Iniongo I Been Makeranta U Gileadi I Sha Kwa 123

Í Taver Mba Been Makeranta U Gileadi Asema Ér Ve “Hii U Timen”

SHA iyange i Sati, Setemba 8, 2007 la, ior mba kuman 6,352 mough ken ityar igen 41 va kohol sha u eren iniongo i been Makeranta u Bibilo u Watchtower u Gileadi i sha kwa 123 la. Anthony Morris u a lu môm ken Mbahemenev mba Shin Tine la lu orkyôn u iniongo ne, yange sugh mbavan iniongo za van sha ahwa 10:00 pepe. Lamen tiônôô been yô maa lôhô Gary Breaux u a lu môm ken Kômatii u Nengen sha Branci u Amerika la ér a na kwaghôron u hiihii.

Anmgbian Breaux taver mba been makeranta asema ér, mba ve eren ishima i Yehova yô mba kwagh u civirigh sha ishigh Nagh, mluashe ve una lu nan nan je kpaa. (Yer. 13:11) Nahan a mase wan mba been makeranta mbara kwagh ér ve lu kwagh u civirigh sha ishigh ki Aôndo her. Been yô Gerrit Lösch u a lu môm ken Mbahemenev mba Shin Tine la pase wanger wanger ér, doo u mbacivir Yehova vea ver ishima u zuan a injar. (Heb. 11:6) Kpa awashima wase i lu dooshima u tangen iyol ga la.

William Samuelson u a lu orvesen u Gbaatom u Nengen sha Imakeranta i Henen Kwagh u Hemen u Aôndo la di wa mba been makeranta kwagh ér ve var a tom u civirigh u pasen kwagh u Tor u a lu hemen la shi ve za hemen u tesen icivir ve sha aeren a dedoo.a Been yô Sam Roberson u a dondo ken a na la di taver mba been makeranta asema ér ve keren kwagh u doon ken mbagenev hanma shighe cii. Aluer ve er nahan yô, vea hemba soon “mzough u anmgbianev cii.”—1 Pet. 2:17, NW.

Mba ne akaaôron a sagher iyol ne cii yô, Mark Noumair u a tesen ken makeranta u Gileadi la tôv mba been makeranta mbagenev, nahan ve ôr uvande-eren mba ve zua a mi ken tom kwaghpasen shighe u ve lu ken makeranta u Gileadi la. Mba been makeranta mbara tese mba ve va iniongo la wang ér ve soo tom u pasen kwagh shi ve soo u wasen mbagenev kpaa. Kent Fishcer u a eren tom ken Afishi a Nengen sha Tsombor u Betel a ken Patterson la di tôv mba ken Kômatii u Nengen sha Branci mba ityar igen itiar i í tindi mbamishen ker la. Akaa a anmgbianev mban ôr la taver mba van iniongo man mbamaren mba anmgbianev mba ve lu been makeranta mbara cii asema ér, vea ngohol mbamishen mba hev shi vea nenge sha ve tsembelee. Izak Marais u a eren tom vea Gbaatom u Nengen sha Tom u Kwagh Geman la di tôv mbamishen mba ve tse ken tom mishen la, man akaa a mbamishen mban ôr la taver mba been makeranta asema ér ve kpa vea zua a iember.

Geoffrey Jackson u a lu môm ken Mbahemenev mba Shin Tine la yange na kwaghôron u vesen sha itinekwagh ér, “Ne Ungwa Akaa a i Er Ne La—Nahan Ne Er Nyi a Mi?” Anmgbian Jackson, u a er tom mishen ken uicile mba ken ityeku i South Pacific nôngo u kuman anyom 25 la yange lam sha vegher u masetyô u Ityesen i sha Uwo la. Ken ityesen i Yesu la, yange ôr kwagh u iorov uhar mba ve maa ayou yô, u môm ken a ve lu orfankwagh ugen di lu ibumeor. Jackson kaa ér alaghga ayou la lu hen ijiir i môm. Nahan kpa ibumeor la yô maa iyou na sha tareghnyaagh, yange maa i̱ sha waarawa, kpa orfankwagh la yô time zan zan za zua a vande cii ve maa i̱ na ye. Shighe u ahumbeaura ta sha ayou ne yô, i̱ í maa sha vande la gba ga kpa i̱ í maa sha waarawa la yô gba.—Mat. 7:24-27; Luka 6:48.

Yesu pase ér ibumeor la tile sha ityough ki mba yange ve ungwa akaaôron a na kpa ve er sha a ga la. Orfankwagh la di tile sha ityough ki mba ve ungwa shi ve er sha a la. Anmgbian Jackson maa kaa a mba been makeranta ér, “Aluer ne dondo akaa a ne hen ken Bibilo la ken tom wen yô, ne lu er orfankwagh la nahan.” Maa mase kuren kwaghôron la sha u taver ve asema ér ve “hii u timen” ken tom u mishen ve.

Í mase nan ve takerada u tesen ér ve bee makeranta u mishen shi i na ve ajiir a za eren tom mishen her kpaa. Anmgbian Morris mase kuren sha u wan ve kwagh. A taver ve asema ér ve dondon Yesu hanma shighe shi ve de gbe uwer u suur sha Yehova ga. Maa i kuusu iniongo i been makeranta la.

[Footnote]

[Picture on page 31]

NGEREN U PASEN KWAGH U MBAYEVMAKERANTA

Ior va makeranta ken ityar: 10

I tindi ior ken ityar: 24

Iyenge i mba van makeranta cii ka: 56

Ve hemba anyom 33

Ve tsa ken mimi hemba anyom 17

Ve er tom u pasen kwagh hanma shighe hemba anyom 13

[Picture on page 32]

Mba Been Makeranta u Bibilo u Watchtower u Gileadi u sha Kwa 123

Ken ati a i nger shin heen ne, i nger namba mba hanma nongo sha adondo adondo, hii sha ishi yem a yem ken ijime, shi hanma nongo yô i nger ati a ior hii ken imese yem ken iyan.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.