishi a Mbashiada mba Yehova a shin itine, kaa ker ér, “Mayange me de u sughun ne ga. M nenge mer ior mban mba ken ior mba hemban fan kwagh, mba m hila zough a ve yô.” Er lu a iwuese kpishi yô, a tindi a iyua mgbeghaa ér Mbashiada ve er tom ve, u yange kaa ér ka tom u kpilighyol la, a mi.

Kwagh u vesen u mbatôvon sha akaa ve zough a mi yô ér, “ikyav tese ér isharen i wasen mbagenev la ngi uumace cii ken awambe.” Kwaghtôvon la kaa ér mbayev “ka ve lu a fa iliam ga je tsô maa ve hii u nan or kwagh a ishima ve i môm.” Sha ci u nyi? Bibilo na mlumun ér i gba uumace “sha inja i mlu u Aôndo,” inja na yô, i gba ve mba a aeren a doon tsung, a Aôndo kpa a lu a mi la vough.—Genese 1:27.

Ieren i doon tsung igen i Yehova, Aôndo u a gbe se la, a lu a mi yô, ka i nan kwagh wuee la. A na se uma kua akaa agen a i gbe u se lu a mi ve a saan se iyol la cii. (Aerenakaa 14:17; 17:26-28) Se fatyô u fan Ter wase u sha la tsembelee, kua akaa a dedoo a a we ishima u eren sha ci wase la kpaa, sha u henen Bibilo, i i lu Mkaanem nam la. Takerada ne pase se kpaa ér, Aôndo na se kwagh u una wase se u va zuan a msaanyol ken hemen yô.a (1 Yohane 4:9, 10) Er ieren i nan kwagh wuee la i dugh hen Yehova Aôndo, shi a gbe u sha inja i mlu na yô, fa wer aluer u ngu nan ior kwagh wuee er Aôndo nahan yô, a saan we iyol shi Aôndo una lumun we.—Mbaheberu 13:16.

U umbur kwagh u Alexandra, u se ter ken mhii u ngeren ne la kpa? Ka nyi yange i due ken ieren na la? Orgen shin mato la yange kaa a na ér inyaregh ki a ne Orchina la, a ta a ta ki kera. Nahan kpa, bôôsu la za tilen hen geri ugen yô, Orchina u Alexandra wase un la zua a azende a na agen her, maa ve na un inyaregh, a hide a dola 20 heregh je, a na Alexandra. Heela tseegh ga, Orchina ne za er kwagh u Alexandra ôr a na la; a hii u henen Bibilo. Iwer itiar ngi karen yô, Alexandra za mkohol u vesen u Mbashiada mba Yehova lu eren ken tar u Peru, ken zwa China yô, maa a za zua a Orchina shon. Yange saan Alexandra iyol kpishi er hide nenge a na yô. Or ne yange soo u tesen iwuese sha hanma kwagh u Alexandra er a na la, nahan a lôhô Alexandra kua mba yange va mkohol ne a ve imôngo la cii, iwer hen ijiir na i teen kwaghyan, a za yôr ve kpishi.

Ka wea naan ior kwagh shi wea wasen ve yô, i saan we iyol. Shi aluer u ngu a ieren ne yô, u wase ior vea hemba fan Yehova Aôndo, u uiyua mba dedoo cii ve dugh hen a na la! (Yakobu 1:17) U ngu zuan a mbamtsera sha u nan ior kwagh wuee nahan kpa?