Ka Nyi I Lu Isholibo?
Mlumun u Bibilo i ne yô
Isholibo ka ieren, shin mlu u ken ishima shin mhen u a hendan a atindi a Aôndo yô. Kua u peren atindi a Aôndo sha u eren kwaghbo shin kwagh u a lu u perapera sha ishigh ki Aôndo ga yô. (1 Yohane 3:4; 5:17) Bibilo shi ôr kwagh u isholibo i or ka nan fa kwagh u i doo u ma nan er kpa nan kera er kwagh shon ga la kpaa.—Yakobu 4:17.
Asember a ken zwa Heberu man zwa Grika a i gem ken Bibilo ér isholibo la cii inja i a ér “u keren kwagh karen,” shin u keren kwagh kpa tan ga. U tesen ikyav yô, ken Iserael u tsuaa la ushoja mbagenev lu, mba ve fa iwen i keren je, yange vea ker iwen sha kwagh ve ta keng, i “kar ga” yô. Ishember i i gem ér “kar ga” ne, aluer i gema i er i nger ken zwa Heberu man zwa Grika la gedee yô, a fatyô u ôron ér yange vea ker iwen yô, ve “er isholibo ga.” (Mbaajiriv 20:16) Nahan ka a kaa ér or er isholibo yô, mba ôron ér nan er kwagh u kar atindi a Aôndo a perapera la ken kpe yô.
Er i lu Aôndo a gbe akaa cii yô, ngu a ian i wan uumace atindi. (Mpase 4:11) Hanma wase cii nana va ôr Aôndo kwagh u nan eren la iyol i nan je.—Mbaromanu 14:12.
Or a fatyô u palegh isholibo ken uma u nan vindi vindii?
Ei. Bibilo kaa ér “ior ca ca ve er isholibo nahan kera mba a iengem i Aôndo ga.” (Mbaromanu 3:23; 1 Utor 8:46; Orpasenkwagh 7:20; 1 Yohane 1:8) Er nan ve kwagh a lu nahana?
Uumace mba hiihii mbara, Adam man Ifa, yange ve lu a isholibo iyol sha hiihii la ga. Kwagh ne lu nahan sha ci u Aôndo yange gba ve sha ibeen na, ve lu vough. (Genese 1:27) Nahan kpa, yange ve va hemba Aôndo ato, nahan ve kera lu vough ga. (Genese 3:5, 6, 17-19) Mba va maren ônov yô, ônov mbara due a isholibo man mlu ve u vough ga la. (Mbaromanu 5:12) Ka vough ér Tor Davidi yange kaa nahan, ér, ‘I marem ken ifer, ka ken isholibo je, ngôm wa iyav av ye.’—Pasalmi 51:5.
Asorabo agen vihi hemba agenee?
Een. U tesen ikyav yô, Bibilo kaa ér ior mba ken Sodom, gar ugen sha ayange a tsuaa la, lu ‘mbaaferev mba eren akaabo kpishi,’ mba asorabo a ve “vihi yum” yô. (Genese 13:13; 18:20) Nenge akaa atar a i fe mkehe shin mvihi u isholibo sha mi yô.
Isholibo i veseghee. Bibilo ta se icin ér se palegh asorabo a vesen er idya shin ijimba nahan, kua akombo a civir man iv man ihyundugh ki msôrough man u ngohol ior inyaregh sha apera ma iwoo-or man ahir a eren. (1 Mbakorinte 6:9-11; Mpase 21:8) Bibilo pav asorabo ne kposo a asorabo a or ka nan er bemaa shin sha mfe-ga la, er u ôron kwagh shin eren kwagh u a ne mbagenev ishimavihin nahan. (Anzaakaa 12:18; Mbaefese 4:31, 32) Nahan cii kpa, Bibilo wa se kwagh ér se palegh nyityô isholibo cii, gadia ia na se hingir u peren atindi a Aôndo a vese la kpaa.—Mateu 5:27, 28.
Awashima u orsholibo la. Asorabo agen ior ka ve er sha ci u ve per atindi a Aôndo sha lan. (Aerenakaa 17:30; 1Timoteu 1:13) Shin er Bibilo i lumun a asorabo la ga nahan kpa, i pav a kposo a asorabo a or ka nan er sha u peren atindi a Aôndo sha apera la. (Numeri 15:30, 31) Asorabo a or ka nan er sha apera la ka a due i lu ken “ishima i nan i bo” la.—Yeremia 16:12.
Ikwa i or er isholibo la. Bibilo shi tese mkposo u isholibo i eren kwa môm man i eren kwa kimbir kimbir la. (1 Yohane 3:4-8) Mba ve fe kwagh u a lu u vough kpa ve gem ve lu “eren asorabo sha apera” yô, Aôndo una ôr ve ijir i kuugh.—Mbaheberu 10:26, 27.
Mba ve er asorabo a vesen yô ishima ia fatyô u nan ve ibo tsung sha ci u myoho u isholibo ve la. Ikyav i tesen yô, Tor Davidi yange nger ér: “Aferakaa am cirim, yisa, a yuhwam a hembam, er ikyav mbi yuhwan yum yô.” (Pasalmi 38:4) Kpa Bibilo na se ishimaverenkeghen ne, ér: “Iferor nana̱ undu gbenda u nan; u nan lu perapera ga kpaa, nana̱ gbihi mbamhen mba nan kera, nana̱ hide hen TER, tsô Una zungwe nan mhôônom, man hen Aôndo wase, gadia Un deen kwaghbo wuee.”—Yesaia 55:7.