‘Akaa A Injaa A sha Kwaghfan Cii’

1-3. Lu hanma ijiir Yesu ôr kwaghôron sha iyange igen sha shighe u urahe ken inyom i 31 laa, man er nan ve kwaghôron na la kpiligh mba lu tesen ve la iyol yumu?

KEN inyom i 31, hen shighe u urahe la, Yesu Kristu mough zende za mgbôghom ikyua a Kapernahum, gar u lu hen kpe u Zegemnger u Galilia vegher u ken imbusutarimese, u̱ ior eren ityom her kpoghuloo la. Yesu tsa eren msen un tswen sha uwo ugen hen ningir u Kapernahum la tugh kaka. Tsô sev mbu aven yô, a yila mbahenen nav, maa a tsua mbagenev ken a ve iorov 12, a yila ve ér mbaapostoli. Hen shighe ne, ikpelaior kpishi dondo Yesu ijime, man mbagenev ken ve due sha ajiir a icaa, ve za kohol hen ijiir la sha uwo hen ape lu kpuun kpuun yô. Sar ve tsung u ma ve ongo kwaghôron na shi ma a bee ve angev kpaa. Yesu er akaa a ve lu veren ashe ér a̱ er la cii.—Luka 6:12-19.

² Yesu va hen ape ikpelaior kpishi lu la va bee mba ve lu dedoo ga la cii angev vev. Nengen ér or ve môm nan kera kine angev ga yô, a hide a tema inya, a gba tesen ve.a Mkaanem nam ma ôr sha iyange i ahumbe a kundunyol lu toron sha shighe u urahe la yange ma a kpiligh mba lu tesen ve la iyol kpee. Kera kpa, er i gba je ve lu a vande ungwan ma or tese er un nahan ga. Yesu yange lam ter akaa a ityôô, shin za zwa sha akaa a ior vande ungwan sha zwa u mbatesen mba Mbayuda mbazan ati la ga, nahan ityesen na hemba lun ior a inja cii. Kpa gema ôr kwagh ter ngeren mba ken Ruamabera u Mbaheberu, u jijingi mgbegha ior nger la kwa kimbir kimbir. Loho na cimin ga, mkaanem nam kpa taver u kaven ga, shi wanger ken ato kpaa. Yesu er kwaghôron la been yô, kpiligh ikpelaior la iyol kpishi. Sha kpôô yô, yange gba u a kpiligh ve iyol, gadia orfankwagh u hemban cii sember lamen a ve!—Mateu 7:28, 29.

³ I nger ityesen la ken Mkaanem ma Aôndo, kua ikpelaakaa igen i Yesu ôr shi er cii. Doo u se time sha kwagh u Bibilo i̱ er sha Yesu yô, gadia ka ken a na ‘akaa a injaa a sha kwaghfan cii’ a lu ye. (Mbakolose 2:3) Yesu zua a kwaghfan, u a lu u eren kwagh a mfe man mkav sha inja la hana? Yange tese kwaghfan nena, man se dondo ikyav na la nena?

 4. Ior mba Yesu tese ve ken Nasareti mbara yange ve pine ér nyi, man lu sha ci u nyi?

⁴ Sha iyange igen la Yesu dugh kwaghaôndo u pasen yô, a za ken Nasareti, gar u i yese un her la, a za tese ior ken shinagoge. Ior kpishi mba ve ungwa kwaghôron na yô, kpiligh ve iyol ve gba pinen ér: “Ka han Or ne A zough a mfe ne?” Yange ve fa tsombor u Yesu man mbamaren nav kua anmgbianev nav mba nomso man mba kasev, shi ve fa er a dugh hen tsombor u lun ican ican yô. (Mateu 13:54-56; Marku 6:1-3) Shi ve fa dedoo er orgbanikyon u fan kwaghôron tsema tsema ne vande zan ma ikyumen makeranta u mbatesen mba Mbayuda ga yô. (Yohane 7:15) Sha nahan yô, ka inja er mpin ve la lu u sha inja nahan.

 5. Yesu yange pase ér un zua a kwaghfan na hana?

⁵ Kwaghfan u Yesu tese la lu sha ci u mhen na lu u vough tseegh tsô ga. Ken masejime u Yesu lu eren tom na u pasen kwaghaôndo la, lu tesen ken tempel sha shighe ugen, nahan a pase ér un zua a kwaghfan na hen ijiir i hemban cii. A kaa ér: “Ityesen i M tesen, ka i Yam ga, kpa ka i Un u A tindim la.” (Yohane 7:16) Mimi je, lu Ter, u tindi Wan na, Yesu la jighilii je na un kwaghfan ye. (Yohane 12:49) Nahan kpa, Yesu zua a kwaghfan hen Yehova nena?

6, 7. Lu sha igbenda i nyi Yesu zua a kwaghfan hen Ter naa?

⁶ Icighan jijingi u Yehova yange lu eren tom ken ishima i Yesu shi lu benden a mbamhen nav kpaa. Yesaia tsengaôron kwagh u Yesu u a lu Mesiya u ityendezwa la ér: “Jijingi u TER Una lu sha a Na, ka Jijingi u kwaghfan man u mkav, Jijingi u wasen henen kwagh man u ageegh, Jijingi u mfe man u cian TER.” (Yesaia 11:2) Er jijingi u Yehova lu sha Yesu shi lu wasen un u henen kwagh, shi tesen un kwagh u una er yô, kera taver u fan er i hii ve mkaanem nam man aeren a na cii yange tese kwaghfan u hemban cii la ga.

⁷ Yesu shi zua a kwaghfan hen Ter na sha gbenda ugen u kpilighyol kpen kpen. Er se vande nengen ken ityough ki sha 2 kira nahan, shighe u Yesu lu sha vea Ter na uicôronmbaashighev la, a lu sha ian i fan mhen u Ter na sha hanma kwagh cii. Taver u fan ikighir i kwaghfan u Yesu zua a mi hen Ter na, shighe u lu eren tom vea na ikyooso ikyooso, er “or u fan tom” u̱ Aôndo, sha u gban akaa cii, a uma man a uma ga kpaa la. Ka sha ityôkyaa i dedoo je, yange i ôr kwagh u Wan shighe u lu a va shin tar ga la ér ngu ‘kwaghfan’ ye. (Anzaakaa 8:22-31; Mbakolose 1:15, 16) Ken tom u pasen kwaghaôndo ú Yesu er shin tar la cii, lu eren tom a kwaghfan u á zua a mi shighe u lu sha vea Ter na la.b (Yohane 8:26, 28, 38) Sha nahan yô, igbanger i kwaghfan u Yesu man mze u mkav na, u yange mkaanem nam tese la kua mnenge u vough u tese sha aeren a na cii la, i̱ de lu kwagh u kpiligh se iyol ga.

 8. Er se lu mbadondon Yesu yô, ka sha igbenda i nyi nahan se fatyô u zuan a kwaghfana?

⁸ Se kpa, er se lu mbadondon Yesu yô, gba u se har sha Yehova u a lu imbor i kwaghfan la. (Anzaakaa 2:6) Kpa u ngu wer, Yehova ne se kwaghfan sha ivande ga. Nahan cii kpa, ongo mbamsen mba se eren sha gbashima ser a na se kwaghfan u una wase se u nôngon a mbamtaver ken uma la. (Yakobu 1:5) Gba u se nôngo kwagh kpoghuloo ve se fatyô u zuan a kwaghfan la ye. Gba u se za hemen u keren un er “akaa a injaa a i yer” a nahan. (Anzaakaa 2:1-6) Sha kpôô yô, gba u se za hemen u seer timen ken Mkaanem ma Aôndo, ma ma tese kwaghfan na ken igbar la shi se eren kwagh u se henen la ken uma wase. Ikyav i Wan u Yehova a ver la hemba ngin se a inja sha u wasen se u zuan a kwaghfan. De se time nen sha igbenda i Yesu tese kwaghfan la shi se fa er se kar ve se dondo ikyav i a ver se la yô.

 9. Kanyi yange i na ve ityesen i Yesu lu a kwaghfan ker yumu?

⁹ Hanma shighe yô, ikpelaior yange i̱ tim nongo lugh lugh i̱ za kohol hen Yesu sha u ungwan iliam na. (Marku 6:31-34; Luka 5:1-3) I̱ de taver se er hii ve kwagh lu nahan ga, gadia Yesu yange una lamen yô, a ôr mkaanem ma sha kwaghfan u hemban cii! Ityesen na tese ér yange lu a mfe u Mkaanem ma Aôndo kpishi shi lu a tahav mbu ganden ave mbu kaven mishe u hanma mzeyol. Ityesen na doo ior sha won cii shi ngi wasen ior hanma shighe cii. Time ase sha akaa agen a a tese ér kwaghfan ngu ken mkaanem ma Yesu, u i tsengaôron ér ngu “Orwasenmhen u Kpilighyol” la yô.—Yesaia 9:6.

10. Ka aeren a dedoo a nyi Yesu wa se kwagh ér se lu a mini?

¹⁰ Ityesen i sha Uwo, i i ter sha mhii u ityough kin la, ka ityesen i Yesu i i nger i ken Bibilo ijiir i môm i hembe lihen cii yô; ma kwaghôron ugen shin mkaanem ma orngeren Bibilo môm kpa nungwa sha mi ga. Yesu wa se kwagh ken ityesen ne ér, se ker u ôron shin eren kwagh sha inja tseegh tsô ga, kpa a wa se kwagh sha akaa a ka a na ve se hingir u ôron shi eren ma kwagh la kpaa. Yesu yange fa dedoo je ér ka gbenda u se nengen shi se henen kwagh la ka u na ve se lam shi se er kwagh ye, nahan a wa se kwagh ér se lu a aeren a dedoo a aa fatyô u wasen se yô, inja er ishima i legh legh man u lun a gbashima sha kwagh u perapera man u keghen iyol u zungwen ior mhôônom shi lun a ve bem bem man u doon a mbagenev nahan. (Mateu 5:5-9, 43-48) Aluer se mba a aeren ne ken asema a ase yô, kwaghôron wase man ieren yase cii ia lu kwagh u doon Yehova shi nan sha er se doo a mbagenev kpaa yô.—Mateu 5:16.

11. Zum u Yesu lu wan kwagh sha kwagh u isholibo i ieren yô, a pase kwagh u a lu mishe u isholibo la nena?

¹¹ Zum u Yesu lu wan kwagh sha kwagh u isholibo i ieren yô, a pase kwagh u a lu mishe u isholibo la. A gba kaan a vese tsô ér se palegh aeren a pilagh ga. Kpa a gema a ta se icin ér se de ne ishimavihin ian sha u i jile ken asema ase ga. (Mateu 5:21, 22; 1 Yohane 3:15) Yesu yange kwagh u idya i eren tsô a de ga. Kpa a gema a ta icin sha kwagh u isharen i yaven a or, i ka i hii ken ishima ve i gba u or nana er imba kwagh u vihin ngura nahan la. A wa se kwagh ér se de ne ashe a ase ian ser a kende isharen i bo ken a vese kua isharen i eren idya ga. (Mateu 5:27-30) Yesu ôr kwagh u aeren a ase tseegh ga, a ter akaa aa a mgbeghan se u eren aeren shon kpaa. A ôr kwagh u anza man asaren a ka a mar isholibo la.—Pasalmi 7:14.

12. Mbadondon Yesu nenge kwaghwan na la nena, man ka sha ci u nyi?

¹² Sha kpôô yô, mkaanem ma Yesu ma a kwaghfan ker! Ka kwagh u yange ma̱ de “kpiligh ikpelaior iyol a ityesen Na” ga. (Mateu 7:28) Er se lu mbadondon un yô, se nenge kwaghwan na u a lu a kwaghfan ker la ser ka kwaghwan u tesen se er se eren uma wase yô. Ka se ker u lun a aeren a dedoo a Yesu yange tese la, er mhôônom ma zungwen man mlu u bem bem man dooshima nahan, gadia se fa ser aluer se mba a aeren ne yô, kwagh ne una wa se imagh ki eren ishima i Aôndo. Se nôngo sha afatyô wase cii se dugh mishe u mhen u bo kua a asaren a bo, a Yesu a te se icin sha mi la ken ishima yase kera, inja er ishimanyoon man isharen i jimbagh nahan, gadia se fa ser aluer se er nahan yô, kwagh la una wase se u palegh isholibo.—Yakobu 1:14, 15.

13, 14. Kanyi i tese ér Yesu yange er kwagh sha inja sha u tsuan kwagh u una er ken uma naa?

¹³ Yesu yange tese kwaghfan sha mkaan tseegh ga, kpa tese sha ieren kpaa. Uma na jimin cii, akaa a yange tsua u eren la man mnenge u nengen iyol na kua ieren na a mbagenev cii tese kwaghfan sha igbenda i doon kposo kposo. Time ase sha akaa agen a a tese ikyav ér Yesu yange eren kwagh sha ‘kwaghfan u mimi man m-er u sha inja kpaa’ yô.—Anzaakaa 3:21.

¹⁴ Kwaghfan wa m-er u eren kwagh sha inja kpa ker. Yesu yange er kwagh sha inja sha u tsuan kwagh u una er a uma na yô. Hen sha injaor i Yesu una soo kpa yange ma lu la, shin ya u yange ma maa la, shin tom u yange ma er la, shin ikyumenor u yange ma lu sha kwagh u taregh la. Yesu fa ér uma u zendan ambaakaa la cii “ka gbilinkwagh man ka u zendan di ahumbe ityô tsô.” (Orpasenkwagh 4:4; 5:10) Imba uma la cii ka lanegh, ku ku lu mkposo u kwaghfan la. Yesu tsua u eren akaa ken uma na akuma akuma. Yange sar un u lun ornyar shin lun a akaa yôugh yôugh ga. (Mateu 8:20) Yesu er kwagh u yange tesen yô, lu a awashima môm, u ver ishe na sha mi jighilii yô, awashima shon yô lu u eren ishima i Aôndo. (Mateu 6:22) Yesu er kwagh sha kwaghfan sha u eren akaa a seer samber a loho u Tartor u Aôndo, aa a hembe lun a inja shi mtsera a lu ker i hembe uyôughyôughmbaakaav la. A na shighe na sha u eren akaa ne shi a er a sha agee a na kpaa. (Mateu 6:19-21) Sha nahan yô, Yesu ver se ikyav i dedoo i se dondo yô.

15. Mbadondon Yesu vea tese ér ve ver ishe ve jighilii sha awashima môm tseegh nena, man er nan ve u eren nahan la i lu kwaghfana?

¹⁵ Mbadondon Yesu nyian nenge er u veren ishe jighilii sha awashima môm la i lu kwaghfan yô. Sha nahan yô, kera mba nyer ken ishimanyian sha anzô a gban dang dang ga shi mba zendan asaren a taregh, a ka a vihi or shighe kpishi shi a bee nan agee ken iyol la ga. (1 Timoteu 6:9, 10) Mbakpishiv hii u eren akaa ken uuma vev akuma akuma sha er vea hemba lun a shighe u eren tom u Mbakristu yô, a̱ lu ú yôôn kwagh u Tartor hanma shighe la je kpaa. Ma kwagh ugen u or a tsua u eren a uma u nan ve a hemba doon je kpa ngu ga, gadia aluer tom u Tartor hemba gban or ishima a akaa agen cii yô, nana zua a msaanyol man mkom u hemban cii.—Mateu 6:33.

16, 17. (a) Lu sha igbenda i nyi nahan Yesu tese ér un eren kwagh akuma akuma shi un ngu a tahav mbu eren hanma kwagh cii ga? (b) Se tese ser se mba eren kwagh akuma akuma shi se mba a tahav mbu eren hanma kwagh cii ga nena?

¹⁶ Bibilo ver kwaghfan iya i môm vea iyol i hiden a mi ijime, i i lu u fan mbamyen asev la. (Anzaakaa 11:2) Yesu eren kwagh akuma akuma shi fa ér un ngu a tahav mbu eren hanma kwagh cii ga. Yange fa er i lu u una gema hanma or u nana ungwa loho na cii ga yô. (Mateu 10:32-39) Shi fa kpaa ér ka asande a ior kpuaa tseegh un iyol na una pase kwagh a ar a ve ye. Nahan a er kwagh sha kwaghfan sha u wan tom u geman ior hingir mbahenen la sha ikyev i mbadondon un. (Mateu 28:18-20) Yange pase ve a iyol i hiden a mi ijime ér vea ‘er ityom i i hembe’ i na yô, gadia lu u vea hemba pasen kwaghaôndo shighe gôgônan shi vea hemba aren a ior sha tar wuee. (Yohane 14:12) Shi Yesu fa ér un gande u keren iwasen ga. Yange lumun iwasen i mbatyomov mba ve va u va wasen un ken taaikyôngo la kua i ortyom u va u va taver un ishima ken Gesemane la. Zum u kwagh hemba gban Yesu sha iwasen cii la, Wan u Aôndo ne vaa sha imo i genger genger.—Mateu 4:11; Luka 22:43; Mbaheberu 5:7.

¹⁷ Se kpa gba u se eren kwagh a akuma akuma shi se kav er se lu a tahav mbu eren hanma kwagh cii ga yô. Se soo ser se eren tom a ishima i môm shi se nôngo sha afatyô wase cii se er tom u pasen kwaghaôndo shi geman ior hingir mbahenen la. (Luka 13:24; Mbakolose 3:23) Shi gba u se umbur kpaa ser Yehova tôôn se karen sha mbagenev ga, nahan se kpa se er nahan ga. (Mbagalatia 6:4) Kwaghfan u mimi una wase se u tsuan akaa a tahav asev kua mbamlu asev vea na se ian i eren yô. Kwagh ugen yô, kwaghfan una wase mba ve lu sha aan a tom la u fan er ve yen sha akaa agen yô, shi vea fa er i gbe u vea keren iwasen sha ashighe ashighe yô. Uma u eren kwagh akuma akuma la una wase amba la u ngohol iwasen la a ave ahar, gadia Yehova una fatyô u eren tom a Orkristu ugen sha u nana hingir or u ‘surun’ ve “ishima kpishi.”—Mbakolose 4:11.

18, 19. (a) Kanyi i tese ér Yesu yange hanger ikyaa ga shi eren kwagh a mbahenen nav sha gbenda u maan ve a maa? (b) Er nan ve se lu a atôakyaa a injaa a se eren kwagh a mbagenev sha gbenda u maan ve a maa shi se hanger ikyaa a ve ga, man se er kwagh ne nena?

¹⁸ Yakobu 3:17 kaa ér: “Kwaghfan u a dugh Sha yô, . . . [ka] u sar sar [shin “u hanger ikyaa ga,” NW].” Yesu yange hanger ikyaa a mbahenen nav ga shi eren kwagh a ve sha gbenda u maan ve a maa kpaa. Yange fa mbamyen vev dedoo, nahan kpa hemban veren ishima sha kwagh u dedoo u nenge a mi ken a ve la. (Yohane 1:47) Yange fa er lu u vea undu un hen tugh mbu i kôr un la yô, kpa ta akpelan sha kwagh ve ér vea sue un ga ze. (Mateu 26:31-35; Luka 22:28-30) Peteru nyiman kwa tar jigh jigh ér un fa Yesu tsô kpaa ga. Nahan cii kpa, Yesu er msen sha ci u Peteru shi tese ér un ngu a vangertiôr sha kwagh u jighjigh u nan u Peteru. (Luka 22:31-34) Hen tugh mbu Yesu mbu masetyô shin tar ne la, a er msen hen Ter na, kpa a ter akaa a mbahenen nav er shami ga la ga. A gema a ôr kwagh u dedoo sha iyol ve, u ve er ken uma ve zan zan hen tugh mbura yô, a kaa ér: “Ve wa kwaghôron Wou ikyo.” (Yohane 17:6) Shin er ve lu a mbamyen nahan kpa, a gema “akaa” a Tartor na a shin tar ne a wa ve sha ikyev. (Mateu 25:14, 15; Luka 12:42-44) Vangertiôr u Yesu lu a mi ken a ve kua jighjigh u na ve la yange una taver ve ishima u eren tom u a kaa a ve ér ve er la je ka u henen a hen ga.

¹⁹ Mbadondon Yesu mba a ityôkyaa i vea dondon ikyav i a ver ve sha kwagh ne yô. Aluer Wan u Aôndo u vough je kpa lu wan ishima a mbahenen nav mba ve lu vough ga la yô, hile se uumace mba se lu vough ga ne ve se yem hanger ikyaa a ve yee? (Mbafilipi 4:5, NW) Doo u se hemba veren ishima sha kwagh u dedoo u a lu ken mbacivir Aôndo a vese imôngo la, se kera penda ishima sha mbamshi vev ga. Doo u se umbur ser ka Yehova a ve a ve hen a na ye. (Yohane 6:44) Sha nahan yô, Yehova nenge a ma kwagh u dedoo ken a ve kpee, se kpa doo u se nenge a kwagh u dedoo u a lu ken a ve la. Aluer se mba hemban veren ishima sha a aeren a dedoo a mbagenev yô, kwagh ne una wase se u ‘den ve kwaghbo’ tseegh ga, kpa se zua a akaa ken a ve a se fatyô u wuese ve sha mi kpaa yô. (Anzaakaa 19:11) Aluer se tese ser se mba a vangertiôr ken anmgbianev asev mba nomso man mba kasev mba ken Kristu yô, se wase ve u civir Yehova sha afatyô ve cii, shi vea zua a iember ken mcivir ve la kpaa.—1 Mbatesalonika 5:11.

20. Kanyi i doo u se er a kwaghfan u injaa u a dumbur ken ityakerada i Ivangeli laa, man ka sha ci u nyi?

²⁰ Sha mimi yô, kwaghfan u injaa dumbur ken ityakerada i Ivangeli, i i er kwagh u uma u Yesu man tom na u pasen kwaghaôndo la! Kanyi i doo u se er a kwaghfan u injaa ne sha wono? Ken mbee u Ityesen i sha Uwo la, Yesu taver mba lu tesen ve la ishima ér ve de lu mbaungwan a ungwa mkaanem nam ma kwaghfan mara tseegh ga, ve eren sha mi kpaa. (Mateu 7:24-27) Aluer mbamhen asev man asaren kua aeren a ase nga zuan sha mkaanem ma Yesu kua aeren a na a sha kwaghfan la yô, kwagh ne una wase se u lun ken mlu u hemban doon cii hegen je kpaa, shi se za hemen u lun sha gbenda u nan se uma u tsôron la. (Mateu 7:13, 14) Sha kpôô yô, ma kwagh ugen u se tsua u eren ve a hemba doon shin a lu kwaghfan u hemban ngun je kpa ngu sha won ga!