Tom Wase u Pasen Kwagh—Ka Tom u Tesen Ior Mhôônom
1 Yesu yange nenge ér i “tumbul” a ikpelaior i i lu ungwan loho u a lu pasen ve la, “ve sambe wuee er iyôngo i i lu a orkuran i ga nahan.” (Mat. 9:36) Nahan er ve doo un ishima shi mhôônom kôr un a ve yô, a tese ve igbenda i Yehova shi a sur ve asema shi a pase ve kwaghaôndo kpaa. Aluer se mba timen sha igbenda i Yesu yô, se hingir u henen kwagh er un nahan, shi mhôônom ma a hemba kôron se a mba se pasen ve kwagh la.
2 Hide hen ase sha kwagh u Yesu yange a er a ior shighe u vea keren iwasen ve vea va hen a na yô. (Luka 5:12, 13; 8:43-48) Mhôônom yange ma kôr un a mba ve lu a mbamzeyol mba vesen la. (Mar. 7:31-35) Yange fa mlu u ior nahan waan ve ikyo. Shi yange fa er ishima lu mbagenev ker yô, nahan eren kwagh a ve sha inja. (Luka 7:36-40) Sha kpôô yô, Yesu zungwen mhôônom vough er Aôndo wase nahan.
3 “Mhôônom Kôr Un” a Ve: Yesu yange gbaa pasen ior kwagh ér gba u una pase ve kwagh ga. ‘Mhôônom kôron un’ a ior. (Mar. 6:34) Nahan se nyian kpa, se mba gbe pasen ior loho ne tseegh tsô ga, kpa se mba nôngon ser war. Nôngo fa er i hii ve ior mbagenev ve vende loho ne yô. Hii nan ve ishima i nyian ve kpishi shin ve lun a ian ga yumu? Mbahemenev mba kwaghaôndo u aiegh nzughul a ve shin tsugh vee? Aluer kwagh u ior gba se ishima tsung yô, vea hemba keghen ato a loho u dedoo u se pasen la.—2 Kor. 6:4, 6.
4 Mhôônom ka ma bende a ishima i or. U tesen ikyav yô: Ankyundan u lun iwer itiar yange kpe kwase ugen. Tsô er Mbashiada uhar va u va pasen un kwagh yô a ngohol ve, kpa awashima na yô lu u vea ôr un ityôkyaa i Aôndo a ne ian ér ican i er ior yô, una hule kera. Kpa kwase ne kaa ér: “Er m lu ôron ve kwagh u a erem yô, ve kegh ato zulee, mhôônom kôr ve a mo, nahan kundum iyol kpishi, mba moughon u yemen yô, m kaa a ve mer ve va kwagen kpaa.” Mhôônom ma ker u a hanma or u ú zough a nan zum u ú dugh kwaghpasen kpa?
5 Aluer mhôônom ma kôron se a ior yô, se hemba surun ve shima jim jim. Shi aluer se mba eren nahan yô, se na Yehova, “Ter u A lu a mhôônom ma zungwen” la icivir.—2 Kor. 1:3.