Mbampin mba Mbaôron Takerada Ne Ve Pin La

Shighe u Yesu kaa wener wanakiriki na u jighjigh una ‘fa kwagh’ la, lu kaan ér nyi jimi?

Yesu yange pine wener: “Ka an nan lu wanakiriki u jighjigh man u fan kwagh u ter u nan una wa nan ya sha ikyev sha u nana naan ve kwaghyan sha ashighe ashighe?” (Mateu 24:45) “Wanakiriki” u a lu nan “kwaghyan” u ken jijingi la ka tiônnongo u Mbakristu mba i shigh ve mkurem la. Yesu yila ve ér wanakiriki u “fan kwagh” sha ci u nyi?a

Ityesen i Yesu ia hemba wasen se u kaven inja i ishember i wanakiriki u “fan kwagh” la. U tesen ikyav yô, zum u Yesu lu ôron kwagh u “wanakiriki u jighjigh man u fan kwagh” la, a ôr injakwagh sha kwagh u anuunaukase a pue, a a lu keghen mve u orkwasehe la. Kwagh u anuunaukase ne umbur se kwagh u Mbakristu mba i shigh ve mkurem la. Yange ve lu keghen mve u Yesu Kristu, u a lu Orkwasehe u vesen la kpoghuloo, cii man inyom i 1914 la ye. Shighe u orkwasehe va la, anuunaukase ne ataan lu a mkurem kpishi ga, nahan iniongo i orkwasehe la kar ve. Kpa mba utaan mbagenev mbara yô, er kwagh sha kwaghfan. Ve haa mkurem ken amenger a ve kpishi sha er aa za hemen u tan iwanger zum u orkwasehe una va la yô, nahan i na ve ian ve nyôr ken iyou i iniongo a orkwasehe imôngo.—Mateu 25:10-12.

Shighe u Yesu tema tor ken Tartor na ken inyom i 1914 la, Mbakristu kpishi mba i shigh ve mkurem la lu henen ér vea yem a za lu a na sha ave ave la je. Nahan kpa, tom lu sha ci ve shin tar kpishi, man mbagenev ken ve wa iyol u eren u ga. Er anuunaukase a lanen kwagh la nahan, ve vande taver ayol a ve sha akaa a ken jijingi ga, nahan hemba ve u lun mba tan iwanger. Mbagenev yô, er kwagh sha kwaghfan, inja na yô ve er kwagh sha mfe man mkav, nahan ve taver ken jijingi. Er ve fa ér tom shi her kpishi u vea er yô, ve gba mi eren u a iember je. Nahan, ve tese ér ve mba “wanakiriki u jighjigh man u fan kwagh” la.

Shi nenge ase kwagh u “orfankwagh” u Yesu a er kwagh na ken Mateu 7:24 la. Yesu kaa ér: “Hanma or u nan ongo akaaôron Am ne man nan eren sha a yô, á kar nan sha orfankwagh u nan maa iyou i nan sha vande” yô. Orfankwagh ne maa iyou na, í taver gbang, sha er ahumbeaura aa ta sha i kpa ia gba ga yô. Kpa, ibumeor la yô maa i na sha waarawa, nahan i gba. Nahan yô, ordondon Yesu u fankwagh ka nan tsenga nengen a akaabo a nana dondo kwaghfan u orumace ve nana tagher a mi la. Mkav u nan kua mfe u nan ne ka a wase nan u haren jighjigh u nan man aeren a nan kua atesen a nan cii sha akaa a Yesu yange tese la. Ka kwagh u “wanakiriki u jighjigh man u fan kwagh” kpa a eren je ne.

Nenge er i nger ishember i í gem ér, “fan kwagh” la ken Ubibilo kpishi ken Ruamabera u ken Zwa Heberu yô. Ikyav i tesen yô, Farao yange ver Yosev ér a lu ityough sha u nan ior kwaghyan ken tar u Igipiti cii. Lu Yehova er kwagh ne ér ior nav ve de kpe ijen ga ye. Yange i tsua Yosev sha ci u nyi? Farao kaa wener: ‘Ma or u tsôngon ishima fan kwagh er we nahan ngu ga.’ (Genese 41:33-39; 45:5) Abigail kpa Bibilo kaa ér lu “kwase u fan kwagh mimi.” Yange na Davidi, or u Yehova shighe un mkurem la kua ior nav kwaghyan. (1 Samuel 25:3, 11, 18) Yosev lu orfankwagh, Abigail kpa lu kwase u fan kwagh, gadia ve kav ishima i Aôndo shi ve er kwagh sha mfe man sha mkav kpaa.

Nahan zum u Yesu lu ôron kwagh u wanakiriki u jighjigh la ér á fa kwagh yô, lu kaan wener mba ve til sha ityough ki wanakiriki ne la vea eren kwagh sha mkav man mfe man sha inja kpaa, sha ci u ve har jighjigh ve man aeren a ve kua atesen a ve cii sha Mkaanem ma Aôndo ma mimi la.

[Footnote]